Tewoya ɔtɛkɛta wa Nzambi la dihonga
“Tshoka, tuteli wudja ami Isariyele akambu wahatayi.”—AMOSE 7:15.
1, 2. Amɔsɛ akinde, ndo kakɔna kakɛnɛmɔla Bible lo dikambo diande?
LUSHI lɔmɔtshi, lam’akasambishaka Ɔmɛnyi ɔmɔtshi wa Jehowa, ɔlɔmbɛdi ɔmɔtshi akawodjɛ wekamu. Ɔlɔmbɛdi ɔsɔ akawotɛ la dui dia wolo ate: ‘Tshika dia sambisha! Mɔ oma lo dihole nɛ!’ Kakɔna kakasale Ɔmɛnyi wa Jehowa ɔsɔ na? Onde nde akatshike sambisha, ko kana akatetemala la mbewoya ɔtɛkɛta wa Nzambi la dihonga? Wɛ koka mbeya akambo asɔ, nɛ dia Ɔmɛnyi ɔsɔ akakɔndɔla awui wakôkomɛ lo dibuku diele la lokombo lande. Ekɔ dibuku dia lo Bible di’Amose. Koko, la ntondo ka sho mbeka awui wendana la woho wakandahomana l’ɔlɔmbɛdi ɔsɔ, nyɛsɔ tɔsɛdingole akambo amɔtshi wendana la Amɔsɛ.
2 Amɔsɛ akinde? Lende akandadjasɛka ndo lo nshi yakɔna yakandasɛnaka? Sho tanaka ekadimwelo wa wembola ɛsɔ lo Amose 1:1, lɛnɛ adiaso ɔnɛ: “On’eli aui wa Amose, laki l’atei w’alami w’ekoko wa la Tekoa, . . . lu nshi ya Uziya, khum’ekanga ka Juda, ndu lu nshi ya Jeroboama, on’aki Joashi, khum’ekanga ka Isariyele.” Amɔsɛ akadjasɛka la Juda. Osomba ande wa lôtɔ aki Tekoa, lo kilɔmɛtɛlɛ 16 lo lɛkɛ la sidɛ ka Jerusalɛma. Nde akasɛnɛ oya l’ekomelo ka ntambe ka divwa la ntondo ka tena diaso nɛ (N.T.D.), etena kakôlɛka Nkumekanga Uziya la Juda ndo Jerɔbɔama II, laki nkumekanga ka waoho dikumi wa diolelo di’Isariyɛlɛ. Amɔsɛ aki olami w’ɛkɔkɔ. Amose 7:14 mbutaka dia nde komonga tsho “ulami wa dungalunga” koko nde aki ndo “umunyi w’etamba wa khumu.” Ɔnkɔnɛ, nde aketshaka etenyi k’ɔnɔnyi oko okambi wa lo deko. Nde akamulaka ashi w’elowa wa fingo. Olimu ɔsɔ wakasalemaka dia fingo mbɛla kana tshunda esadi. Ɔsɔ aki olimu wa wolo efula.
‘Tshɔka, tewoya akambo wahataye’
3. Lande na kele mbeka akambo wendana la Amɔsɛ tokimanyiyaka etena kayaokaso oko sho bu l’akoka wa sambisha?
3 Amɔsɛ akashikikɛ l’ɔlɔlɔ tshɛ ate: “Dimi taki umvutshi kuyanga on’a umvutshi.” (Amose 7:14) Amɔsɛ komonga ɔna omvutshi ndo kombetshama dia monga omvutshi. Koko l’atei w’ase Juda tshɛ, Jehowa akasɔnɛ Amɔsɛ dia sala olimu Ande. L’etena kɛsɔ, Nzambi kɔsɔna nkumekanga ka wolo, ɔlɔmbɛdi wakeke mukanda efula kana owandji ɔmɔtshi waki l’ɔngɔnyi. Dikambo sɔ toshaka wetshelo watosha eshikikelo. Ondo sho bu la dihole dia woke lo tshunda di’anto, kana kombeka mukanda efula. Ko onde kɛsɔ pombaka tokonya dia ndjaɔsa dia sho bu l’akoka wa sambisha ɔtɛkɛta waki Nzambi? Kema! Jehowa koka tosha akoka wa sho mbewoya losango lande kânga lo bɛtshi dia nkɛtɛ dia wolo. Lam’ele kɛsɔ mbakasalɛ Jehowa Amɔsɛ, ekɔ ohomba efula di’anto tshɛ walanga sambisha Ɔtɛkɛta wa Nzambi la dihonga sɛdingola ɛnyɛlɔ kakatshike omvutshi ɔsɔ waki la dihonga.
