Ekadimwelo lo ambola anyu

◼ Lo toho takɔna ta shikaa takokaso nkimanyiya ambatshi mboka?

Lo ɔnɔnyi w’olimu wa 2009, suke la anangɛso la akadiyɛso 800 000 wakakambe oko ambatshi mboka wa pondjo ndo wa lânde. Ekambi wa lo tena tshɛ ɛsɔ wakakambe la wenya, wolo ndo la ekondjelo kawɔ l’oyango wa dianganya lokumu l’ɔlɔlɔ la Diolelo. (Tuk. 3:9) Ande woho wakangɛnangɛna Jehowa welo wakawadje lee! Lo toho takɔna takokaso nkɛnɛmɔla kanyi yaki Jehowa ndo mbakimanyiya dia vɔ ndeka monga l’ɔngɛnɔngɛnɔ ndo l’ekikelo l’olimu awɔ?

Aha la tâmu, ɛtɛkɛta aso w’amɛna mbeyaka mbakeketsha dia vɔ ntetemala nkamba oko ambatshi mboka. (Tuk. 25:11) Onde hatokoke ntshikitanya ekongelo kaso ka lomingu la lomingu l’oyango wa nsambisha kâmɛ la wɔ? Etena kasambishaso la wɔ, sho kokaka mbasukɛ lo mbakimanyiya la yema ya dikuta dia vɔ mfuta bisi kana mututu. (1 Kor. 13:5; Fil. 2:4) Sho mɛnyaka nto dia sho mbasukɛka la ngandji tshɛ lo mbaelɛka lawakaso dia ndjosanga la wɔ lonya lo lokenga.—1 Pet. 4:8, 9.

Afundelo toshikikɛka dia Jehowa ayokotsha ehomba wa wanɛ wayanga ntondo Diolelo diande. (Osam. 37:25; Mat. 6:33) Yoho mɔtshi yasalande dikambo sɔ, ele lo tshimbo ya nkumbo kaso k’Akristo kele la ngandji. (1 Joa. 3:16-18) Lo mɛtɛ, ambatshi mboka hawolongamɛ dia anto akina mbashaka falanga dia vɔ nkotsha ehomba awɔ. Ndo mbeyaka monga ko vɔ hawotɛ anto akina ehomba wele la wɔ. Koko sho kokaka nkimanyiya ambatshi mboka wele la kɔlamelo ndo nkotsha “ehumba awo” lo toho ta shikaa lo mbadjaka yimba ndo lo mbâsɛdingolaka.—2 Kor. 8:14, 15.

Etena kakatshu Febi, osambisha waki l’ohetoheto wa lo ntambe ka ntondo wa lo etshumanelo ka Kɛnɛkiya la Rɔma, Paulo akakeketsha anangɛso l’akadiyɛso wa lɛkɔ ate: “Nyûlunguli l’atei anyu lu lukumbu la Khumadiondjo, uku atuwulungula[ka] ekilami. Kanyûkimanyiaki lu akambu tshe wayunduhumbaka uma le nyu.” (Romo 16:1, 2) Tekɔ la diaaso dia mbisha ase etshumanelo kaso wasambisha lokumu l’ɔlɔlɔ aha la mpekɔ, oko ambatshi mboka wa pondjo kana wa lânde ekimanyielo ka la ngandji ka ngasɔ.—Etsha 5:42.