Tokimanyiya ambeki aso wa Bible dia vɔ shihodia ndo ngɛnangɛna waonga wa Jehowa woleki tshɛ amɛna
1 L’olimu w’esambishelo, sho hatokomɛ tsho lo mbetsha anto akambo wa mɛtɛ wa lo Bible. Sho mbakimanyiyaka dia vɔ mbeya woho w’onto wele Jehowa dia vɔ monga la lowando le nde l’ɔtɛ wa waonga ande woleki tshɛ amɛna. Etena keka anto wele l’etema w’ɛlɔlɔ akambo wa mɛtɛ wendana la Nzambi, dui sɔ mongaka la shɛngiya y’efula le wɔ ndo mbatshutshuyaka dia vɔ sala etshikitanu “dia [vɔ] nkendakenda ololo uku alanga Khumadiondjo.”—Kol. 1:9, 10; 3:9, 10.
2 Dibuku diaso di’oyoyo dia wekelo: Oma k’etatelo kadiɔ, dibuku Bible etshatɔ kotolaka yambalo y’anto lo waonga wa Jehowa. Tshapita ya ntondo ya dibuku sɔ kadimolaka lo ambola anɛ: Onde Nzambi ndjakiyanyaka mɛtɛ dikambo diayɛ?, Ngande wele Nzambi? ndo Onde onto koka ndjasukanya la Nzambi? Tshapita shɔ tɛkɛtaka nto dia ekila ka Jehowa (od. 10), losembwe ndo ɔlɔlɔ ande (od. 11), ngandji kande (od. 13), wolo ande (od. 16), ndo dia kɛtshi, ngandji ka shikaa, woho wende suke dia dimanyiya, solo dia lotutsha ndo dia kɔlamelo yande (od. 19). Odingɔ 20 mbutaka lo tshena pe ɔnɛ: “Etena katayaleke mbeka awui wendana la Jehowa, mbayondoleka monga onto la mɛtɛ le yɛ ndo mbayoyoleka mbôka ngandji ndo ndjaoka suke suke la nde.”
3 Ngande wakokaso kamba la dibuku Bible etshatɔ dia kimanyiya ambeki aso wa Bible dia vɔ ndjasukanya la Jehowa? L’ɔkɔngɔ wa sɛdingola odingɔ ɔmɔtshi watɔtɔmiya dionga dimɔtshi diaki Nzambi, sho mbeyaka mumbola ombeki ɔnɛ: “Kakɔna kaketsha dui nɛ lo kɛnɛ kendana la woho w’onto wele Jehowa?” kana “Ngande wɛnya dui nɛ ɔnɛ Nzambi ndjakiyanyaka mɛtɛ dikambo diayɛ?” Lo kambaka tena dimɔtshi la ambola wa ngasɔ lo wekelo, sho mbetshaka ambeki aso wa Bible dia kanaka yimba lo kɛnɛ kekawɔ ndo mbakimanyiyaka dia vɔ ndeka ngɛnangɛna waonga wa Jehowa woleki tshɛ amɛna.
4 Tokambe la kiombo y’ovuswelo: L’ekomelo ka tshapita tshɛ, lɔmba ombeki dia mbisha kɔmatɛrɛ lo ɛtɛkɛta ande ndamɛ lo oseka dui tshɛ diele lo kiombo yata ɔnɛ: “Kɛnɛ ketsha Bible.” Kotola yambalo yande lo avɛsa woshilami. Dia keketsha ombeki dia nde mbuta kɛnɛ kele lo otema ande, wɛ mbeyaka mbala mɔtshi mombola ɔnɛ: “Akanyiyayɛ lo kɛnɛ ketsha Bible lo dui nɛ?” Lo sala ngasɔ, hatotɔtɔmiya tsho awui woleki ohomba wa lo tshapita koko tayoshihodia dimɛna kɛnɛ ketawɔ mɛtɛ ombeki. Dui sɔ diayokimanyiya ombeki dia nde tatɛ monga la diɔtɔnganelo di’ɔlɔlɔ la Jehowa.