4. Lande na kaki Amɔsɛ l’okakatanu dia sambisha l’Isariyɛlɛ?
4 Jehowa akadjangɛ Amɔsɛ ate: “Tshoka, tuteli wudja ami Isariyele akambu wahatayi.” (Amose 7:15) Ɔkɛndɛ ɔsɔ waki wolo efula. L’etena kɛsɔ, waoho dikumi wa diolelo di’Isariyɛlɛ waki lo sɛna lo wɔladi, lo lotui tshitshi ndo l’ɔngɔnyi efula. Efula waki ‘la mvudu ya lo nshi ya tshitshi’ ndo ‘mvudu ya lo nshi ya yanyi’ yakakama aha l’atafadi w’anyanya, koko “la ave wa lokolonga” w’oshinga wolo. Anto amɔtshi waki la diangɔ dia lo luudu di’amɛna efula, diakasalema l’ewanga, ndo wakanɔka wanu wakatombaka oma ‘l’ɛkɔdi wa vinyɔ w’amɛna.’ (Amose 3:15; 5:11) Ɔnkɔnɛ, anto wakangɛnangɛnaka yoho ya lɔsɛnɔ yakawasɛnaka. Ondo ɛtshi ka nkɛtɛ kakawasha Amɔsɛ dia sambisha fɔnaka l’ahole wasambisha amɔtshi l’atei aso ɛlɔ kɛnɛ.
5. Awui akɔna wa kɔlɔ wakasalaka ase Isariyɛlɛ amɔtshi?
5 Ndoko kɔlɔ kakikɔ di’ase Isariyɛlɛ monga la lomombo. Koko, ase Isariyɛlɛ amɔtshi wakayamɔtshɛka ɛngɔnyi lo toho tele bu amɛna. Akanga w’ɛngɔnyi ‘wakasoyaka anto k’anto’ ndo ‘wakahɔtshahɔtshaka ase wola.’ (Amose 4:1) Amundji w’okanda, toshushi ndo ɛlɔmbɛdi waki l’ahole wa lâdiko wakɔtɔka sheke dia mbiva ase wola. Tende yema kɛnɛ kaketaka lo nshi shɔ, ndo tɔsɛdingole awui wakasalaka apami asɔ.
Ɛlɛmbɛ wa nzambi wakɔnywama
6. Ngande wakasoyaka amundji w’okanda wa l’Isariyɛlɛ anto akina?
6 Tende ntondotondo kɛnɛ kakasalemaka lo lobingu. Lɛsɔ amundji w’okanda wa lokeso ‘wakɔndjaka woke wa saka,’ ‘wakadiyaka oshinga’ ndo wakasondjaka koyanga ‘fufudi y’eponga’ ɔnɛ eponga. (Amose 8:5, 6) Amundji w’okanda wakavaka wa kidiya yawɔ lo yɛdikɔ ya diangɔ diakawasondjaka, oshinga waki lâdiko, koko etondo wa diangɔ komongaka amɛna. L’ɔkɔngɔ wa vɔ mbiva ase wola polo lo mbɔsa tshɛ kaki lawɔ, ase wola asɔ takiwɔ la kasala nto ele paka ndjasondja oko fumbe. Oma lâsɔ, amundji w’okanda wakâsombaka ‘l’oshinga wa lokolo la losabata.’ (Amose 8:6) Ohonyokanyiya yema! Amundji asɔ w’okanda wa lokaki wakɔsaka asekawɔ ase Isariyɛlɛ oko lokolo la losabata l’anyanya! Ande sɔnyi kakashamaka ase wola ndo woho wakasekɔmaka Ɛlɛmbɛ wa Nzambi lee! Koko, amundji akɔ w’okanda wakalɛnyaka “lushi la mumuya.” (Amose 8:5) Vɔ waki tsho atɛmɔdi wa Nzambi wa l’ɛlɔmɔ.
