Jehowa atoshaka ɔnɛ lambɔkɔmɔ wolo

“[Jehowa] atushaka one lambokomo wulu. Ndi atufudiayaka one lamboko la yimba ntshimba wulu.”​—ISAYA 40:29.

1. Lembetshiya wolo wele lo diangɔ diakatonge Nzambi.

NKUDU ka Jehowa kema l’elelo. Ndo wolo w’efula wekɔ lo diangɔ diakandatonge! Kiamakama yoleki tshɛ tshitshɛ yelɛwɔ atomɛ mbakenga oseka ɛngɔ tshɛ, yɔ yekɔ tshitshɛ yamboleka woho ɔnɛ wele dipɔpɔ di’ashi ɔtɔi diekɔ la miliyara lokama mbala miliyara y’atomɛ.a Ɛngɔ tshɛ kele la lɔsɛnɔ lanɛ la nkɛtɛ mendɛka lo wolo walongola atomɛ oma lo wonya. Lâsɔ, yɛdikɔ yakɔna y’esase kana wolo watondja wonya weso l’ohomba dia sukɛ nsɛnɔ ya diangɔ diasɛna lanɛ la nkɛtɛ na? Nkɛtɛ nongolaka paka yema tshitshɛ tsho lo miliyara y’esase kana wolo watodja wonya. Koko, Sir Fred Hoyle ombewi ɔmɔtshi w’akumi ekɔ lo mbuta lo dibuku diande dimɔtshi (Astronomy) ate: “Yema y’esase kana wolo wa Wonya wakoma lanɛ la nkɛtɛ . . . ndeka esase kana welo wa dja wakamba l’anto lo waa uzinɛ wa l’andja w’otondo mbala 100 000.”

2. Naa dikambo di’ohomba diatama lo Isaya 40:26 lo kɛnɛ kendana la nkudu ka Jehowa?

² Nkudu k’efula kele la Jehowa tambiyaka heyama lam’akanyiyaso oyadi lo dikambo di’atomɛ kana di’andja ɔnɛ wa woke woke wakandatonge. Diɔ diakɔ diakandakoke mbuta ate: “Nyedia ashu anyu utsha l’ulungu, nyendi one lakatungi diango ne, latuditundjaka l’elui adio. Ndi atudietaka dio tshe kumbu. Uma lu wuki wa wulu andi, ndu uma lu khudu kandi k’utamanya, mbakidio kumpumbama nduku otoi”! (Isaya 40:26) Eelo, Jehowa ekɔ la ‘nkudu k’efula’ ndo nde mbele Kiɔkɔ ya “wuki wa wulu” wakakambe lande dia tonga andja ɔnɛ w’otondo.

Tekɔ l’ohomba wa wolo woleki wɔnɛ wokongaka l’onto

3, 4 (a). Naa akambo amɔtshi wakoka tɔlɛndja? (b) Wembola akɔna wasungana sho sɛdingola?

³ Etena kɛnɛ kele Nzambi ekɔ la nkudu kaha l’elelo, anto lo wedi awɔ nɛmbaka. Dihole tshɛ diatshɔso, sho mɛnaka anto wambɔlɛmba. Vɔ mbetɔka l’ɔlɛmbɛlɔ, tshɔka l’olimu kana la kalasa l’ɔlɛmbɛlɔ, kawolaka la ngelo l’ɔlɛmbɛlɔ, ndo tshɔka tolala aha paka l’ɔlɛmbɛlɔ oto koko alemba ndjalaka paka yɛkɛ. Amɔtshi kombolaka tshɔ dihole dimɔtshi diakokawɔ tomuya efula. Sho lawɔ nɛmbaka kânga mbeso ekambi wa Jehowa, diɔ diakɔ diele lɔsɛnɔ laso l’anto wamboyakimɔ le Nzambi tɔlɔmbaka dia mbidja welo efula. (Mako 6:30, 31; Luka 13:24; 1 Timote 4:8) Ndo ekɔ akambo akina efula watɔlɛndja.

