Ɛlɔngɔlɔngɔ le, onde nyu kombolaka mɛmba ɛkɛndɛ?
1. Etena kakɔna kahomba ɔlɔngɔlɔngɔ ntatɛ nkamba la dako diatanema lo 1 Timɔte 3:1?
1 “Naka onto ekɔ lo nkombola [mɛmba ɛkɛndɛ], nde ekɔ lo nkombola olimu w’ɔlɔlɔ.” (1 Tim. 3:1) Ɛtɛkɛta wakasambiyama ɛsɔ keketshaka ɛlɔngɔlɔngɔ dia vɔ nkombola mɛmba ɛkɛndɛ lo ndjalowanya l’etshumanelo. Onde paka wɛ aya opalanga mbahombayɛ ndjosala dui sɔ? Ayoleka dimɛna wɛ ntatɛ nkombola mɛmba ɛkɛndɛ etena kekeyɛ dikɛnda. Lo nsala ngasɔ, wɛ ayolongola olowanyelo ndo wɛ ayɛnya dia wɛ kokaka ndjɔsɔnama oko okambi wakimanyiya etena kayoyola. (1 Tim. 3:10) Naka wɛ ekɔ ɔlɔngɔlɔngɔ wambobatizama, ngande wakokayɛ nkombola dia mɛmba ɛkɛndɛ?
2. Ngande wakoka ɛlɔngɔlɔngɔ monga la yimba ya ndjahombia ndo ndjikɛnɛmɔla?
2 Yimba ya ndjahombia: Eya dia wɛ ekɔ lo nkombola olimu wa dimɛna efula, koko aha titrɛ kɛmɔtshi. Ɔnkɔnɛ, wɛ pombaka monga la nsaki ka nkimanyiya ananyɔ l’akadiyɛyɛ. Yoho mɔtshi yakokayɛ nsala dui sɔ ele lo nkana yimba lo ɛnyɛlɔ k’oshika kaki Yeso. (Mat. 20:28; Jni. 4:6, 7; 13:4, 5) Lɔmba Jehowa dia nde kokimanyiya dia wɛ ndjasha le anto akina. (1 Kɔr. 10:24) Onde wɛ hakoke nkimanyiya ase etshumanelo waya esombe kana wele la dikɔmɔ? Onde wɛ ndjakimɔka la lolango dia mɔmbɛ adiyo, mɔmba mbalasa, kana ndjasha l’elimu ekina wendana la pudipudi ka Mbalasa ka Diolelo? Onde wɛ hakoke ndjakimɔka la lolango dia mbishaka asawo wa lo Kalasa k’olimu wa teokrasi naka onto lakalongola diɛsɛ sɔ bu lawɔ? Naka wɛ nsala ngasɔ, kete wɛ ayɛna dia ndjasha lo wahɔ w’anto akina mbishaka ɔngɛnɔngɛnɔ.—Etsha 20:35.
3. Naa ohomba wele la lonyuma la dimɛna, ndo ngande wakoka onto monga la lɔ?
3 Lonyuma: Lonyuma la dimɛna mbele dui dia ntondo dialɔmbama le onto lalanga mɛmba ɛkɛndɛ, koko aha akoka ande wa lootɔ kana diewo dia laande diele la nde. Onto lele la lonyuma la dimɛna salaka la wolo dia mɛna akambo woho wawaɛna Jehowa nde la Yeso. (1 Kɔr. 2:15, 16) Nde kɛnɛmɔlaka “elowa wa nyuma.” (Ngal. 5:22, 23) Nde ekɔ osambisha wele l’ohetoheto ndo wetsha wahɔ wa Diolelo lo dihole dia ntondo. (Mat. 6:33) Wɛ kokaka monga la waonga w’amɛna wa lo nyuma diɛsɛ la ekongelo ka dimɛna ka wekelo wa Bible w’onto ndamɛ. Dui sɔ mendanaka la wadielo wa Bible wa lushi la lushi, wadielo w’oseka numɛlɔ tshɛ ka Tshoto y’Etangelo ndo ka Réveillez-vous ! watomba, ɔlɔngɔswɛlɔ ndo wɔtwɛlɔ wa nsanganya ya l’etshumanelo. (Osam. 1:1, 2; Hɛb. 10:24, 25) Etena kakandakeketshaka Timɔte dia nde mpama lo nyuma, Pɔɔlɔ akoofundɛ ate: “Odjake yimba lo wetshelo ayɛ.” (1 Tim. 4:15, 16) Laasɔ, koyalɔngɔsɔlake dia mbishaka asawo wakoshawɔ lo Kalasa k’olimu wa teokrasi dimɛna. Koyalɔngɔsɔlake la ntondo ka wɛ ntshɔ l’olimu w’esambishelo ndo koosambishake mbala la mbala. Yadjɛ eyango wa lo nyuma wele oko nkamba olimu w’ombatshi mboka, tokamba lo Bɛtɛlɛ kana ntshɔ dia tɔtɔ Kalasa ka Bible k’anangɛso w’enyemba ndo sala la wolo dia wɛ mbakotsha. Monga la lonyuma la dimɛna ayokokimanyiya dia wɛ “[nd]awɔ nsaki y’ɛlɔngɔlɔngɔ.”—2 Tim. 2:22.
