“Ndi atushaka one lambokomo wulu”
1 Sho tshɛ kɔmɔka mbala la mbala. Sho kɔmɔka aha tsho l’ɔtɛ w’olimu ɔmɔtshi wambotokamba, koko ndo l’ɔtɛ w’ekakatanu wahomana la so lo ‘tena nɛ dia pâ dia wolo mbikikɛ.’ (2 Tim. 3:1) Oko weso ekambi waki Jehowa, ngande wakondjaso wolo wa lo nyuma wahombama diaha sho kitshakitsha olimu aso w’esambishelo? Sho kondjaka wolo lo ndjaɛkɛ le Jehowa, ɔnɛ ‘loludi tɔɔ la wolo.’ (Is. 40:26) Nde mbeyaka ehomba aso ndo nangaka mɛtɛ dia tokimanyiya.—1 Pet. 5:7.
2 Tɛdikɔ takɔshi Jehowa dia tokimanyiya: Jehowa toshaka wolo oma lo ekimanyielo ka nyuma kande k’ekila, mbuta ate wolo waheme tshɛ wakakambe lande dia tonga andja. Nyuma kaki Nzambi tokimanyiyaka dia ‘nyomokondja wolo’ naka tambɔlɛmba. (Is. 40:31) Yambola wate: ‘Etena kakɔna k’ekomelo kakamalɔmbɛ dia nyuma k’ekila keketshami dia dimi mbeya kotsha ɛkɛndɛ ami w’Okristo?’—Luka 11:11-13.
3 Naka sho mbadiaka ndo kanaka yimba la Ɔtɛkɛta wa Nzambi wakasambiyama lushi la lushi ndo ndɛka mbala la mbala lo nyuma oma lo ekimanyielo ka wekelo wa mbala la mbala w’ekanda aso w’Akristo, kete tayokoma oko “utamba wakawune lasuki l’ekedi w’ashi, watotokaka elua awo lu deku diawo. Nduku dikatshi diawo diatolengelaka.”—Osam. 1:2, 3.
4 Jehowa kambaka nto l’asekaso ambetawudi wakoka monga ‘ekimanyielo kakeketsha’ le so. (Kol. 4:10, 11) Vɔ tokeketshaka lo nsanganya ya lo etshumanelo oma lo asawo awɔ wakeketsha, oma lo kɔmatɛrɛ ndo oma lo asawo washawɔ la ntondo ka etshumanelo. (Etsha 15:32) Lo yoho ya lânde, dikumanyi di’Akristo tokimanyiyaka ndo tokeketshaka lo nyuma.—Is. 32:1, 2.
5 Olimu w’esambishelo: Tatotshikake dia sambisha naka tamboyaoka dia tambɔkɔmɔ! Otshikitanyi la elimu ekina efula, esambishelo ka mbala la mbala tokeketshaka mɛtɛ. (Mat. 11:28-30) Sambisha lokumu l’ɔlɔlɔ tokimanyiyaka dia sho mbidja yimba yaso tshɛ lo Diolelo dia Nzambi ndo namaka pondjo lo yimba ɛtshɔkɔ wa diambo wayotela diolelo diakɔ.
6 Tekɔ l’olimu efula wa sala la ntondo ka dikongɛ nɛ dia kɔlɔ ndanyema. Tekɔ la ɛkɔkɔ wa tshikala nge lo olimu aso, lo ‘ndjaɛkɛ lo wolo watosha Nzambi.’ (1 Pet. 4:11) La ekimanyielo kaki Jehowa, tayoshidiya olimu aso nɛ dia “ndi atushaka one lambokomo wulu.”—Is. 40:29.