7. Kakɔna kakakonya amundji w’okanda w’ase Isariyɛlɛ dia vɔ sekola Ɛlɛmbɛ wa Nzambi?
7 Ko ngande wakɔnyɔlaka amundji w’okanda Ɛlɛmbɛ waki Nzambi wakadjangaka ɔnɛ: “Ulangaki unyaye uku ayalangaye,” aha la kondja dilanya na? (Akambu w’Asi Lewi 19:18) Vɔ wakɔnyɔlaka Ɛlɛmbɛ nɛ dia anto wakahombaka mbidja yimba di’anto kitanyiyaka ɛlɛmbɛ, mbut’ate waa toshushi, wakasangaka la wɔ lolimi dia sala akambo wa kɔlɔ. Lo soko di’osomba, lɛnɛ akawalomboshaka enongo, toshushi ‘wakalongolaka kɔta mishiko ndo wakakawoyaka ase wola.’ Lo dihole dia kokɛ ase wola, toshushi wakalongolaka kɔta mishiko di’aha mpembola enongo w’ase wola dimɛna. (Amose 5:10, 12) Ɔnkɔnɛ, toshushi vɔ lawɔ kokitanyiyaka Ɛlɛmbɛ wa Nzambi.
8. L’akambo akɔna wakadihaka ɛlɔmbɛdi wa kɔlɔ washo?
8 Ko ɛlɔmbɛdi wa l’Isariyɛlɛ waki l’ɔkɛndɛ akɔna? Dia mbeya ɔkɛndɛ waki lawɔ, sho pombaka kotola yambalo yaso lo dikambo dikina. Tende pɛkato kina yaketawɔka ɛlɔmbɛdi “lu luudu la [tonzambizambi t]awo”! Oma lo tshimbo y’Amɔsɛ, Nzambi akate ate: “Ona pami la shi watutshokaka le usekaseka a umuntu otoi, dia nanya lukumbu lami l’ekila.” (Amose 2:7, 8) Ohokanyiya yema! Ombutshi wa pami w’ose Isariyɛlɛ la ɔnande la pami wakasalaka akambo wa mindo wa dieyanelo la womoto ɔtɔi la numba. Koko, ɛlɔmbɛdi ɛsɔ wa kɔlɔ wakadihaka washo l’akambo wa mindo wa ngasɔ!—Akambu w’Asi Lewi 19:29; Euhwelu k’Elembe 5:18; 23:17.
9, 10. Ase Isariyɛlɛ wakɔnyɔlaka Ɛlɛmbɛ akɔna waki Nzambi, ndo ngande wakokaso mbɛdika dikambo sɔ la kɛnɛ keta lo nshi yaso nyɛ?
9 Lo tɛkɛta dikambo dia lɔkɛwɔ lokina la kɔlɔ, Jehowa akate ate: “Vo watetamaka lasuki l’ediakelu tshe lu ahondo wakawose okole. Vo wakanokaka wanu, wakawafutshaka antu enungu lu luudu la [tonzambizambi t]awo.” (Amose 2:8) Eelo, ɛlɔmbɛdi ndo anto lo tshɛ kawɔ wakahindolaka ɔlɛmbɛ wele l’Etumbelu 22:26, 27, ɔlɛmbɛ wata dia dihɔndɔ diakɔsama ɔkɔlɛ pombaka kaloyama le kangadiɔ la ntondo ka wonya mbidja. Lo dihole dia vɔ dikaloya le kangadiɔ, vɔ waketamaka lɔkɔ etena kakawasalaka afɛstɔ ndo kakawanɔka wanu la ntondo ka tonzambizambi ta kashi. L’akuta wakawafutshaka ase wola amandɛ wa kashi, vɔ wakasombaka wanu l’afɛstɔ wa kashi w’ɛtɛmwɛlɔ. Vɔ mɛtɛ wakângana etale l’ɔtɛmwɛlɔ wa pudipudi!