⁴ Sho hatohandwe oma l’ekakatanu wakomɛ anto tshɛ, kânga mbeso Akristo. (Jobo 14:1) Hemɔ, wola wa falanga, kana ekakatanu ekina wa lo lɔsɛnɔ kokaka tɔkɔmɔla otema lo menda etombelo wa kɔlɔ wele l’akambo asɔ. Lâdiko w’ekakatanu ɛsɔ sho pomanaka nto l’ehemba wa wolo wahomana la wanɛ wahɛnyahɛnyama l’ɔtɛ w’akambo w’ɔlɔlɔ. (2 Timote 3:12; 1 Petero 3:14) L’ɔtɛ w’ekakatanu wa lushi la lushi w’oma l’andja ɔnɛ ndo ɔlɔshamelo wahomana la so l’olimu aso w’esambishelo ka Diolelo, amɔtshi l’atei aso mbeyaka nɛmba polo ndo lo ndjotatɛ nɛngɔla demba l’olimu wa Jehowa. Ndo nto, Satana Diabolo ekɔ lo kamba la kɛnɛ tshɛ kele lande dia toshishɛ kɔlamelo yaso le Nzambi. Lâsɔ, ngande wakokaso kondja wolo wa lo nyuma weso l’ohomba di’aha sho nɛmba ko ndjotshika olimu aso na?

5. Bonde keso l’ohomba wa wolo woleki w’ɔnɛ wokongaka l’onto dia sho tetemala l’olimu aso w’Okristo?

⁵ Dia sho kondja wolo wa lo nyuma, sho pombaka ndjaɛkɛ le Jehowa, Otungi wakiso woludi la nkudu tshɛ. Ɔpɔstɔlɔ Paulo akate dia, oko weso kema kokele, dia sho kamba olimu aso w’Okristo sho la dia monga la wolo woleki wɔnɛ wokongaka l’onto. Nde akafunde ate: “Keli shu teko la diango ne dia mumba lu dikitshelu dia kete, ne dia wuki a wulu utamanya ayali uma le [Nzambi].” (2 Koreto 4:7) Akristo w’akitami wekɔ lo tetemala ‘la olimu wa diokanyelo’ l’ekimanyielo ka anyawɔ wanɛ wele l’elongamelo ka nsɛna lanɛ la nkɛtɛ. (2 Koreto 5:18; Joani 10:16; Enyelo 7:9) Lam’ele sho anto wele kema kokele tekɔ lo kamba olimu waki Nzambi l’atei w’ɔlɔshamelo, sho hatokoke ntondoya olimu akɔ la wolo aso shamɛ. Jehowa tokimanyiyaka la nyuma kande k’ekila, ɔnkɔnɛ wɛɔdu aso tombolaka nkudu kande. Ndo sho keketshamaka efula lo eshikikelo kele laso ɔnɛ “[Jehowa] atusukelaka antu w’ololo”!​—Osambu 37:17.

‘Jehowa mbele wolo wakiso’

