Vidɛo yele l’ɔtɛ a dui ɔnɛ: Les jeunes s’interrogent... Que vais-je faire de ma vie ? (Etenyi 1)
Etena katole ɛlɔngɔlɔngɔ la esekaseka dia nkoma epalanga, vɔ pombaka mbɔsa tɛdikɔ t’ohomba efula. Dia mbakimanyiya, vidɛo yele l’ɔtɛ a dui ɔnɛ: Les jeunes s’interrogent... Que vais-je faire de ma vie ? yakalɔngɔswama lo dikambo diawɔ. Kam’adjayɛ DVD ko wɛ mbɔtɔ lo Drame, oma lâsɔ enda kana wɛ kokaka nkadimola ambola wele l’odingɔ 2. L’ɔkɔngɔ wa wɛ nsɔna Interviews lo menu principal, ko wɛ mina Souvenirs, ndo hemba dia nkadimola ambola wele l’odingɔ 3.
Drame: 1) L’awui akɔna wafɔna Timɔte la ɛlɔngɔlɔngɔ efula w’Akristo ɛlɔ kɛnɛ? 2) Ngande wakasɛngiyama André dia monga ɔkɛnyi wa tɔkɛnyɔ wa lokumu? 3) Kakɔna kakatɛ ɔnangɛso Fleissig André lo kɛnɛ kendana la a) ndjakimɔ le Jehowa kana lo tɔkɛnyɔ? (Mat. 6:24) b) kiɔkɔ y’ɔngɛnɔngɛnɔ wa mɛtɛ? c) kɛnɛ kakawoholaka dɔnga diande di’oma lo mpango ka lokanu? d) anto waki la nde lo foto nde la wadɛnde? e) mbeya kana nde ekɔ la lonyangu lo woho wakandatshikitanya eyango waki la nde lo lɔsɛnɔ? (Flpɛ. 3:8) 4) Ngande wakakadimola tshɛnde la André ka womoto lo dimbola diande di’ɔnɛ: “Onde ekɔ kɔlɔ dia dimi nkoma ondawi wa lowango wa manamana?” (Luka 4:5-7) 5) Onde etshumba wakadje André lo ndawɔ lowango wakawosha ɔngɛnɔngɛnɔ wa mɛtɛ? 6) Kakɔna kakayangɛnangɛna lo kɛnɛ kendana la mukanda w’ekomelo wakatomɛ ɔnangɛso Fleissig André? (Tok. 10:22) 7) Ɔnangɛso Fleissig akakimanyiya André dia mbishola na?
Souvenirs: 8) Elimu akɔna wakawesaka anangɛso la akadiyɛso dia nkamba, ndo lande na? 9) Naa etombelo w’ɛlɔlɔ wakawakondja? 10) Kakɔna kakakimanyiya onto l’onto dia ntshikitanya olimu ande? (2 Kɔr. 5:15) 11) Naa elimu wa teokrasi wakawayokambaka lo dihole dia wɛnɛ wakawakambaka ntondo, ndo lande na kakawashihodia dia hawokoke mbesa eyango wa l’emunyi ndo wa lo nyuma mbala kakɔ ɔtɔi? 12) Onde vɔ wekɔ la lonyangu lo woho wakawatshikitanya eyango waki la wɔ lo lɔsɛnɔ? 13) Dui diakɔna dia lânde diakawate diakotshutshuya dia wɛ nkana yimba lo kɛnɛ kahombayɛ nsala la lɔsɛnɔ layɛ?
Lam’alanganyu, katotende ɛkɔnya ndo awui akina wa lo DVD nɛ dia sho ndjalɔngɔsɔla dia ndjosha kɔmatɛrɛ lo ɔkɛtshanyelo wayosalema lo Losanganya l’olimu la lomingu layaye.