Todje welo dia ndeka kamba olimu w’esambishelo
1 Ɔpɔstɔlɔ Paulo akalake Akristo dia kɛndakɛnda lo mboka ka Nzambi ndo dia ‘tetemala nyomoleka sala dikambo sɔ.’ (1 Tes. 4:1) Dui sɔ tɔlɔmbaka dia sala na? Dui dimɔtshi ele sho pombaka tetemala nyanga waaso wa mbidja welo dia sho nyomoleka kamba elimu wa lo nyuma ndo salaka la wolo mbala tshɛ dia ‘ndeka kamba olimu aso.’—2 Tim. 4:5.
2 Kɛnɛ katotshutshuya: Nsaki ka nyomoleka kambɛ Otungi aso mbatotshutshuya dia sho mbidja welo dia ndeka kamba olimu w’esambishelo. Sho nangaka pama lo nyuma ndo nyanga toho ta ndowanya olimu aso. Monga la mbekelo y’ɛlɔlɔ kâmɛ l’eyango w’ɛlɔlɔ ayotokimanyiya dia sho kotsha eyango wa lo nyuma.—Osam. 1:1, 2; Fil. 4:6; Heb. 10:24, 25.
3 Dia sho pamia olimu aso w’esambishelo, sho pombaka monga la yimba ya lokaho ndo ya ndjahombia. Kana yimba lo dɔmbɛlɔ lo ɛnyɛlɔ k’ɔlɔlɔ ka Yeso ayotokimanyiya dia monga la yimba shɔ. (Mat. 20:28) Yeso aki l’ɔngɛnɔngɛnɔ w’efula lo kambɛ anto akina l’edja tshɛ kakandakambaka olimu ande. (Etsha 20:35) Sho koka mbokoya Yeso lo ndjasha le anto akina ndo lo monga suke dia mbeya waaso wa sho ndeka kamba olimu w’esambishelo.—Is. 6:8.
4 Ɔkɛndɛ wele l’ambutshi: Ambutshi kokaka monɛ nsaki ka kambɛ anto akina ndo ka pamia olimu l’etema wa anawɔ oma ko tɔkɛndakɛnda tawɔ. Akɛnda wayɛna etete kele la ase nkumbo ndo woho wayashawɔ tshɛ dia pamia olimu awɔ w’esambishelo. Woho wakakambaka ɔnangɛso ɔmɔtshi elimu wa l’etshumanelo kâmɛ la tshɛnde ka pami etena kakinde êke dikɛnda akayotshutshuyaka dia nde mbidja welo dia ndeka sambisha. Etete ndo ɔngɛnɔngɛnɔ wakandɛnyi le tshɛnde akôtshutshuya dia nde nyanga waaso wa kambɛ anango akina. Ɛlɔ kɛnɛ nde ekɔ okambi wakimanyiya.
5 Ohomba wa anangɛso: ‘Naka onto kombolaka mbidja welo dia ndeka kamba, kete nde ambolanga olimu w’ɔlɔlɔ.’ (1 Tim. 3:1) Ɛtɛkɛta ɛsɔ keketshaka anangɛso dia mbidja welo dia kotsha kɛnɛ kalɔmbama dia monga la ɛkɛndɛ ekina w’olimu l’okongamelo waki Jehowa. Dia sala dikambo sɔ, halɔmbama ɔnɛ paka onto kongi la akoka amɔtshi wa lôtɔ wa lânde. Ɔnangɛso ladja welo dia ndeka kamba nyangaka ntondotondo Diolelo ndo sambishaka l’ohetoheto. (Mat. 6:33; 2 Tim. 4:5) Nde salaka la wolo dia monga ɛnyɛlɔ k’ɔlɔlɔ le anto akina.
6 Lo andja w’otondo: Jehowa ekɔ lo tshumanya anto la shamanya. (Is. 60:22) Wanɛ tshɛ wayela ɛnyɛlɔ ka Yeso pombaka mbidja welo dia ndeka kamba olimu w’esambishelo la shamanya tshɛ. Alapɔlɔ wa l’andja w’otondo w’ɔnɔnyi w’olimu 2006 mɛnyaka dia anto 248327 wakabatizama. Ekɔ oko yɛdikɔ ya l’atei atei y’anto w’eyoyo ndekana 680 lushi tshɛ! Nyɛsɔ sho tshɛ totetemale nyanga waaso wa sho nyomoleka kamba olimu w’esambishelo.