Vɔ toshaka ɛnyɛlɔ k’ɔlɔlɔ ka kɔlamelo

¹ Dui dimɔtshi di’oyoyo diendana l’olimu wa lo tena tshɛ diakatatɛ l’ɔnɔnyi 1937. Dui diakɔ ko: olimu w’ombatshi mboka wa lânde. Apami la wamato waki l’akoka, wambohokɔ akambo l’olimu w’Okristo, waketawɔ la lolango lawɔ dia ntshɔ tokamba dihole tshɛ diakâlɔmbɔlaka okongamelo. Ɛlɔ kɛnɛ, ɛnɔnyi akumi l’ɔkɔngɔ, ambatshi mboka wa lânde tetemalaka tosha ɛnyɛlɔ k’ɔlɔlɔ ka kɔlamelo kahombaso mbokoya.​—⁠Heb. 6:⁠12.

² Vɔ wakete la ntondo l’olimu ɔsɔ: Ambatshi mboka wa lânde mbakatatɛ kamba la fɔnɔ dia sawola l’anto lo asoko awɔ wa mvudu. Vɔ wakakambaka nto la awui wakawasangola lo waa bandɛ kasɛtɛ dia sawola l’anto lo kɛnɛ kendana la Bible lo waendelo awɔ w’eyoyo. Vɔ wakasalaka dikambo sɔ lo esomba wa weke lɛnɛ aki Ɛmɛnyi wa Jehowa wamboshikimala. L’ɔkɔngɔ diko, ambatshi mboka wa lânde wakatatɛ tomama lo ahole waki ohomba efula w’apandjudi wa Diolelo. Vɔ wakatetemala membola anto tshɛ wakɛnyaka nsaki lo losango la Diolelo ndo wakalɔmbɔlaka wekelo wa Bible. Oma lo welo efula wakawadje, tshumanelo nkama diakatema. Ohamelo w’efula wambotɛna lo okongamelo ɛlɔ kɛnɛ ndja oma lo woho wakawadianganya lokumu l’ɔlɔlɔ aha la mpekɔ. (Is. 60:22) Ambatshi mboka wa lânde wekɔ l’ɔkɛndɛ w’ohomba efula l’odianganyelo wa lokumu l’ɔlɔlɔ ‘le ditongami tshɛ dia l’ɛse olongo.’​—⁠Kol. 1:⁠23.

³ Vɔ wekɔ bɛnyɛlɔ di’ɔlɔlɔ dia mbokoya: Aya ɛnɔnyi akumi wambokamba ambatshi mboka wa lânde olimu wa lo tena tshɛ. L’edja k’ɛnɔnyi wambeta, mbetawɔ k’apami la wamato wa kɔlamelo asɔ kakakeketala l’ekakatanu wa weho la weho wakakomɛ. (1 Pet. 1:​6, 7) Vɔ waketawɔ la lolango tshɛ dia ndjahombia lomombo la l’emunyi dia vɔ ntshɔ tokamba l’ahole waki ohomba wa lânde. Amɔtshi waya kakianɛ esombe ndo waya la yônge ya demba ya kɔlɔ kana wekɔ lo ndɔshana la ekakatanu ekina. (2 Kor. 4:​16, 17) Koko, vɔ “wayotokaka elua ndu lu nshi yawo y’esumbi.” (Osam. 92:14) Vɔ ndjaɛkɛka le Jehowa ndo nde mbatshɔkɔlaka.​—⁠Osam. 34:8; Tuk. 10:⁠22.

⁴ Sho kokaka mɛtɛ mandola ambatshi mboka wa lânde la ngandji tshɛ. Naka nyekɔ la diɛsɛ dia monga la ambatshi mboka wa lânde l’etshumanelo kanyu, kete nyoleke kamba la diaaso sɔ dia monga kâmɛ la wɔ ndo kondja wahɔ oma lo diewɔ diawɔ. Tandolake ambatshi mboka wa lânde l’ɔtɛ w’olimu awɔ oko wewɔ apandjudi wa Diolelo wa kɔlamelo. Tokondja ekeketshelo oma lo etete kawɔ. Anto tshɛ wokoya mbetawɔ kawɔ kokaka mbetawɔma le Jehowa ndo tshɔkwama nɛ dia “wane watutaka akambu wa mete mbatôngenyangenyaka.”​—⁠Tuk. 12:⁠22.