Le ambadi aso

TEKƆ l’ɔngɛnɔngɛnɔ dia nyewoya dia tatɛ oma lo numɛlɔ kɛnɛ, etshikitanu ɛmɔtshi wambosalema lo yoho yayotombaka Tshoto y’Etangelo. La ntondo ka sho nyolembetshiya kɛnɛ kambotshikitanyema, totokɔtɛkɛta dia kɛnɛ kahatotshikitanyema.

Lokombo la periodikɛ kɛnɛ, Tshoto y’Etangelo mbewoyaka Diolelo diaki Jehowa, halotshikitanyemi. Omalɔkɔ, Tshoto y’Etangelo yayotetemala tombola Jehowa oko wende Nzambi ka mɛtɛ ndo keketsha ambadi ayɔ la lokumu l’ɔlɔlɔ la Diolelo diande. Asawo wele lo lɛkɛ 5 polo 9 la numɛlɔ kɛnɛ nembetshiyaka ele Diolelo ndo etena kayodioya. Lâdiko dia lâsɔ, Tshoto y’Etangelo yayotetemala keketsha mbetawɔ k’ambadi le Yeso Kristo, sukɛ akambo wa mɛtɛ wa lo Bible ndo nembetshiya kitshimudi y’awui weta l’andja ɔnɛ l’ekimanyielo ka prɔfɛsiya ya lo Bible, oko wamboyosala dikambo sɔ l’edja kolekanyi ɛnɔnyi lokama.

Ko kakɔna kayotshikitanyema? Tayanga nyolembetshiya awui amɔtshi w’ohomba efula w’eyoyo wayotombaka lo numɛlɔ ka ntondo ka ngɔndɔ tshɛ.a

Asawo efula watshutshuya onto dia kana yimba wayotombaka ngɔndɔ tshɛ. Sawo diata ɔnɛ: “Onde wɛ akeyaka?” diayongaka l’awui w’amɛna efula walembetshiya ɛkɔndɔ ɛmɔtshi wɔsami oma lo Bible. Sawo diata ɔnɛ: “Yasukanya la Nzambi” diayɛnyaka kɛnɛ kakokaso mbeka lo dikambo dia Jehowa oma lo avɛsa amɔtshi wa shikaa wa lo Bible. Sawo diata ɔnɛ “Ambola w’oma le ambadi aso” diayoshaka ekadimwelo lo ambola wa lo Bible wambola anto efula. Ɛnyɛlɔ, anto efula mimbolaka ɔnɛ: “Onde Diolelo diaki Nzambi diekɔ l’otema ayɛ?” Wɛ ayotana okadimwelo lo lɛkɛ 13.

Asawo amɔtshi wayotombaka mbala la mbala dikambo dia wahɔ wa nkumbo. Sawo diata ɔnɛ: “Nsapi y’ɔngɛnɔngɛnɔ wa nkumbo,” diayotombaka mbala nyɛi l’ɔnɔnyi, diayɛnyaka ekakatanu watomba mɛtɛ lo nkumbo ndo woho wakoka atɔndɔ wa lo Bible kimanyiya dia kandola ekakatanu akɔ. Sawo diata ɔnɛ: “Nyetsha ananyu,” diayohombaka ambutshi mbadia kâmɛ la anawɔ, diayotombaka lo ngɔndɔ nkina tshɛ. Naka diɔ hadiotombi, kete sawo diata ɔnɛ: “Dikambo dia ɛlɔngɔlɔngɔ la esekaseka aso,” diayotomba ndo diayowaɛnyaka woho wakokawɔ mbeka Bible.

Asawo akina angana wayotombaka mbala nyɛi l’ɔnɔnyi. Sawo diata ɔnɛ: “Tokoya mbetawɔ kawɔ” diayotokeketshaka dia sho ndjela ɛnyɛlɔ ka onto ɔmɔtshi latɛkɛtawɔ lo Bible. Ɛnyɛlɔ, oma lo lɛkɛ 18 polo 21 la numɛlɔ kɛnɛ, wɛ ayadia ɔkɔndɔ wananda otema wendana la ɔprɔfɛta Elidja ndo ayɛna woho wakokaso mbokoya mbetawɔ kande. Sawo diata ɔnɛ: “Mukanda w’oma le . . . ” diayɛnyaka alapɔlɔ wa ntondo wa onto w’oma le waa misiɔnɛrɛ kana w’oma le anto akina wele l’ahole wotshikitanyi wa la nkɛtɛ. Sawo diata ɔnɛ: “Wetshelo wakondjaso oma le Yeso” diayɔmbɔlaka wetshelo ɛmɔtshi w’etatelo wa lo Bible lo yoho ya wɔdu.

Tekɔ l’eshikikelo dia Tshoto y’Etangelo yayotetemala ngɛnyangɛnya ambadi walɛmiya Bible ndo wakombola mbeya kɛnɛ ketshatɔ mɛtɛ. Tekɔ l’elongamelo dia periodikɛ kɛnɛ kayonyokimanyiya dia nyu shidiya mposa kanyu ka akambo wa mɛtɛ wa lo Bible.

AFUNDJI

[Nɔte ka l’ɛse ka dikatshi]