Esambishelo koleki woke kahatasalemaka lo andja!
Aya ɛnɔnyi ndekana 100 wamboyakongɛ Ɛmɛnyi wa Jehowa dia sambisha lokumu l’ɔlɔlɔ. (1 Kor. 9:23) Lo esambishelo koleki woke kahatasalemaka lo andja kɛsɔ, tekɔ lo mbewoya anto losango lɔsɔ lo ɛtɛkɛta nkama. Sho mbewoyaka losango lɔsɔ lo wedja ndekana 230. (Mat. 24:14) Ko lande na kele olimu ɔsɔ ohomba? Ndo ngande wasalemawɔ lo andja w’otondo?
Vidɛo kele l’ɔtɛ a dui ɔnɛ: Les Témoins de Jéhovah : organisés pour prêcher la bonne nouvelle kadimolaka ambola asɔ lo tɛnya dimɛna dimɛna akambo efula wendana la olimu aso wakambema lo andja w’otondo. Etena kendayɛ vidɛo kɛnɛ, sɛdingola ambola anɛ: 1) Ngande wakongɛma ndo walɔmbwama olimu aso? 2) Ngande wakimanyiya departɛma diendana la Ofundelo, la Okadimwelo, la Osangelo w’asango ndo diendana la Ɔlɔngɔswɛlɔ w’awui wele lo waa kasɛtɛ ndo lo waa bandɛ vidɛo dia mbewoya lokumu l’ɔlɔlɔ? 3) Naa oyango watondjawɔ ndo wakahanyawɔ ekanda efula? (Joa. 17:3) 4) Ekanda engana watondjama lo ɔnɔnyi ɔtɔi? 5) Olimu akɔna wambokamba ekanda aso walembetshiya Bible? (Heb. 4:12) 6) Kakɔna kasalema dia kimanyiya wanɛ wahɛnyi ndo wahoke la wetshelo w’oma lo Bible? 7) Oma lende aya falanga yakambema olimu aso? 8) Wahɔ akɔna wakondjaso oma lo Departɛma diendana la awui wa lo mpitadi, Departɛma diendana l’awui w’esambishelo ndo Departɛma diendana la nsanganya ya weke? 9) Oko weyɛ Ɔmɛnyi ɔmɔtshi wa Jehowa, ngande wambohamia vidɛo kɛnɛ eokelo kayɛ ndo lowando layɛ a) lo welo wadja okongamelo waki Jehowa dia sambisha lokumu l’ɔlɔlɔ? b) le olekanyi nkumbo 100 ya Bɛtɛlɛ ya lo andja w’otondo? c) lo ekongelo ka wetshelo washama le emendji la waa misiɔnɛrɛ? d) lo ohomba wa tatɛka lushi tshɛ la ɔsɛdingwelo wa divɛsa dimɔtshi dia lo Bible ndo lo nɔngɔsɔlaka nsanganya ya lo etshumanelo lomingu tshɛ? e) lo wahɔ wakondjaso lo mbɔtɔka lo nsanganya yaso y’Akristo? f) lo kɛnɛ kayolembetshiya Paradiso ka la nkɛtɛ? (Is. 11:9) g) lo woho wahomba onto l’onto mbisha lonya lo olimu wa dinela watatetemala salema?—Joa. 4:35.
Etombelo akɔna w’ɛlɔlɔ wakayakondja etena kakayɛnya ewotɔ ayɛ, angɛnyi ayɛ, anto watoyosalaka waendelo w’eyoyo ndo ambeki ayɛ wa Bible vidɛo kɛnɛ? Lande na kahayɛnya onto ɔmɔtshi vidɛo kɛnɛ ndo mbosambisha lokumu l’ɔlɔlɔ aha la tshimbatshimba?—Mat. 28:19, 20.