6. Ngande watoshikikɛ Afundelo ɔnɛ Jehowa mbele Kiɔkɔ ya wolo aso?

⁶ Shɛso lele l’olongo ekɔ la ‘nkudu k’efula’ ndo nde kokaka tokeketsha esadi eto. Diakɔ diatotɛ Bible ɔnɛ: “[Jehowa] atushaka one lambokomo wulu. Ndi atufudiayaka one lamboko la yimba ntshimba wulu. Akenda w’apami watokomoka, watuhekoka. Ndu elongo w’apami watukitaka huhakayi. Keli wane watukungelaka [Jehowa] watuludiamaka la wulu w’uyuyu. Vo watufumboka uku fudu ya pungu. Vo watulawoka, ku hawuheko, watokendakendaka, ku hawokomo.” (Isaya 40:29-31) L’ɔtɛ w’efukutanu watafulanɛ tsho, sho koka esangɔ ɛmɔtshi ndjaoka oko ondawi wambɔlɛmba, wele ekolo ande hawoyokoka mbokonya nto etale. Koko, hatohombe mpekɔ lam’ele tatakome l’oshidi w’ekomelo wa lowango l’otsha lo lɔsɛnɔ latatalawɔ. (2 Ekondo 29:11) Otunyi aso Diabolo ekɔ lo pangiya ‘oko tambwɛ kadikita,’ ndo nde nangaka temadja. (1 Petero 5:8) Tohɔ dia ‘Jehowa ekɔ wolo ndo longele lakiso,’ ndo nde ambɔsa tɛdikɔ efula dia ‘mbisha ɔnɛ lambɔkɔmɔ wolo.’​—Osambu 28:7.

7, 8. Kakɔna katoshikikɛ ɔnɛ Jehowa akakeketsha Davidi, Habakuka, la Paulo na?

⁷ Jehowa akasha Davidi wolo waki lande ohomba dia tetemala kânga l’atei wa wekamu wa wolo. La mbetawɔ ndo l’eshikikelo k’efula, Davidi akafunde ate: ‘Oma le Nzambi mbayotokondja wolo, ndo nde ndamɛ ayotɔlɛndjɛ atunyi aso.’ (Osambu 60:12) Jehowa akasha nto Habakuka wolo wa nde mbeya kotsha olimu ande w’omvutshi. Habakuka 3:19, mbutaka ɔnɛ: “[Jehowa], Khumadiondjo, eko wulu ami. Ndi ateteka ekulu ami esadi uku ekulu wa lufumbo. Ndi ayonkendjakendja lu ahuli ami wa ladiku.” Ɛnyɛlɔ kekina k’oshika ele kaki Paulo, ɔnɛ lakafunde ate: “Dimi mbeyaka ntsha akambu tshe la wulu wa one latunkikitshaka.”​—Filipi 4:13.

⁸ L’ɛnyɛlɔ kaki Davidi, Habakuka, la Paulo, sho pombaka monga la mbetawɔ lo dikoka diele la Nzambi dia tosha wolo ndo lo nkudu kele lande ka toshimbɛ. Lo mbeya dia Jehowa Nkum’Olongo mbele Kiɔkɔ ya ‘wolo aso,’ nyɛsɔ tɔsɛdingole kakianɛ toho tɔmɔtshi takokaso kondja wolo wa lo nyuma oma lo tɛdikɔ kana ɛlɔngɔswɛlɔ efula waki Nzambi.

Mbo ya ndɛ ya lo nyuma dia tosha wolo

9. Ohomba akɔna wele l’ekanda w’Akristo lo kɛnɛ kendana l’olelo wakiso?

⁹ Wekelo w’etete w’Afundelo oma l’ekimanyielo k’ekanda w’Akristo kokaka tosha wolo ndo tosukɛ. Omembi w’esambo akembe ate: “[Diɛsɛ le Untu . . . latongenangenaka lu elembe wa [Jehowa]; latukanaka yimba dia elembe ako ndu la yanyi ndu l’utshu. Ndi eli uku utamba wakawune lasuki l’ekedi w’ashi, watotokaka elua awo lu deku diawo. Nduku dikatshi diawo diatolengelaka. Lu akambu tshe watshandi, ndi atongonaka.” (Osambu 1:1-3) Oko wahombaso ndɛ dia monga la demba dia wolo, mbeso l’ohomba wa ndɛ mbo ya lo nyuma yatosha Nzambi oma l’ekimanyielo k’Ɔtɛkɛta ande ndo k’ekanda w’Akristo dia sho ndjala la lonyuma la wolo. Diakɔ mbele, ekɔ ohomba sho mbekaka dimɛna ndo kanaka yimba l’awui wekaso.

