Sho ngɛnangɛnaka waɛsɛ aso w’olimu!
1 Lo ɔkɔndɔ w’anto w’otondo, Jehowa akasha ekambi ande waɛsɛ wa weho la weho. Nde akawasha waɛsɛ aha la menda woho wakiwɔ apami kana wamato, ɛnɔnyi awɔ ndo ahole waki lawɔ lo tshunda. (Luka 1:41, 42; Etsha 7:46; Fil. 1:29) Waɛsɛ akɔna watosha Jehowa ɛlɔ kɛnɛ?
2 Waɛsɛ amɔtshi wele laso: Tekɔ la diɛsɛ dia mbetshama oma le Jehowa. (Mat. 13:11, 15) Diɛsɛ dikina diele laso ele nɛ dia tombola Jehowa oma lo kɔmatɛrɛ yashaso lo nsanganya ya lo etshumanelo. (Osam. 35:18) Etena keso la waaso wa mbisha kɔmatɛrɛ, sho salaka dui sɔ la wangasanu. Woho akɔ wâmɛ mbele, naka sho mbɔsaka olimu tshɛ watoshawɔ lo etshumanelo oko dui dia nɛmɔ, kete tayowosala la wolo aso tshɛ. Onde sho mbishaka lonya mbala la mbala lo ɔkɛndɛ wa mbetɛka Mbalasa ka Diolelo pudipudi ndo kilɔngɔsɔlaka?
3 Kânga mbele miliyɔ y’anto ndjambolaka dia kana Nzambi mbokaka alɔmbɛlɔ awɔ, sho tekɔ la diɛsɛ dia Onto loleki ohomba lo andja w’otondo mboka alɔmbɛlɔ aso. (Tuk. 15:29) Jehowa ndamɛ mpokamɛka alɔmbɛlɔ w’ekambi ande. (1 Pet. 3:12) Nde hadjisha elelo lo mbala yakokaso ndjasukanya la nde. Tekɔ la diɛsɛ dia woke dia nɔmbaka ‘lo oseka diaaso tshɛ’!—Ef. 6:18.
4 “Teko ekambi kame la [Nzambi]”: Diɛsɛ dimɔtshi dioleki tshɛ diele laso ele dia mbewoya lokumu l’ɔlɔlɔ la Diolelo dia Nzambi oko “ekambi kame la [Nzambi].” (1 Kor. 3:9) Olimu ɔsɔ mbishaka ɔngɛnɔngɛnɔ ndo keketshaka. (Joa. 4:34) Jehowa komonga l’ohomba wa kamba la anto dia vɔ kotsha olimu ɔsɔ, koko nde akatosha olimu ɔsɔ nɛ dia nde tolangaka. (Luka 19:39, 40) Lo sala ngasɔ, Jehowa akasha onto tshɛ diɛsɛ sɔ aha la shɔnɔdi. Wanɛ wasambisha pombaka monga la akoka amɔtshi wa lo nyuma walɔmbama. (Is. 52:11) Onde sho mɛnyaka dia sho mbɔsaka diɛsɛ sɔ la nɛmɔ lo mbetɛka olimu aso w’esambishelo oko etenyi kɛmɔtshi k’ohomba ka lo ekongelo kaso ka lomingu la lomingu?
5 Waɛsɛ w’oma le Jehowa tɔngɔnyaka. (Tuk. 10:22) Tatɔsake waɛsɛ asɔ oko anyanya! Etena kɛnyaso dia sho mɛtɛ ngɛnangɛnaka waɛsɛ aso w’olimu, sho ngɛnyangɛnyaka Shɛso lele l’olongo, Ombishi wa “mboya tshe k’ololo la k’uluwanyi.”—Jak. 1:17.