10 Ase Isariyɛlɛ wakahindolaka ɛlɛmbɛ ehende woleki weke l’okonda tshɛ, mbut’ate nanga Jehowa ndo nanga wanyawɔ anto. Diakɔ diele Nzambi akatome Amɔsɛ dia towânya l’ɔtɛ wakiwɔ komonga la kɔlamelo. Lo nshi yaso nyɛ, wedja wa l’andja ɔnɛ mbidja ndo ase Lokristokristo wekɔ lo kɛnɛmɔla dionga dia kɔlɔ diaki l’ase Isariyɛlɛ w’edjedja. Etena katangɔnɛ anto amɔtshi, efula k’anto akina wekɔ lo mɛna pâ la wola ndo wekɔ lo sowa l’ɔtɛ w’etsha wa kɔlɔ w’ewandji wa lokeso, w’amundji w’okanda, w’ase pɔlitikɛ ndo w’ɛtɛmwɛlɔ wa kashi. Koko Jehowa ndjakiyanyaka dikambo di’anto wasowa ndo wele suke dia mbôyanga. Ɔnkɔnɛ, nde ambosha ekambi ande wa nshi nyɛ ɔkɛndɛ wa kamba olimu wafɔna la wɔnɛ wakakambaka Amɔsɛ, mbut’ate sambisha ɔtɛkɛta Ande la dihonga.
11. Kakɔna kakokaso mbeka oma lo ɛnyɛlɔ kaki Amɔsɛ?
11 Lam’ele olimu wakakambaka Amɔsɛ fɔnaka efula la wɔnɛ wakambaso, tayokondja wahɔ efula lo sɛdingola ɛnyɛlɔ kande. Amɔsɛ tɛnyaka (1) losango lahombaso sambisha, (2) woho wahombaso lisambisha ndo (3) bonde kele atunyi hawokoke memɛ olimu aso w’esambishelo. Nyɛsɔ tɔsɛdingole akambo asɔ l’ɔm’ɔmɔ.
Woho wakokaso mbokoya amɔsɛ
12, 13. Ngande wakɛnya Jehowa dia nde kɔngɛnangɛnaka ase Isariyɛlɛ, ndo kakɔna kakawasale?
12 Oko weso Ɛmɛnyi wa Jehowa, olimu aso w’Okristo mendanaka l’esambishelo ka Diolelo ndo olimu wa mbetɛ anto ambeki. (Mateu 28:19, 20; Mako 13:10) Koko, sho kotolaka nto yambalo y’anto lo ɛhɛmwɛlɔ wa Nzambi, oko Amɔsɛ lakewoya dia Jehowa ayela elanyelo le anto wa kɔlɔ. Ɛnyɛlɔ, Amɔsɛ 4:6-11 mɛnyaka dia Jehowa akɛnya mbala efula dia nde kɔngɛnangɛnaka Isariyɛlɛ. Nde akatone mbisha ekambi ande ‘mma dia ndɛ,’ ‘akâdime mvula,’ ‘akalongoyɛ diangɔ la yanyi,’ akâtomɛ ‘hemɔ ka wolo.’ Onde akambo asɔ wakatshutshuya as’Isariyɛlɛ dia vɔ ndjatshumoya? Nzambi akate ate: “Nyu kunkalula le mi.” Lo mɛtɛ, ase Isariyɛlɛ wakakasha Jehowa mbala ko mbala.
13 Jehowa akasha ase Isariyɛlɛ waki kondjatshumoya dilanya. Koko, ntondotondo vɔ wakalongola ɔhɛmwɛlɔ wendana la kɛnɛ kakahombe mbakomɛ. Lo ndjela dikambo sɔ, Nzambi akate ate: “Khumadiondjo [Jehowa] hatutshaka nduku dikambu, tshikima nde ambutashudi dikambu diandi dia lu usheshe le ekambi andi amvutshi.” (Amose 3:7) Nzambi akewoya Nɔa dia nde ayanga mbela Elola ndo akɔlɔmbɛ dia nde mbewola anto. Woho akɔ wâmɛ, Jehowa akalɔmbɛ Amɔsɛ dia nde mbewola anto mbala k’ekomelo. Lonyangu ko, Isariyɛlɛ akatone mbidja yimba lo losango l’oma le Nzambi ndo kɔmbɔsa yɛdikɔ y’ɔlɔlɔ.
