Ɛtshɔkɔ Waya oma l’Olimu w’Ombatshi Mboka
1, 2. Ɛtshɔkɔ akɔna wokakatanyi l’olimu w’ombatshi mboka, ndo lande na?
1 Ombatshi mboka ɔmɔtshi akate ate: “Dimi mbeyaka dia ndoko olimu okina wakoka mbelami ɔngɛnɔngɛnɔ oko wɔnɛ wa sambisha anto akina akambo wa mɛtɛ.” Okina akate ate: “Lam’adja wonya, dimi ndalaka djɔ ya bao, ndo otema ami ndolaka tɔɔ l’ɔngɛnɔngɛnɔ.” Ambatshi mboka asɔ wakatɛkɛta lo lokombo l’anangɛso l’akadiyɛso wa l’ahole tshɛ wambokondjaka ɛtshɔkɔ waya oma l’olimu w’ombatshi mboka.—Tuk. 10:22.
2 Kimanyiya akina dia kondja ewo kashimbɛ nsɛnɔ kele l’Ɔtɛkɛta wa Nzambi mbelaka ɔngɛnɔngɛnɔ wa mɛtɛ. (Etsha 20:35; 1 Tes. 2:19, 20) Ombatshi mboka ɔmɔtshi wambokamba ɛnɔnyi efula akate ate: “Ekɔ ɔlɔ efula ndo mbetawɔ kaso keketshamaka lo mɛna nkudu kele l’Ɔtɛkɛta wa Nzambi ka tshutshuya anto dia vɔ sala etshikitanu lo nsɛnɔ yawɔ.” Eelo, lo ndjasha vɔ vɔamɛ dia kimanyiya anto ndo lo mbeka la wɔ Bible, ambatshi mboka kondjaka vɔamɛ ɛtshɔkɔ wa ngasɔ.
3, 4. Woho akɔna wele olimu w’ombatshi mboka mbetshaka onto dia ndjaɛkɛ le Jehowa, ndo dikambo sɔ ngande wakimanyiyadiɔ onto dia pama lo nyuma?
3 Nyoyaɛkɛ le Jehowa: Woho wayaɛkɛwɔ lushi la lushi le nyuma ka Nzambi lam’akambawɔ olimu awɔ kimanyiyaka ambatshi mboka dia tɔ “elua wa nyuma” ndo elowa ɛsɔ wekɔ ekokelo le wɔ. (Ngal. 5:16, 22, 23) Ndo nto, lam’ele vɔ kambaka l’Ɔtɛkɛta wa Nzambi mbala la mbala, ambatshi mboka wekɔ tomanyi lo yoho ya kamba l’Afundelo dia mamɛ akambo wa mɛtɛ ndo dia keketsha akina. (2 Tim. 2:15) Ɔnangɛso ɔmɔtshi lambokamba olimu w’ombatshi mboka ɛnɔnyi akumi akasha kɔmatɛrɛ kɛnɛ ate: “Olimu w’ombatshi mboka ambokimanyiya dia dimi kondja ewo k’efula ka Bible, ewo kamomokamba latɔ dia kimanyiya anto efula dia vɔ mbeya Jehowa l’asangwelo ande.” Ande ɔngɛnɔngɛnɔ lee!
4 Ambatshi mboka wa pondjo pombaka nto ndjaɛkɛ le Jehowa lo toho tokina efula. Mbetawɔ kawɔ keketshamaka lam’ɛnawɔ woho watshɔkɔlande welo awɔ dia kotsha ehomba awɔ wa l’emunyi. Ɔnangɛso ɔmɔtshi lele l’ɛnɔnyi 72 ndo laya ɛnɔnyi 55 l’olimu w’ombatshi mboka akate ate: “Ndoko lushi lakakalɛ Jehowa.” Ndo nto, lo tetemala monga la sso di’ɔsɛlɛngɛ, ambatshi mboka ndjakokɛka vɔamɛ oma l’ekiyanu efula wa lo lɔsɛnɔ. Onde wɛ ngɛnangɛnaka dia kokamɛ oma l’ekiyanu wa lo lɔsɛnɔ?—Mat. 6:22; Heb. 13:5, 6.
5. Woho akɔna wele olimu w’ombatshi mboka kimanyiyaka onto dia ndjasukanya le Jehowa?
5 Toyasukanya le Nzambi: Diokanelo diasaso la Jehowa diekɔ ɛngɔ koleki ohomba. (Osam. 63:3) Lo sambisha efula l’ɔtɛ wa ngandji kokaso Jehowa, diokanelo sɔ keketshamaka efula. (Jak. 4:8) Ɔnangɛso ɔmɔtshi lambokamba ɛnɔnyi ndekana 18 oko ombatshi mboka akate ate: “Olimu w’ombatshi mboka toshaka diaaso dia sho ‘ndɛta ndo mɛna ɔnɛ Jehowa ekɔ ɔlɔlɔ.’ Dui sɔ tokimanyiyaka lushi la lushi dia keketshaka diokanelo diasaso l’Otungi aso.”—Osam. 34:8.
6. Kakɔna kele weho tshɛ ambatshi mboka wekɔ la tɔ, ndo lâdiko w’ambatshi mboka waa na nto wakondja wâhɔ?
6 Lâdiko dia monga la waaso w’ɔlɔlɔ, ambatshi mboka pombaka monga la mbetawɔ ka nge, la ngandji ka shikaa otsha le Nzambi ndo otsha le asekawɔ anto, ndo mbetawɔ dia monga la yimba ya ndjahombia. (Mat. 16:24; 17:20; 22:37-39) Ɔnkɔnɛ, oko wadiɛnya dundji di’ɔngɛnɔngɛnɔ di’ambatshi mboka l’ahole tshɛ, ɛtshɔkɔ w’oma l’olimu w’ombatshi mboka ndeka diangɔ tshɛ diakokaso ndjahombia. (Mal. 3:10) Ɛtshɔkɔ ɛsɔ hawohembetɛ paka le ambatshi mboka, koko nkumbo yawɔ ndo tshumanelo diawɔ to kondjaka wahɔ efula oma lo yimba ya dimɛna yɛnya ambatshi mboka.—Fil. 4:23.