Ekongelo ka Losanganya la Lânde la Lushi Ɔtɔi Layaye
Naka wɛ mɛna kana mboka lɔhɛmɔ lɔmɔtshi lendana la mpokoso ko wɛ hɔshi ndoko yɛdikɔ, kete dui sɔ koka monga l’etombelo wa kandji efula. Ekɔ ohomba efula mbidja yimba lo ɛlɔmbwɛlɔ kasha Jehowa l’akambo wa lo nyuma. Dikambo sɔ diayokama epole ɔsɛkɛ lo losanganya la lânde la lushi ɔtɔi l’ɔnɔnyi w’olimu wayaye. Lɔ layonga l’ɔtɛ a dui ɔnɛ: “Nyodje Yimba lo Woho Wahokamɛnyu.”—Luka 8:18, NW.
Lo sawo diande dia ntondo, ɔtɛkɛtshi w’ɔngɛndangɛnda ayɛnya woho wele alako wa lo totshapita ta ntondo ta mukanda waki Paulo otsha le ase Hɛbɛru wekɔ ohomba efula le so ɛlɔ kɛnɛ. Lo sawo di’ekomelo diele l’ɔtɛ a dui ɔnɛ: “Totetemale Mbidja Yambalo lo Wetshelo wa Nzambi,” ɔtɛkɛtshi w’ɔngɛndangɛnda ayokimanyiya anto tshɛ dia vɔ sɛdingola woho wahokamɛwɔ Jehowa, Ɔnande ndo ‘ɔhɔmbɔ wa kɔlamelo ndo kɛsɔ.’—Mat. 24:45.
Tenyi efula dia l’ekongelo diayoleka monga ohomba efula le nkumbo. Dako diata ɔnɛ: “Nkumbo Yahokamɛ Ɔtɛkɛta wa Nzambi Aha la Mbekola Yimba Lam’akina” diayotokimanyiya woho wa sho ndjalama di’aha awui wa l’andja ɔnɛ ndjolanya lonyuma laso. Lo sawo diakɔ wayɔkɔnya anto wakasale etshikitanu dia vɔ mbidja awui wa lo nyuma lo dihole dia ntondo. Lo dako diata ɔnɛ: “Pokamɛ Dui dia Nzambi la Yambalo Tshɛ Keketshaka Ɛlɔngɔlɔngɔ l’Esekaseka Aso” wayɔkɔnya ɛlɔngɔlɔngɔ l’esekaseka wakasukɛ akambo wa mɛtɛ la kɔlamelo tshɛ la kalasa ndo wakashike ekolo lo tɔsɛngiya t’asekawɔ kana l’olimu w’esambishelo. Sawo diata ɔnɛ: “Ana Wahokamɛ Nzambi ndo weka” diayotokimanyiya di’aha sho mɔnyɔla pondjo akoka wele l’ana w’akɛnda wa mbeka. Ɛkɔnya wayowɔkɔnya ana l’ambutshi awɔ wayotokimanyiya dia mɛna ɛlɔlɔ waya oma lo mbetsha ana mboka ya Jehowa oma ko tɔkɛndakɛnda tawɔ.
Kânga mbele Satana ‘ekɔ lo minganyiya anto wa lo nkɛtɛ k’otondo,’ Jehowa ekɔ lo mɛnya ekambi ande wa kɔlamelo mboka kahombawɔ kɛndakɛnda. (Eny. 12:9; Is. 30:21) Pokamɛ la yambalo tshɛ alako w’oma le nde ndo mbakitanyiya lo nsɛnɔ yaso ayotokonya akanga a tomba, ayotela ɔngɛnɔngɛnɔ ndo ayotɔtɔla otsha lo lɔsɛnɔ la pondjo.—Tuk. 8:32-35.