14. Lo akambo akɔna wafɔna nshi ya Amɔsɛ la nshi yaso nyɛ?
14 Aha la tâmu, sho mɛnaka dia diɔtɔnganelo dia mamba diekɔ lam’asa akambo wasalema nshi nyɛ la wanɛ wakasalemaka lo nshi y’Amɔsɛ. Yeso Kristo akatatɛkɛtshi dia mpokoso efula yakahombe monga lo nshi y’ekomelo. Nde akatɛkɛta nto di’olimu w’esambishelo wahomba kambema l’andja w’otondo. (Mateu 24:3-14) Oko wakidiɔ lo nshi y’Amɔsɛ, anto efula hawolange mbidja yimba oyadi lo tolembetelo ta tena kana lo losango la Diolelo. Le anto asɔ, kɛnɛ kakakomɛ ase Isariyɛlɛ waki kondjatshumoya mbayowakomɛ. Jehowa akâhɛmɔla ate: “Nyuyalongosole dia mpumana la [Nzambi k]anyu.” (Amose 4:12) Vɔ wakahomana la Nzambi lo woho ɔnɛ wele vɔ wakɛnyi elanyelo kande lam’akâlɛndja alembe w’ase Asuriya. Ɛlɔ kɛnɛ, andja wa kɔlɔ ɔnɛ ‘wayohomana la Nzambi’ lo Aramangɛdɔna. (Enyelo 16:14, 16) L’edja tshɛ keke Jehowa la solo dia lotutsha, sho keketshaka anto efula dia vɔ ‘nyanga Jehowa dia vɔ tshikala la lɔsɛnɔ.’—Amose 5:6.
Tekɔ lo pomana l’ɔlɔshamelo oko amɔsɛ
15-17. (a) Amaziya akinde, ndo ngande wakandasale la ntondo k’awui wakate Amɔsɛ? (b) Emamatanyiya akɔna wakate Amaziya lo lokombo l’Amɔsɛ?
15 Sho kokaka mbokoya Amɔsɛ aha tsho lo kɛnɛ kasambishaso koko ndo lo woho wasambishaso. Dikambo sɔ tɔtɔmiyama lo tshapita 7, lɛnɛ atotɛwɔ di’ɔlɔmbɛdi wakatatɛkɛtshi dikambo diande lo mbɔtwɛlɔ ka sawo diaso nɛ. Onto ɔsɔ aki “Amaziya, olombedi wa la Betele.” (Amose 7:10) Osomba wa Bɛtɛlɛ aki dihole diakalekaka salema ɔtɛmwɛlɔ wa waa apɔsta l’Isariyɛlɛ, wakendanaka nto l’ɔtɛmwɛlɔ wa yana ya ngɔmbɛ. Lâsɔ, Amaziya aki ɔlɔmbɛdi w’ɔtɛmwɛlɔ wa Lɛɛta. Kakɔna kakandasale lam’akasambishaka Amɔsɛ la dihonga na?
16 Amaziya akatɛ Amɔsɛ ate: “We, omenyi w’akambu wahatayi, utshu, ulawo utsha lu kete ya Juda; utolekaki ma leko, utataka akambu wahatayi leko. Keli tutaki akambu wahatayi ntu la Betele, ne dia Betele eli etemwelo ka khum’ekanga, ndu luudu la khum’ekanga.” (Amose 7:12, 13) Amaziya aki oko onto lata ate: ‘Kawola lakanyu! Sho tekɔ la ɔtɛmwɛlɔ aso hita.’ Nde akayange nto dia tshutshuya lɛɛta dia shimba olimu waki Amɔsɛ, lo mbutɛ Nkumekanga Jerɔbɔama II ate: “Amose ambukudjela sheki l’atei a khumbu ka Isariyele.” (Amose 7:10) Amaziya akate dia Amɔsɛ akɔtwɛ nkumekanga sheke! Nde akatɛ nkumekanga ate: “Amose akati ati: Jeroboama ayudiakema la yombo. Mete, Isariyele wayotolama lu fumbi, etali uma lu kete yawo.”—Amose 7:11.
