Vidɛo kele l’ɔtɛ a dui ɔnɛ: Les Témoins de Jéhovah : organisés pour proclamer la bonne nouvelle

Aya ɛnɔnyi ndekana 100 wamboyakongɛ Ɛmɛnyi wa Jehowa dia nsambisha lokumu l’ɔlɔlɔ. Lo tshimbo y’olimu w’esambishelo wakambaso l’andja w’otondo lo yoho yewɔ watakambemaka ndoko lushi, tekɔ lo mbewoya anto losango lɔsɔ lo ɛtɛkɛta nkama ndo lo wedja ndekana 230. (Mat. 24:14) Ko lande na kele olimu ɔsɔ ohomba? Ndo ngande wasalemawɔ lo andja w’otondo? Vidɛo kele l’ɔtɛ a dui ɔnɛ: Les Témoins de Jéhovah : organisés pour proclamer la bonne nouvelle kadimolaka ambola asɔ lo tɛnya dimɛna dimɛna akambo efula wendana la olimu aso wakambema l’andja w’otondo. Etena kendayɛ vidɛo nyɛ, sɛdingola ambola anɛ:

Ngande wambokokimanyiya vidɛo nyɛ dia wɛ ndeka nshihodia ndo monga la lowando l’efula 1) lo welo wadja okongamelo wa Jehowa dia nsambisha lokumu l’ɔlɔlɔ? (2 Tim. 4:2) 2) le nkumbo ya Bɛtɛlɛ ya l’andja w’otondo? 3) l’olowanyelo walonga waa misiɔnɛrɛ ndo emendji? (2 Tim. 2:2) 4) l’ohomba wa tatɛka lushi tshɛ l’ɔsɛdingwelo wa divɛsa dimɔtshi ndo nɔngɔsɔlaka nsanganya ya l’etshumanelo lomingu tshɛ? (Etsha 17:11) 5) l’ɛlɔlɔ wakondjaso lo mbɔtɔka lo nsanganya yaso y’Akristo? (Heb. 10:24, 25) 6) l’ɛtshɔkɔ wayotokondja lam’ayokoma nkɛtɛ kɛnɛ Paradiso? (Is. 11:9) 7) lo diɛsɛ diele la so dia ntetemala mbisha lonya l’olimu wa dinela?—Joa. 4:35.

Vidɛo nyɛ yekɔ ehomɔ ka dimɛna efula dia nkimanyiya anto wayasha l’akambo wa mɛtɛ dia vɔ mbeya dimɛna olimu wakambema l’andja w’otondo oma le Ɛmɛnyi wa Jehowa. 8) Etena kakɔna kakokaso mɛnya ambeki aso wa Bible, ewotɔ ndo anto akina vidɛo nyɛ? 9) Etombelo akɔna w’ɛlɔlɔ wakayakondja etena kakayɛnya anto asɔ vidɛo nyɛ?

Naka sho nkana yimba lo kɛnɛ kasala Jehowa, kete tayotshutshuyama dia mbuta oko omembi w’esambo lakate ate: “We [Jehowa, Nzambi k]ami, akambu wa mamba wakayatshi, la tukanyi takayakani lu dikambu diasu, weko efula; nduku ledimi la ye.” (Osam. 40:5) Nyɛsɔ tokambe dimɛna la vidɛo nyɛ dia nkimanyiya anto akina dia vɔ mɛnya lowando lawɔ otsha le Jehowa ndo otsha le okongamelo ande!