Ambutshi: Nyolowanya Ananyu Woho Wa Vɔ Sambisha
1 Tshumanelo diaso diekɔ l’ɔngɛnɔngɛnɔ dia monga l’ana efula l’atei adiɔ wele la saki mɛtɛ ka kambɛ Nzambi. (Und. 12:1) Vɔ wekɔ l’ɔnɔngɔ w’anto walongola leeta la tombola Jehowa. (Osam. 148:12-14) Diɔ diakɔ diele olowanyelo walowanya ambutshi anawɔ lushi la lushi pomboka monga ndo wɔnɛ wa mbâlɔngɔsɔla lo vɔ mbutɛ anto akina mbetawɔ kawɔ l’esambishelo.—Euh. 6:6, 7.
2 Tolowanyake Anaso Yema Yema: Ana sunganaka ndowanyema oma ko tɔkɛndakɛnda tawɔ woho wa vɔ tshindɛka ambutshi awɔ l’olimu w’esambishelo. La ntondo ka vɔ sambisha, tɔlɔngɔsɔlɛ anaso dia vɔ kamba olimu dimɛna. Totate la mbâtɛ hwe kɛnɛ kâlɔmbaso dia vɔ sala lo soko la soko. Ana wêke totshitshɛ kokaka mbisha anto tokatshikatshi kana akatshi wa leeta (invitation) ndo mbutɛ anto dia vɔ ndja lo Mbalasa ka Diolelo. Sho kokaka nɔmba ana w’akɛnda weya mbadia dimɛna dia vɔ mbadia avɛsa lo Bible. Vɔ kokaka mbisha anto wa periodikɛ lo mbaɛnyayɔ tsho. Lam’ayowoteyaka akambo, towalakanya woho wa vɔ kamba la Bible lam’asawolawɔ l’anto. Apandjudi efula weke akɛnda tshikɛka anto wa periodikɛ tena tshɛ ndo salaka waendelo w’eyoyo. Ndeka dimɛna mbidja ɔna l’ɔnɔngɔ w’opalanga dia vɔ tomba kâmɛ lo dihole dia mbodja l’Okristo weke dikɛnda oko nde. Opalanga mbeyaka nembetshiya ɔtɛkɛtshi ande ɔnɛ ɔna akeke woho wa sambisha.
3 Yana mɔtshi ya yimato akalɔmbɛ dikumanyi dia vɔ mbôkimanyiya lo nde kotsha kɛnɛ kalɔmbama dia nde monga opandjudi wa Diolelo. Nde aki paka l’ɛnɔnyi etanu eto l’etena kɛsɔ ndo kombeyaka mbadia, koko nde akeyaka sambisha losango la Diolelo dimɛna efula l’asoko. Nde akeyaka ahole wele avɛsa amɔtshi lo Bible, akafolaka l’ahole akɔ, ko mbisha ɔtɛkɛtshi ande dia mbadia ko nde ndjolembetshiya.
4 Oma lo ɛnyɛlɔ kawɔ, ambutshi pombaka mbetsha anawɔ dia ekɔ ohomba ndjalɔngɔsɔlaka dimɛna dia sambishaka tena la tena. Ekɔ ohomba efula vɔ sala ekongelo ka dimɛna ka lushi la lushi dia sambishaka ndo vɔ kiyela, woho wa ana mbeya wenya akɔna wa lo lomingu wakômbama paka dia sambishaka.
5 Naka ana mbeka oma ko tɔkɛndakɛnda tawɔ dia nanga olimu w’esambishelo ndo dia sambishaka, kete vɔ wayotshutshuyama dia pama woho wa ndjokondja waɛsɛ wa weke lo nshi yayaye ndo, ondo, vɔ kokaka ndjokamba olimu w’ombatshi mboka. (1 Kor. 15:58) Sho tshɛ pombaka keketsha ana wonga la so dia vɔ pama dimɛna dia lotombo la Jehowa.