17 L’ɛtɛkɛta ande ɛsɔ, Amaziya akakolonganya akambo asato wa kashi. Nde akate ate: “Amose akati ati.” Koko ndoko lushi lakate Amɔsɛ dia ndamɛ mbaki kiɔkɔ y’awui wa prɔfɛsiya wakandataka. Nde akataka mbala tshɛ ɔnɛ: ‘Ɔnkɔnɛ mbata Jehowa.’ (Amose 1:3) Nde akafunde Amɔsɛ nto ɔnɛ, nde mbakate ate: “Jeroboama ayudiakema la yombo.” Koko, oko wɔkɔndwamidɔ lo Amose 7:9, Amɔsɛ akate ate: “Dimi [Jehowa] layunela dia ndo la khumbu ka Jeroboama la yombo.” Nzambi akatatshi dia woho wa mpokoso kɛsɔ kakahombe komɛ ‘luudu’ laki Jerɔbɔama, mbut’ate anande. Ndo nto, Amaziya akate nto dia Amɔsɛ akate ate: “Isariyele wayotolama lu fumbi.” Koko Amɔsɛ akasambisha nto ate ase Isariyɛlɛ tshɛ wayokalola le Nzambi wayɔtshɔkwama. Mbokɛmaka hwe dia Amaziya akate akambo wele bu tshɛ mɛtɛ l’oyango wa Lɛɛta shimba olimu w’esambishelo wakakambaka Amɔsɛ.
18. Ngande wafɔna toho takakambe la Amaziya la tɔnɛ takamba l’ewandji w’ɛtɛmwɛlɔ ɛlɔ kɛnɛ?
18 Onde nyambɛna woho wafɔna toho ta kolonganya akambo takakambe la Amaziya la tɔnɛ takamba l’andɔshi w’ekambi waki Jehowa ɛlɔ kɛnɛ? Oko wakalange Amaziya ndiha Amɔsɛ onyɔ di’aha nde sambisha; woho akɔ wâmɛ mbayanga ɛlɔ kɛnɛ asasɛrdɔsɛ, waa evɛkɛ ndo ewandji ekina w’ɛtɛmwɛlɔ dia mbidja wekamu l’olimu w’esambishelo wakamba ekambi waki Jehowa. Amaziya akasɔngwɛ Amɔsɛ akambo wa kashi ɔnɛ nde akɔtwɛ nkumekanga sheke. Ɛlɔ kɛnɛ, ewandji w’ɛtɛmwɛlɔ fundaka Ɛmɛnyi wa Jehowa ɔnɛ vɔ wekɔ anto wele wâle lo kɛnɛ kendana la wɔladi wa wodja. Oko woho wakayange Amaziya ekimanyielo ka nkumekanga lo ta diakandalɔshaka Amɔsɛ, mbele ndo ewandji w’ɛtɛmwɛlɔ vɔ lawɔ nyangaka ekimanyielo k’angɛnyi awɔ w’ase pɔlitikɛ dia pɛnyahɛnya Ɛmɛnyi wa Jehowa.
Atunyi hawokoke memɛ olimu aso w’esambishelo
19, 20. Ngande wakasale Amɔsɛ la ntondo k’ɔlɔshamelo waki Amaziya?