4. Lande na kele ekɔ ohomba monga la kɔlamelo ndo monga onto lɛkɛwɔ otema?
4 Onga onto lɛkɛwɔ otema ndo lele la kɔlamelo: Lam’ele anangɛso wakalongola ɔkɛndɛ wa kahanyaka diangɔ diakawashaka Akristo waki lo dihombo lo ntambe ka ntondo waki “la lokumu l’ɔlɔlɔ,” ndo wakeyamaka oko anto waki la kɔlamelo ndo wakokawɔ mbɛkɛ etema, apɔstɔlɔ kondjakiyanyaka ɔnɛ olimu ɔsɔ hokambema dimɛna. Dui sɔ diakakimanyiyaka apɔstɔlɔ dia vɔ ndjasha l’akambo akina w’ohomba. (Etsha 6:1-4) Diakɔ diele, etena kakoshawɔ ɔkɛndɛ ɔmɔtshi l’etshumanelo, kambawɔ dimɛna. Okoya ɛnyɛlɔ ka Nɔa lakayele la kɔlamelo tshɛ ɛlɔmbwɛlɔ kakandalongola ka nsɛla waato. (Etat. 6:22) Kɔlamelo ndo lotshundu l’Okristo ekɔ ohomba efula le Jehowa.—1 Kɔr. 4:2; enda kiombo yele l’ɔtɛ a dui ɔnɛ: “Wahɔ waya oma l’olowanyelo.”
5. Lande na kahomba ɛlɔngɔlɔngɔ nkombola dia mɛmba ɛkɛndɛ?
5 Oko wakadiatatami lo prɔfɛsiya, Jehowa amboleka kambisha olimu w’otshumanyelo la shamanya tshɛ. (Is. 60:22) Lo yɛdikɔ ya l’atei atei, nunu nkama hiende l’akumi atanu y’anto wekɔ lo batizama ɔnɔnyi tshɛ. Lam’ele nyemba nyemba y’anto wekɔ lo mbɔtɔ l’okongamelo, ohomba w’apami wahomba mɛmba ɛkɛndɛ l’etshumanelo wekɔ lo taleke mfula. Nshi nyɛ mbamboleka monga awui efula wa nsala l’olimu wa Jehowa. (1 Kɔr. 15:58) Ɛlɔngɔlɔngɔ le, onde nyu kombolaka mɛmba ɛkɛndɛ? Naka eelo, kete nyu nyekɔ lo nkombola nsala olimu wa dimɛna efula.
[Efundelo wa l’etei w’odingɔ wa lo lɛkɛ 2]
Lam’ele nyemba nyemba y’anto wekɔ lo mbɔtɔ l’okongamelo, ohomba w’apami wahomba mɛmba ɛkɛndɛ l’etshumanelo wekɔ lo taleke mfula
[Kiombo ya lo lɛkɛ 3]
Wahɔ waya oma l’olowanyelo
Ɛlɔngɔlɔngɔ wele l’akoka kondjaka wahɔ etena kawasha dikumanyi ɛkɛndɛ ndo kaalowanyawɔ. Ɛnyɛlɔ l’ɔkɔngɔ wa nsanganya, omendji w’otshimbedi ɔmɔtshi akadjasɛ kaamɛ l’opandjudi ɔmɔtshi lo nkɔsa ya lo lɔyɛnga dia mbokeketsha. Etena kakawasawolaka, nde akɛnyi ɔlɔngɔlɔngɔ okina emadi suke la nde, omendji akawombola dia kana nde ekɔ lo mbokonga dia nde mbotɛ dui dimɔtshi. Ɔnangɛso akookadimola ate nde akalongola ɔkɛndɛ wa minyaka nkɔsa oma lo lɔyɛnga l’ɔkɔngɔ wa nsanganya tshɛ. Laasɔ ko ambutshi ande wakashidi ntshɔ, koko ɔlɔngɔlɔngɔ ɔsɔ konanga ntshɔ la ntondo ka nde nshidiya ɔkɛndɛ wakawawosha. Omendji w’otshimbedi akamɔ l’ɔngɛnɔngɛnɔ tshɛ. Omendji akɔ mbutaka ate: “Dikumanyi dia l’etshumanelo kɛsɔ wekɔ lo ndowanya ɛlɔngɔlɔngɔ mbala la mbala lo mbaasha tɔkɛndɛkɛndɛ tɔmɔtshi. Etombelo wambonga la dui sɔ ele, mbala tshɛ katshɔmi l’etshumanelo kɛsɔ dia tokiembola, dikumanyi hawengenga dia ndowola ɔlɔngɔlɔngɔ mɔtshi dia nde nkamba oko okambi wakimanyiya.”