10. Etena kakɔna kakokaso tana wonya wa mbeka ndo wa kana yimba?

¹⁰ Tayokondja mɛtɛ difuto naka sho kana yimba lo ‘akambo waki Nzambi woshami etale.’ (1 Koreto 2:10) Ko etena kakɔna kakokaso tana etena ka kanaka yimba na? Isaka w’ɔnaki Abarahama ‘akatshu dikɔlɔ dimɔtshi l’ekambɔ dia takanaka yimba.’ (Etatelu 24:63-67) Omembi w’esambo Davidi ‘akakanaka yimba l’awui wendana la Nzambi l’otsho.’ (Osambu 63:6) Sho kokaka mbeka Ɔtɛkɛta waki Nzambi ndo kanaka lawɔ yimba la pindju, la dikɔlɔ, l’otsho, mbut’ate wonya tshɛ. Wekelo ndo okanelo wa yimba wa ngasɔ tokonyaka lo yɛdikɔ kina ya lo nyuma yɔsa Jehowa dia tokeketsha, yɛdikɔ yakɔ ko: dɔmbɛlɔ.

11. Bonde kele ekɔ ohomba efula nɔmbaka mbala la mbala?

¹¹ Naka tayɔlɔmbaka Nzambi mbala la mbala, kete nde ayotokeketsha. Lâsɔ, nyɛsɔ ‘totetemalake lo dɔmbɛlɔ.’ (Romo 12:12) Tena dimɔtshi, sho pombaka nɔmba lo yoho ya lânde dia kondja lomba ndo wolo weso l’ohomba dia tondoya ohemba ɔmɔtshi. (Jakoba 1:5-8) Nyɛsɔ tandolake ndo totombolake Nzambi etena kɛnaso ekotshamelo k’asangwelo ande ndo kɛnaso dia nde ambotokeketsha dia sho tetemala l’olimu ande. (Filipi 4:6, 7) Naka sho ndjasukanyaka la Jehowa lo dɔmbɛlɔ, kete nde hatokalɛki pondjo. Davidi akembe ate: ‘Enda, Nzambi mbele okimanyedi ami.’​—Osambu 54:4.

12. Bonde kahombaso nɔmba Nzambi nyuma kande k’ekila?

¹² Shɛso lele l’olongo tokeketshaka ndo toshaka wolo l’ekimanyielo ka nyuma kande k’ekila, kana wolo wakamba olimu. Paulo akafunde ate: “Dia dikambu ne, mbakhuselami Shesu adui. . . . Dia ndi nyusha uku eli ongonyi a lutumbu landi, dia nyu nkikitshama la wulu w’uma le Nyuma kandi l’utema w’untu.” (Efeso 3:14-16) Sho pombaka nɔmba dia kondja nyuma k’ekila, l’eshikikelo ɔnɛ Jehowa ayotoshatɔ. Yeso akate ate: Lam’alɔmba ɔna dikɛnda lose, onde she ka ngandji ayowosha oluyi? Keema. Diakɔ diakandadihiya ate: “Okone, naka nyu, antu wa kolo, mbeyaka mbisha an’anyu eshasha w’ololo, Shenyu le l’ulungu huleka mbisha wane wôlomba [nyuma k’ekila]?” (Luka 11:11-13) Nyɛsɔ tɔlɔmbake l’eshikikelo ka ngasɔ ndo tohɔke nshi tshɛ dia ekambi wa kɔlamelo waki Nzambi kokoka ‘kondja wolo’ la nkudu lo tshimbo ya nyuma kande.

