Kakɔna kayonyosala la lɔsɛnɔ lanyu?
1 Tena efula vɔ mimbolaka ana w’akɛnda ɔnɛ: “Kakɔna kalangɛ ndjonga lam’ayoyokoma opalanga?” Lam’akiyɛ dikɛnda, onde wɛ akate ɔnɛ wɛ ayonga dɔkɔtɛlɛ? pilɔtɛ? omendji w’otshimbedi? Kana le yana ya yimato, onde wɛ akate dia wɛ ayonga ɔnɔshi wa lokombe? ɔfɛlɛmɛ? misiɔnɛrɛ? Wonya ɔnɛ wayayɛ opalanga, wɛ pombaka ndjambola wate: ‘Kakɔna kayomosala la lɔsɛnɔ lami?’ Onde wɛ ekɔ suke dia mbɔsa yɛdikɔ?
2 Dia kokimanyiya dia wɛ mbɔsa yɛdikɔ yoleki dimɛna, okongamelo waki Jehowa wambotondja DVD diele l’ɔtɛ a dui ɔnɛ: Les jeunes s’interrogent. . . Que vais-je faire de ma vie ? Lam’alangɛ, enda DVD nɛ ndo kana yimba dimɛna lo kɛnɛ tshɛ kele lɔkɔ, mbidja ndo dramɛ, ɛkɔnya ndo awui akina. Awui wele lɔkɔ mɛnyama lo kiombo yele l’ɔtɛ a dui ɔnɛ: “Menu principal.”
3 Dramɛ: Etena kendayɛ dramɛ, sɛdingola ambola anɛ: 1) Awui akɔna wafɔna Timɔtɛ latɛkɛtawɔ lo Afundelo w’Akristo wa lo Grɛkɛ la André? (Etsha 16:1; 1 Tim. 4:8; 2 Tim. 1:5) 2) Ngande wakasɛngiyama André dia monga ɔkɛnyi wa tɔkɛnyɔ wa lokumu ndo oma le waa na? 3) Waa na mɛtɛ waki la shɛngiya y’ɔlɔlɔ le Timɔtɛ ndo le André, ndo lo toho takɔna? (2 Tim. 1:1-4; 3:14, 15) 4) Shɛngiya yakɔna yaki la dako dia lo Mateu 6:24 ndo dia lo Filipi 3:8 le André, ndo shɛngiya yakɔna yele la alako asɔ le yɛ?
4 Waɛnɛlɔ wele lɔkɔ: L’ɔkɔngɔ wa wɛ menda dramɛ di’otondo, nyomenda waɛnɛlɔ wayela ndo kadimola lo ambola anɛ. “Paulo la Timɔtɛ”: Naa dako di’ekomelo diakasha Paulo Timɔtɛ? (2 Tim. 4:5) “Sha Jehowa kɛnɛ koleki ɔlɔlɔ le yɛ”: Naa eyango wa lo nyuma wele layɛ? “Eta lo wedi wa Jehowa”: Ɔngɛnɔngɛnɔ wa mɛtɛ ndjaka oma lende? “Dako diaki tshɛnde ka womoto”: Lande na kele ekɔ kɔlɔ monga onto la lokumu l’andja ɔnɛ waki Satana? (Mat. 4:9) “Ndoko lonyangu”: Mbeya dui diakɔna diakoka kokimanyiya dia monga la lɔsɛnɔ lele l’oyango?—Tuk. 10:22.
5 Ɛkɔnya: Etena kendayɛ etenyi tshɛ ka lo tenyi diayela, kakɔna kɛnayɛ kakokayɛ sala dia mbisha Jehowa kɛnɛ koleki ɔlɔlɔ le yɛ? 1) “Onde ndjâkimɔ lo eyango w’anyanya, kana le Nzambi?” (1 Joa. 2:17); 2) “Eka woho wa ngɛnangɛna olimu ayɛ w’esambishelo.” (Osam. 27:14); ndo 3) “Diaaso dia kamba olimu diekɔ la ntondo kayɛ.”—Mat. 6:33.
6 Mbohɔ awui wakete: Onde wɛ koka kadimola? 1) Olimu akɔna wakawesaka ɔnangɛso la kadiyɛso dia kamba, ndo lande na? 2) Naa etombelo w’ɛlɔlɔ wakawakondja? 3) Etshikitanu akɔna wakasalema lo nsɛnɔ yawɔ l’onto ndo l’onto? (2 Kor. 5:15) 4) Naa elimu wa teokrasi wakawayokambaka lo dihole dia wɛnɛ wakawakambaka ntondo, ndo lande na kakawayaoke dia hawokoke mbesa eyango wa l’emunyi ndo wa lo nyuma mbala kakɔ ɔtɔi? 5) Onde vɔ wekɔ la lonyangu lɔmɔtshi lo woho wakawatshikitanya eyango waki lawɔ lo lɔsɛnɔ? 6) Dui diakɔna dia lânde diakawate diakotshutshuya dia wɛ kana yimba lo kɛnɛ kahombayɛ sala la lɔsɛnɔ layɛ?
7 Ɛkɔnya ekina: Kakɔna kamboyeka lo ɛkɔnya ɛnɛ kakokayɛ sala dia wɛ ndeka ndjasha l’olimu wa Jehowa? 1) “Ohomba wa wekelo w’onto ndamɛ,” 2) “Weho ekina w’esambishelo,” 3) “Olimu wa lo Bɛtɛlɛ,” 4) “Kalasa ka Ngiliyadɛ dikambo di’olowanyelo wa waa misiɔnɛrɛ,” 5) “Kalasa k’olowanyelo w’ekambi.” Vusola “Ɛndɛksɛ w’ekanda wendana l’ɛtɛ w’awui wɔtɛkɛtami,” ndo koleke mbadia kɛnɛ kaleka kotola yambalo yayɛ.
8 Ko onde wɛ ambɔsa yɛdikɔ ya kɛnɛ kayoyosala la lɔsɛnɔ layɛ? Paulo akakeketsha Timɔtɛ ate: “Utetemali lu akambu aso; uyakimo l’utema aye tshe loko, ne dia uhamelu aye wenami le antu tshe.” (1 Tim. 4:15) Sho kokeketshaka dia wɛ sala woho akɔ wâmɛ la kɛnɛ kamboyɛna ndo kamboyoka lo DVD nɛ. Lɔmba Jehowa dia nde kokimanyiya dia wɛ sala ɔsɔnwɛlɔ wa lomba wayokosha ɔlɔ ndo oyango lo lɔsɛnɔ oma ko kakianɛ ndo dia wɛ ndjonga la nshi yayaye y’ɔngɛnɔngɛnɔ.
[Kiombo ya lo lɛkɛ 6]
MENU PRINCIPAL
Dramɛ
Wɛnɛlɔ (ɛsɔnwɛlɔ 11)
Ɛkɔnya
Pɛtsha
Tenyi (ɛsɔnwɛlɔ 3)
Kalola ɛkɔngɔkɔngɔ
Ekotsha
Ɛkɔnya ekina
Ɛndɛksɛ w’ekanda wendana l’ɛtɛ w’awui wɔtɛkɛtami
Ɛtɛ w’awui wahɔnyi
Akanga wa mpoke
Ndoko ɛngɔ
Dia wɛ mɛna awui wele lo menu, kamba la butɔ kofundami ɔnɛ Suite ▶, ◀ Retour, ndo Menu principal.