Mukanda w’oma le Olui-walɔmbɔla

Le asekaso apandjudi wa lokumu l’ɔlɔlɔ wa ngandji:

Tekɔ mɛtɛ la diɛsɛ dia diambo dia monga kaamɛ l’ɔtɛmwɛlɔ wa Jehowa Nzambi ɔtɔi ka mɛtɛ! Sho tekɔ “ekambi kaamɛ” la nde wakalongola olimu w’ekila ndo washimbɛ nsɛnɔ wa nsambisha ndo mbetsha lokumu l’ɔlɔlɔ la Diolelo diande diamboshikikɛma. (1 Kɔr. 3:9; Mat. 28:19, 20) Dia nkamba olimu wa l’andja w’otondo ɔsɔ lo wɔladi ndo lo kaamɛ, sho pombaka kongɛma dimɛna.​—1 Kɔr. 14:40.

Dibuku nɛ diayokokimanyiya dia wɛ nshihodia woho wakɛndakɛnda etshumanelo k’Akristo ɛlɔ kɛnɛ. Diɔ mɛnyaka waɛsɛ ndo ɛkɛndɛ wele la yɛ oko weyɛ Ɔmɛnyi wa Jehowa. Naka wɛ mbɔsa waɛsɛ ayɛ la nɛmɔ ndo nkotsha ɛkɛndɛ ayɛ, kete wɛ ayokoka “nkeketala lo mbetawɔ.”​—Ets. 16:4, 5; Ngal. 6:5.

Ɔnkɔnɛ, tambokokeketsha dia wɛ mbeka dibuku nɛ dimɛna dimɛna. Yanga toho takokayɛ nkamba la awui wa lɔkɔ lo lɔsɛnɔ layɛ. Ɛnyɛlɔ, naka atete edja kokomiyɛ opandjudi wahatabatizama, wanya akɔna wahombayɛ ntakola dia batizama dia nkoma Ɔmɛnyi wa Jehowa? Lo wedi okina, naka wɛ ambobatizamaka, kakɔna kakokayɛ nsala dia mpama lo nyuma ndo mpamia olimu wakambɛyɛ Jehowa? (1 Tim. 4:15) Ngande wakokayɛ mbisha lonya dia wɔladi monga l’etshumanelo? (2 Kɔr. 13:11) Enda ekadimwelo wa ambola asɔ lo dibuku nɛ.

Naka wɛ ekɔ pami kambobatizama, kakɔna kakokayɛ nsala dia nkotsha kɛnɛ kalɔmbama dia nkamba oko okambi wakimanyiya ndo l’ɔkɔngɔ oko ekumanyi? Oko watetemala nunu di’eyoyo ndja l’okongamelo wa Nzambi, ekɔ ohomba wa wanyandja wa anangɛso wakotsha kɛnɛ kalɔmbama dia nɔmbɔla. Dibuku nɛ diayokokimanyiya dia wɛ mɛna kɛnɛ kalɔmbama dia “nkombola” eyango wa lo nyuma ɛsɔ.​—1 Tim. 3:1.

Tekɔ lo nɔmba l’otema ɔtɔi dia dibuku nɛ kokimanyiya dia wɛ mɛna dihole diayɛ l’okongamelo wa Jehowa ndo diɔsa la nɛmɔ. Sho nyokaka nyu tshɛ ngandji k’efula ndo tekɔ lo ntetemala nɔmba dia wɛ monga l’atei wa wanɛ wayɔtɛmɔlaka pondjo pondjo l’ɔngɛnɔngɛnɔ Shɛso lele l’olongo Jehowa.​—Os. 37:10, 11; Isa. 65:21-25.