Etshumanelo kekɔ ehomɔ kɛmɔtshi katokeketsha

13. Ngande wahombaso mbɔsa nsanganya y’Akristo?

¹³ Jehowa tokeketshaka l’ekimanyielo ka nsanganya ya l’etshumanelo k’Akristo. Yeso akate ate: “Ne dia lene asangana ahendi kana asatu lu lukumbu lami, dimi ndjalaka l’atei awo.” (Mateu 18:20) Lam’akasha Yeso daka sɔ, nde akatɛkɛtaka akambo wahomba wanɛ walɔmbɔla etshumanelo mbidja yimba. (Mateu 18:15-19) Ɔnkɔnɛ, ɛtɛkɛta ande ɛsɔ mendanaka la nsanganya yaso tshɛ, oyadi ya totshitshɛ kana ya weke, yele yɔ tshɛ tatɛka ndo komɛka la dɔmbɛlɔ lo lokombo lande. (Joani 14:14) Diakɔ mbele, ekɔ diɛsɛ mbɔtɔka lo weho wa nsanganya y’Akristo shɔ, oyadi anto yema tshitshɛ kana nkama mbele lɔkɔ. Lâsɔ, nyɛsɔ tɛnyake lowando laso lo waaso asɔ wakalɔngɔswama dia tokeketsha lo nyuma ndo totshutshuya lo ngandji ndo l’elimu w’ɔlɔlɔ.​—Heberu 10:24, 25.

14. Ɛlɔlɔ akɔna wakondjaso oma lo welo wadja dikumunyi di’Akristo?

¹⁴ Dikumanyi di’Akristo mbishaka ekimanyielo ndo ekeketshelo ka lo nyuma. (1 Petero 5:2, 3) Paulo akakimanyiya ndo akakeketsha tshumanelo diakandembolaka, oko wasala emendji w’eteta ɛlɔ kɛnɛ. Diakɔ diakandalongamɛka sangana kamɛ l’anyande ambetawudi woho wa vɔ tokeketshanya. (Etsha 14:19-22; Romo 1:11, 12) Tɛnyake nshi tshɛ lowando laso le dikumanyi dia l’etshumanelo kaso ndo le emendji ekina w’Akristo, wanɛ wele l’ɔkɛndɛ wa woke wa ntokeketsha lo nyuma.

15. Ngande wɛnamande dia anyaso ambetawudi wa l’etshumanelo wekɔ ‘ehomɔ k’ekeketshelo’?

¹⁵ Anyaso ambetawudi wakenga etshumanelo kaso kokaka monga ‘ehomɔ k’ekeketshelo.’ (Kolosai 4:10, 11) Oko wewɔ ‘angɛnyi w’eshika’ vɔ kokaka tokimanyiya lo tena di’asui. (Tukedi 17:17) Oko ɛnyɛlɔ, lam’akatshungɔ ekambi waki Nzambi 220 oma lo pango ka lokanu ka la Sachsenhausen l’ɔnɔnyi wa 1945, lo nshi yakalɔmbɔlaka aseka Nazi, vɔ wakahombe minda lɔkɛndɔ la kilɔmɛtɛlɛ 200. Vɔ wakande lɔkɛndɔ lɔsɔ l’olui, ndo wanɛ waki la wolo efula wakayakotolaka wanɛ wakaleke nɛmba lo pusupusu ya totshitshɛ. Etombelo akɔna wakonge na? Lo lɔkɛndɔ lɔsɔ lakavu anto ndekana 10 000 wanɛ wakasɛnaka lo pango ɔtɔi ka lokanu, ndoko Ɔmɛnyi wa Jehowa ɔtɔi wakavu. Ɛkɔndɔ wa weho ɛsɔ watomba l’ekanda waki Société, mbidja ndo Annuaire des Témoins de Jéhovah la dibuku Les Témoins de Jéhovah : Prédicateurs du Royaume de Dieu, mɛnyaka dia Nzambi mbishaka ekambi ande wolo di’aha vɔ mpekɔ.​—Ngalatiya 6:9.b

