Dihomɔ diasha wetshelo, di’emula nsaki, ndo diakeketsha
1 Diɔ mbetshaka anto dimɛna awui wendana la Bible ndo l’Ɛmɛnyi wa Jehowa. Diɔ diakatshutshuya anto efula dia shikikala l’akambo wa mɛtɛ. Diɔ diakakeketsha mbetawɔ ndo lowando l’ekambi waki Nzambi. Naa dihomɔ sɔ na? Dihomɔ diakɔ ko bandɛ video yatondja ɔlɔngɔswamelo wa Jehowa. Onde wɛ amboshilaka menda bandɛ yakɔ dikumi? Nshi yakɔna yakatakome ndjienda? Onde wɛ kambaka la yɔ l’esambishelo? Wakatewoya otombelo wa bandɛ video ka dikumi l’ɔtɔi, kele l’ɔtɛ a dui ɔnɛ: Toute la communauté de nos frères (Nkumbo Kaso k’Otondo k’Anto l’Ɔnango), lo losanganya la distrikɛ. Onde wɛ ambosalaka kɔmandɛ ka bandɛ kakɔ? Ngande wakokayɛ kondja wahɔ w’efula oma lo dihomɔ nɛ di’amɛna efula na?
2 Sawo dia lo Tshoto y’Etangelo ya Ngɔndɔ k’Esambele 1, 1999, diele l’ɔtɛ ɔnɛ: “Nyêkake Ɔtɛkɛta Waki Nzambi Mbala la Mbala lo Nkumbo” diakalɔmbɛ nkumbo tshɛ dia “mbetshaka wenya ɛmɔtshi wa lo wekelo awɔ wa lo nkumbo dia menda etenyi ka bandɛ kɛmɔtshi ka video kaki Société . . . ko l’ɔkɔngɔ vɔ ndjɔkɛtshanya awui akɔ.” Lo ndjela dako dia dimɛna sɔ, tayɔkɛtshanyaka dia bandɛ video ɔtɔi lo Losanganya l’Olimu l’oseka ngɔndɔ kina tshɛ yayaye. Tambokeketsha os’etshumanelo tshɛ dia tendji bandɛ video kayɔtɛkɛtama dikambo diatɔ la ngelo la ntondo ka Losanganya l’Olimu.
3 Ngɔndɔ kɛnɛ tayotatɛ la bandɛ video kakatombe ntondo, Les Témoins de Jéhovah - Un nom, une organisation. Têndji ndo tahokame bandɛ kɛnɛ la ntondo woho wa wɛ ndjeya kadimola lo wembola ɛnɛ:
◼ Lo dikambo diakɔna diamboleka mbeyama Ɛmɛnyi wa Jehowa?
◼ Dikambo tshɛ diasalema lo Bɛtɛlɛ mbɔtɔnɛka la divɛsa diakɔna?
◼ Osato akɔna wakɔndɔla kɛnɛ kele lo Bible wakayɛnyi wasanga, w’ɔsa fɔtɔ ndo wadja alangi dia ndjokamba la wɔ l’ekanda?
◼ Kakɔna kakakotola yambalo yayɛ lo mɛna woho wafundama ekanda wakiso?
◼ Ntatɛ oma l’ɔnɔnyi wa 1920 polo wa 1990, Société akatondja ekanda engana?
◼ Waa na waleka sɔnama oma l’atei w’ekambi waki Nzambi dia tokamba lo Bɛtɛlɛ?—Tuk. 20:29.
◼ L’akambo akɔna wele nkumbo ka Bɛtɛlɛ mbishaka Ɛmɛnyi wa Jehowa tshɛ ɛnyɛlɔ ka dimɛna efula?
◼ Kakɔna kakambiya lo menda olimu wakambema lo Bɛtɛlɛ l’oyango wa minanda anto efula la lokumu l’ɔlɔlɔ?
◼ Oma lende aya akuta wakambema olimu wa l’andja w’otondo?
◼ Olimu akɔna wahombaso sukɛ l’ohetoheto ndo la woho akɔna wa yimba?—Joa. 4:35; Etsha 1:8.
◼ Akanyiyayɛ lo kɛnɛ kendana l’ɔlɔngɔswamelo wele la lokombo laso?
◼ Ngande wakokayɛ kamba la bandɛ video kɛnɛ l’esambishelo?
Lo Ngɔndɔ ka Dikumi l’Ahende tayɔtɛkɛta dikambo dia bandɛ video, La Bible : Un récit historique exact, des prophéties biblique.