19 Ngande wakasale Amɔsɛ la ntondo k’ɔhɛnyɔhɛnyɔ waki Amaziya? Ntondotondo, Amɔsɛ akambola ɔlɔmbɛdi ate: “We mvutaka wati: Tutaki akambu wahatayi lu dikambu dia Isariyele”? Aha la mengenga, omvutshi waki Nzambi ɔsɔ wa dihonga akatetemala la tɛkɛta akambo wakatonaka Amaziya dia mbaoka. (Amose 7:16, 17) Amɔsɛ komboka wɔma. Ɔsɔ mɛtɛ ekɔ ɛnyɛlɔ ka dimɛna le so! Sho hatotshike dia sambisha Ɔtɛkɛta wa Nzambi, kânga lo wedja wele waa Amaziya wa nshi nyɛ wekɔ lo tɔhɛnyahɛnya woho w’anyanya. L’ɛnyɛlɔ kaki Amɔsɛ, tekɔ lo tetemala mbuta ɔnɛ: ‘Ɔnkɔnɛ mbata Jehowa.’ Ndo atunyi hawokokaki memɛ olimu aso w’esambishelo pondjo, nɛ dia “lunya laki [Jehowa]” lekɔ la so. —Etsha 11:19-21.
20 Amaziya akahombe mbeya dia kɛlɛ kande kɛsɔ kaki anyanya. Amɔsɛ akalembetshiya bonde kele ndoko kânga onto ɔtɔi la lanɛ la nkɛtɛ lakakoke mboshimba dia sambisha ndo ɔsɔ mbele dikambo dia sato diayangaso sɛdingola. Lo ndjela Amose 3:3-8, Amɔsɛ akakambe la wembola ndo bɛnyɛlɔ efula dia mɛnya dia ndoko dikambo diasalema aha la monga la kiɔkɔ yadiɔ. Oma lâsɔ, ko nde mɛnya kɛnɛ kakinde oma la tɛkɛta lo mbuta ate: “Naka tambwe kambudikita, akona ahuki woma? Khumadiondjo [Jehowa ndamɛ] amboteketa, akona aheyi mvuta akambu wahatayi?” L’ɛtɛkɛta ekina, Amɔsɛ akatɛ ampokami ande ate: ‘Oko wele ndoko onto lahahombe mboka wɔma etena kadikita tambwɛ, mbele halakoke tshika sambisha Ɔtɛkɛta wa Nzambi etena kokami Jehowa atoma dia sala dikambo sɔ.’ Wɔma wakandokaka Nzambi, mbut’ate dilɛmiɛlɔ di’efula diaki lande otsha le Jehowa akatshutshuya Amɔsɛ dia sambisha la dihonga.
21. Ngande wasalaso la ntondo ka didjango diaki Nzambi dia sambisha lokumu l’ɔlɔlɔ?
21 Sho lawɔ tekɔ lo mboka woho watotoma Jehowa dia sambisha. Kakɔna kasalaso na? Oko Amɔsɛ ndo ambeki waki Yeso wa ntondo, l’ekimanyiyelo ka Jehowa sho sambishaka Ɔtɛkɛta ande la dihonga. (Etsha 4:23-31) Oyadi ɔhɛnyɔhɛnyɔ w’oma le andɔshi aso kana wendjodi wele l’anto wasambishaso, hawokoke todiha enyɔ di’aha sho sambisha. Lo mbokoya ohetoheto waki la Amɔsɛ, Ɛmɛnyi wa Jehowa wa l’andja w’otondo wambokeketshama dia tetemala la sambisha lokumu l’ɔlɔlɔ la dihonga. Tekɔ l’ɔkɛndɛ wa mbewola anto dikambo di’elanyelo ka Jehowa kayaye. Ngande wayonga elanyelo kɛsɔ na? Wombola ɔsɔ wayokadimwama lo sawo diayela.
Ngande Wayoyokadimola?
• L’atei w’ekakatanu akɔna wakakotsha Amɔsɛ ɔkɛndɛ wakawosha Nzambi?
• Oko Amɔsɛ, losango lakɔna lahombaso sambisha?
• La dionga diakɔna diahombaso kamba olimu aso w’esambishelo?
• Lande na kele andɔshi hawokoke memɛ olimu aso w’esambishelo?
[Osato wa lo lɛkɛ 6]
Nzambi akasɔnɛ Amɔsɛ, omamudi wa fingo dia sala olimu Ande
[Osato wa lo lɛkɛ 9]
L’ɛnyɛlɔ kaki Amɔsɛ, onde wɛ ekɔ lo sambisha losango la Jehowa la dihonga?