Olimu wakiso w’esambishelo tokeketshaka

16. Ngande wakeketshamaso lo nyuma lo sambishaka mbala la mbala?

¹⁶ Sho keketshamaka lo nyuma lam’atombaso mbala la mbala l’olimu w’esambishelo ka Diolelo. Olimu ɔsɔ tokimanyiyaka dia mbika washo aso lo Diolelo diaki Nzambi aha la mbohɛ lɔsɛnɔ la pondjo ndo ɛtshɔkɔ watokongɛ. (Jude 20, 21) Alaka wa l’Afundelo watatewoya anto l’olimu aso toshaka elongamelo ndo kokaka tokeketsha oko omvutshi Mika, ɔnɛ lakate ate: ‘Sho . . . tayɔkɛndakɛndaka lo lokombo la Jehowa Nzambi kaso pondjo pondjo.’​—Mika 4:5.

17. Alako akɔna wambowotosha lo kɛnɛ kendana l’anto weka la so Bible?

¹⁷ Diɔtɔnganelo diasaso la Jehowa keketshamaka lam’akambaso efula l’Afundelo dia mbetsha anto akina. Oko ɛnyɛlɔ, lam’ekaso l’onto Bible l’ekimanyielo ka dibuku Ewo Katɔla Otsha lo Lɔsɛnɔ la Pondjo, ekɔ ɔlɔlɔ mbadia ndo kɛtshanya avɛsa amɔtshi woshilami. Dikambo sɔ kimanyiyaka ombeki ndo keketshaka eokelo kaso ka lo nyuma. Naka ombeki ekɔ l’okakatanu dia shihodia kanyi kana ɛnyɛlɔ kɛmɔtshi ka lo Bible, nyu mbeyaka mbeka tshapita ɔtɔi ya lo dibuku Ewo olekanyi mbala ɔtɔi. Ekɔ mɛtɛ ɔngɛnɔngɛnɔ sho ndjalɔngɔsɔlaka dimɛna ndo sala la wolo dia kimanyiya anto akina dia vɔ ndjasukanya la Nzambi!

18. Ɛnya woho wa kamba dimɛna la dibuku Ewo.

¹⁸ Ɔnɔnyi tshɛ, tekɔ lo kamba la dibuku Ewo l’ɔlɔlɔ tshɛ dia kimanyiya nunu di’anto woho wa vɔ koma ekambi waki Jehowa, l’atei w’anto asɔ mbele ndo wanɛ wele haweye Bible kânga yema. Ɛnyɛlɔ, lam’akinde êke dikɛnda, pami kɛmɔtshi ka lo wodja wa Sri Lanka kaki Hindu akoke Ɔmɛnyi ɔmɔtshi wa Jehowa wa womoto atɛkɛta dia Paradiso. Ɛnɔnyi ɛmɔtshi l’ɔkɔngɔ, nde akaye le Ɔmɛnyi wa Jehowa ɔsɔ, ndo aha la tshimbatshimba, om’aki Ɔmɛnyi wa Jehowa ɔsɔ akamɛ mbeka Bible la pami kɛsɔ. Ɔlɔngɔ wa pami ɔsɔ akayaka lushi tshɛ dia ndjeka, ndo kombeta edja nde akashidiya mbeka dibuku Ewo. Nde akamɛ mbɔtɔ lo nsanganya tshɛ, akahembola losambi la ɔtɛmwɛlɔ ande wa ntondo, ndo akakome opandjudi wa Diolelo. Lam’akandabatizama, ko nde ambotatatɛka mbeka Bible nde l’ɔngɛnyi ande ɔmɔtshi.

