“Ngande wayoyokadimola?”

1. Ekakatanu akɔna wahomana la efula ka l’atei aso?

¹ Onde wɛ nangaka Ɔtɛkɛta wa Nzambi koko ekɔ tshondo y’okakatanu le yɛ dia wɛ mbohɔ awui amɔtshi wendana la ɛkɔndɔ wa lo Bible kana avɛsa wofundami ɛtɛkɛta ɛmɔtshi wa shikaa lo Afundelo? Onde wɛ kombolaka di’anayɛ monga la eokelo k’oshika k’awui ndo ka wetshelo w’etatelo wa lo Bible? Sawo dia lânde diele l’ɔtɛ a dui ɔnɛ: “Ngande wayoyokadimola?” diatomba ngɔndɔ tshɛ lo lɛkɛ 31 la Réveillez-vous ! koka kimanyiya ana ndo epalanga dia mbeya Ɔtɛkɛta wa Nzambi dimɛna.​—Etsha 17:11.

2. Ngande wakokaso kamba la tenyi diotshikitanyi dia sawo diele l’ɔtɛ a dui ɔnɛ: “Ngande wayoyokadimola?”

² Ngande wakokayɛ kamba dimɛna la sawo sɔ? Réveillez-vous ! wa Ngɔndɔ ka ntondo 2006 akatosha alako wayela anɛ: “Ɔsa etena ka mboka sso lo lɛkɛ 31 . . . Awui amɔtshi wele lo lɛkɛ lɔsɔ wayɔngɛnyangɛnya ambadi weke akɛnda; ndo akina wayɔlɔmba di’ambeki wa Bible wambohama yema kana yimba. Etenyi kata ɔnɛ: ‘Etena kakɔna kakawasalema?’ ayonyokimanyiya dia nyu funda etena kakasɛnɛ anto amɔtshi watɛkɛtama lo Bible ndo etena kakasalema awui w’ohomba efula wa lo Bible. Kânga mbele ekadimwelo wele lo etenyi kata ɔnɛ: ‘Lo numɛlɔ kɛnɛ’ wayotanemaka lo periodikɛ k’otondo, ekadimwelo wa ambola efula tanemaka lo lɛkɛ lɛnyishawɔ lo numɛlɔ kakɔ koko ekadimwelo akɔ fundama etshuletshule. Lande na kahayasale yema y’eyangelo la ntondo ka wɛ mbadia ekadimwelo akɔ ndo oma lâsɔ ko wɛ sawola l’anto akina kɛnɛ kekiyɛ? Wɛ mbeyaka kamba la sawo di’oyoyo nɛ diele l’ɔtɛ a dui ɔnɛ: ‘Ngande wayoyokadimola?’ lo ɛkɛtshanyelo wa lo nkumbo kana wa l’olui.”

3. Ngande wakakondja nkumbo mɔtshi wahɔ oma lo sawo nɛ, ndo tenyi diakɔna dialekayɛ ngɛnangɛna?

³ Lo mɛtɛ, nkumbo efula ngɛnangɛnaka sala wekelo wa lo nkumbo l’ekimanyielo ka sawo sɔ. Mama kɛmɔtshi akafunde ate: “Dimi l’omɛmi mɛnaka di’ekɔ dikambo dia dimɛna dia mbidja etenyi kata ɔnɛ: ‘Ana mbahomba nyanga’ lo wekelo aso wa lo nkumbo dia wekelo monga dimɛna ndo dia ɔnaso la womoto l’ɛnɔnyi esato ngɛnangɛna wekelo. Ekɔ dui di’ɔngɛnɔngɛnɔ dia mbɛna ɔsa l’ɔngɛnɔngɛnɔ tshɛ kɔpi kande ka Réveillez-vous ! ndo afola akatshi tshɛ edja ndo nde ambotana kɛnɛ kayangande.” Papa kɛmɔtshi ka lo wodja wa Brésil akate ate: “Dimi l’ɔnami la pami lele l’ɛnɔnyi esambele ngɛnangɛnaka efula sawo nɛ dia lo Réveillez-vous ! Sawo nɛ kimanyiyaka Moises w’ɔnami dia nde ndeka mbidja yimba lo wekelo, nyanga avɛsa wa lo Bible, shihodia kitshimudi y’esato ndo y’adatɛ.” Ashley lele l’ɛnɔnyi enanɛi akafunde ate: “Losaka efula l’ɔtɛ wa sawo diele l’ɔtɛ a dui ɔnɛ: ‘Ngande wayoyokadimola?’ diele lo lɛkɛ 31 la Réveillez-vous ! Dimi mbekaka awui efula wendana la Bible oma lo ekimanyielo ka sawo sɔ.”

4. Ngande wakoka ase nkumbo kamba la sawo nɛ dia kotsha l’awui wayowɔsɛdingola lo wekelo awɔ wa Bible wa lo nkumbo?

⁴ Bonde kahayakambe mbala la mbala la sawo diele l’ɔtɛ a dui ɔnɛ: “Ngande wayoyokadimola?” lo wekelo anyu wa lo nkumbo? Wɛ kokaka kamba la Index kana Watchtower Library lo CD-ROM dia nyanga ekadimwelo lo ambola amɔtshi wa wolo efula. Lo sala ngasɔ, wɛ ayetsha anayɛ woho wa salaka eyangelo. Naka wɛ ekɔ la ana waya epalanga, lande na kahayawalɔmbɛ dia vɔ sala eyangelo dia kadimola sawo diata ɔnɛ: “Êmi na?” kana “Etena kakɔna kakawasalema?” la ntondo ka nyu sala wekelo wa lo nkumbo? Vɔ kokaka kahana la anto akina etombelo wa eyangelo wakawasale lo wonya wa wekelo. Kamba dimɛna la lɛkɛ 31 ekɔ yoho mɔtshi yakoka ambutshi kɔkɔmiya Ɔtɛkɛta wa Nzambi lo etema w’anawɔ, lo mbakimanyiya dia vɔ mbeya “afundelu w’ekila” oma ko tɔkɛndakɛnda tawɔ.​—2 Tim. 3:15; Euh. 6:7.