Nyetsha ananyu dia vɔ tombola Jehowa
1. Onde ana w’akɛnda kokaka tombola Jehowa?
1 Osambu 148:12, 13 keketshaka akɛnda dia vɔ ‘tombola lokombo la Jehowa.’ Afundelo ndola la bɛnyɛlɔ di’ana w’akɛnda wakasale dui sɔ. Ɛnyɛlɔ, “Samuele akatshaka ulimu la ntundu ka [Jehowa] eki dikenda.” (1 Sam. 2:18) “Dikenda dimotshi dia umuntu” mbakatɛ wadi aki Namana dia ɔprɔfɛta waki Jehowa waki l’Isariyɛlɛ akakoke kɔnɔya Namana oma lo sudi kande. (2 Khum. 5:1-3) Etena kakɔtɔ Yeso lo tɛmpɛlɔ ndo kakandasale awui wa mamba, “akenda” mbakahangɔhangɔ vate: “Hosana le Kanula ya Davidi.” (Mat. 21:15) Ngande wakoka ambutshi mbetsha anawɔ dia tombola Jehowa?
2. Lande na kele ekɔ ohomba efula di’ambutshi mbisha anawɔ ɛnyɛlɔ k’ɔlɔlɔ?
2 Oma lo ɛnyɛlɔ: La ntondo ka vɔ kɔkɔmiya akambo wa mɛtɛ lo etema w’anawɔ, ambutshi w’apami w’ase Isariyɛlɛ wakadjangemɛ ntondotondo dia vɔ mboka Jehowa ngandji ndo nama wadjango ande lo etema awɔ hita. (Euh. 6:5-9) Naka nyu tɛkɛtaka dikambo di’olimu w’esambishelo lo yoho yakeketsha ndo mbidjaka olimu akɔ l’ekongelo kanyu ka lomingu la lomingu, kete ananyu wayɔsa olimu w’esambishelo oko dui di’ohomba efula ndo diasha ɔngɛnɔngɛnɔ.
3. Ɛlɔlɔ akɔna wakakondja kadiyɛso kɛmɔtshi oma lo ɛnyɛlɔ k’ambutshi ande?
3 Kadiyɛso kɛmɔtshi mbutaka ɔnɛ: “Etena kakamayolaka, nkumbo kaso kaki la mbekelo ka tombaka l’esambishelo wikɛndɛ tshɛ. Lakakoke mɛna dia ambutshi ami wakangɛnangɛnaka mɛtɛ sambisha. Takole la kanyi y’ɔnɛ olimu w’esambishelo ekɔ dui diasha onto ɔngɛnɔngɛnɔ.” Kadiyɛso kɛsɔ akakome opandjudi wahatabatizama lam’akinde la ɛnɔnyi esambele ndo ɔnɛ mbele ɔnɔnyi 33 wende lo olimu wa lo tena tshɛ.
4. Kakɔna kalembetshiya mbetshaka ana yema yema?
4 Wetshelo wa yema yema: Etena kasambishanyu la ananyu, nyosale la wolo dia vɔ sala dui dimɔtshi. Ondo vɔ kokaka kɔkɔla lo soko di’onto ɔmɔtshi, mbisha onto traktɛ kana mbadia divɛsa dimɔtshi. Dui sɔ ndekaka mbasha ɔlɔ ndo mbakimanyiyaka dia vɔ ndjaɛkɛ lo akoka awɔ wa sambisha losango la Diolelo. Etena kayowola, vɔ wayolekaka ndjasha l’olimu w’esambishelo. Ɔnkɔnɛ, nyâkimanyiya dia vɔ pama ndo dia vɔ ndjadjɛ eyango wa lo nyuma.
5. Kakɔna kahombama di’ɔna koma opandjudi wahatabatizama?
5 Etena kɛnanyu dia ananyu wambokoka koma apandjudi wahatabatizama ndo wekɔ la nsaki ka sala dikambo sɔ, tanyotshimbatshimbake dia sawola la dikumanyi. Etena kakoma ana apandjudi, vɔ wayoyaoka dia wekɔ l’ɔkɛndɛ wa vɔ vɔamɛ tombola Jehowa. Tanyohɛke dia ɔnanyu kema l’ohomba wa mbeya awui efula oko epalanga wambobatizama la ntondo ka nde kotsha kɛnɛ kahombama. Onde ɔnanyu shihodiaka wetshelo w’etatelo wa lo Bible? Onde nde kitanyiyaka atɔndɔ wa lo Bible wendana la lɔkɛwɔ? Onde nde nangaka sambisha ndo monga Ɔmɛnyi wa Jehowa? Naka ɔsɔku, kete dikumanyi mbeyaka shikikɛ dia kana nde ambokoka koma opandjudi wahatabatizama.—Enda Tamboyakongɛ dia sala lolango la Jehowa, lɛkɛ 79-82.
6. Lande na kele ekɔ ohomba dia ambutshi mbetsha anawɔ?
6 Pombaka mbidja welo dia mbetsha ana dia vɔ tombola Jehowa oma k’ɛse etema awɔ. Koko, kɛnɛ kaleka mbisha ambutshi ɔngɛnɔngɛnɔ ele mɛna anawɔ watahame lo nyuma. Kɛnɛ koleki ohomba ele, Jehowa ngɛnangɛnaka etena kɛnande ana wewoya anto akina etsha ande wa mamba.