19. Kakɔna kakokaso ndjashikikɛ naka sho nyanga ntondotondo Diolelo?

¹⁹ Nyanga ntondotondo Diolelo toshaka ɔngɛnɔngɛnɔ watokeketsha. (Mateu 6:33) Kânga mbahomanaso l’ehemba efula, sho tetemalaka sambisha lokumu l’ɔlɔlɔ l’ɔngɛnɔngɛnɔ ndo l’ohetoheto. (Tito 2:14) Efula l’atei aso kotshaka kɛnɛ kalɔmbama dia kamba olimu w’ombatshi mboka wa pondjo, ndo akina wekɔ lo kamba l’ahole wele ohomba w’apandjudi wekɔ efula. Oyadi lo yoho yakɔna yakambaso l’ɔngɛnɔngɛnɔ tshɛ dia tɔla wahɔ wa Diolelo otsha la ntondo, sho mbetawɔka ɔnɛ Jehowa hatohɛ olimu aso ndo ngandji kɛnyaso lo lokombo lande.​—Heberu 6:10-12.

Totetemale kamba lo wolo wa Jehowa

20. Ngande wakokaso mɛnya dia sho mendɛka le Jehowa dia kondja wolo?

²⁰ L’otema aso tshɛ, nyɛsɔ tɛnya dia tekɔ lo nongamɛ le Jehowa ndo tekɔ lo mendɛ le nde dia nde tosha wolo. Sho kokaka sala ngasɔ lo kamba dimɛna la mbo ya lo nyuma yatoshande lo tshimbo y’‘ɔhɔmbɔ wa kɔlamelo.’ (Mateu 24:45) Wekelo w’onto ndamɛ ndo wa l’etshumanelo w’Ɔtɛkɛta waki Nzambi oma l’ekimanyielo k’ekanda w’Akristo, alɔmbɛlɔ w’oma k’ɛs’otema, ekimanyielo ka lo nyuma k’oma le dikumanyi, bɛnyɛlɔ di’ɔlɔlɔ diaki anyaso ambetawudi wele la kɔlamelo, ndo esambishelo ka lushi la lushi wekɔ l’atei wa tɛdikɔ takeketsha diɔtɔnganelo diasaso la Jehowa ndo tɛdikɔ tɔsɔ toshaka wolo wa tetemala l’olimu aso.

21. Ngande wakɛnya ɔpɔstɔlɔ Paulo nde la Petero ohomba wa wolo w’oma le Nzambi?

²¹ Kânga mbeso wɔdu, Jehowa ayotokeketsha dia sala lolango lande naka sho ndjaɛkɛ le nde dia nde tokimanyiya. Lo mbeya ohomba w’ekimanyielo kɛsɔ, Petero akafunde ate: “Naka untu atutaka diui, ati uku atandi aui wa [Nzambi]; naka untu atukambelaka akina ulimu, atshi la wulu watuwushaka [Nzambi].” (1 Petero 4:11) Ndo Paulo akɛnya woho wakandayaɛkɛka lo wolo washa Nzambi lam’akandate ate: “Okone dimi latongenangenaka lu wodu, lu tengo, lu ehumba, lu asui, lu lokonyo, dia dikambu dia Kristu; ne dia lam’emi wodu kemi la wulu.” (2 Koreto 12:10) Nyɛsɔ tonge la mbetawɔ ka ngasɔ ndo totombole Jehowa Nkum’Olongo, ɔnɛ lasha wanɛ wambɔkɔmɔ wolo.​—Isaya 12:2.

[Nɔtɛ ya l’ɛse ka dikatshi]

Ngande wayoyokadimola?

• Bonde kele ekambi waki Jehowa wekɔ l’ohomba wa wolo woleki wɔnɛ wokongaka l’onto?

• Naa bɛnyɛlɔ dia l’Afundelo diɛnya dia Nzambi mbishaka ekambi wakinde wolo?

• Naa tɛdikɔ tɔmɔtshi ta lo nyuma takɔshi Jehowa dia tokeketsha na?

• Ngande wakokaso mɛnya dia sho mendɛka le Jehowa dia kondja wolo?

[Osato wa lo lɛkɛ 22]

Diɔtɔnganelo diele lam’asaso la Jehowa keketalaka lam’akambaso la Bible dia mbetsha anto akina