Tokeketsha wanɛ wele la etema wambatɛ
1 Lo ɔkɔndɔ w’anto w’otondo, ndoko etena kaki ohomba w’efula wa keketsha anto oko nshi nyɛ. Lo ɛnyɛlɔ ka Nkumekanga kaso Kristo Yeso, sho lawɔ tekɔ l’olimu wa “nkonoya akanga w’etema wambate.”—Is. 61:1.
2 Woho wa keketsha anto: Dia keketsha anto, olimu aso w’esambishelo pombaka monga la mbɔtwɛlɔ kele la wɛdimo ndo kakeketsha. Naka hatoleke tɛkɛta di’awui wa kɔlɔ wasalema lo andja ɔnɛ ndo dia wetshelo wa kashi, kete tayoleka tɛkɛta di’akambo wa mɛtɛ wele lo Afundelo ndo di’elongamelo k’alaka waki Nzambi wakeketsha. Dui sɔ halembetshiya dia hatohombe sawola la anto dia Aramangɛdɔna. Ɔkɛndɛ aso ele wa sambisha “di’eleku ka ngandji ka mamba ka [Jehowa] la dia lushi l’esombweyo ka [Nzambi k]asu,” ndo dia “mbewula [onto a kɔlɔ] uma lu mbuka kandi ka kolo.” Koko, ɔhɛmwɛlɔ wendana la Aramangɛdɔna ndo ɔsɛdingwelo wa etombelo wa wolo efula w’oma lɔkɔ hawombe dinyadinya ɔtɛ a dui wa lokumu l’ɔlɔlɔ la Diolelo diaki Nzambi.—Is. 61:2; Ezek. 3:18; Mat. 24:14.
3 Lo soko la soko: Mbala la mbala, sho tanaka anto wambɔkɔmɔ l’ɔtɛ wa hemɔ, nyɔi ka lakiwɔ ɔmɔtshi la ngandji, awui wa dɛngiya ndo ekakatanu wendana la ekondjelo. Oko wokoyaso Kristo, sho mbokaka wanɛ wasambishaso ‘kɛtshi’ ndo ngandji. (Luka 7:13; Romo 12:15) Kânga mbayotadia divɛsa ɔtɔi kana ahende wɔtɔnɛ la okakatanu ande, sho pombaka monga ‘suke dia mpokamɛ,’ ndo tshikɛ onto diaaso dia nde mbuta woho wayaokande. (Jak. 1:19) L’ɔkɔngɔ wa mbohokamɛ ntondo, sho mbeyaka ndjonga l’akoka wa mbokeketsha.
4 Lo etena kakoka lo sawo, wɛ mbeyaka mbuta ɔnɛ: “Dimi nangaka kahana layɛ tokanyi tɔmɔtshi takeketsha t’oma lo Bible.” Sho pombaka kamba la ɛnɛlɔ kaso k’ɔlɔlɔ diaha manya kanyi tshɛ ya kɔlɔ yakoka onto mbuta. Koko, oyango aso pombaka monga wa keketsha ndo samba anto lo kamba la Afundelo. Lo dikambo sɔ, wɛ mbeyaka menda dibuku Comment raisonner à partir des Écritures, lɛkɛ 119-122, l’ɛse k’ɔtɛ a dui wata ɔnɛ: “Ekeketshelo.” Kana wɛ mbeyaka mbela ompokami kɔpi kɛmɔtshi ka traktɛ Ekimanyelo le wane wambokomo alemba ndo nyɔsɛdingole awui wakeketsha wele lɔkɔ.
5 Toyange waaso wa keketsha anto akina: Onde wɛ mbeyaka wonyayɛ ɔmɔtshi, osekayɛ la la kalasa kana onto ɔmɔtshi la lo nkumbo kanyu lele l’ohomba w’ekeketshelo? Lande na kahayadje welo dia membola anto asɔ lawakawɔ la oyango wa mbasha ekeketshelo k’oma lo Afundelo? Lo mbeya lande na kewɔ l’ohomba w’ekeketshelo, wɛ kokaka ndjalɔngɔsɔla lo dikambo diakɔ dia lânde. Lo dikambo sɔ, anto amɔtshi wakafunde mikanda kana wakelɛ anto lo telefɔnɛ. Ngandji ka mɛtɛ ka wonyaso onto ayototshutshuya dia sho mbaoka ngandji ndo mbasha ekeketshelo kahombama k’oma lo Afundelo.—Luka 10:25-37.
6 Eelo, tekɔ l’ɔkɛndɛ wa samba wanɛ walela, keketsha wanɛ wambɔkɔmɔ ndo mbaɛnya elongamelo kendana la nshi yayaye ya dimɛna efula. Anto wa lo andja w’otondo wekɔ l’ohomba w’ekeketshelo kɛsɔ. Sawola la anto la ɔngɛnɔngɛnɔ tshɛ lo kɛnɛ kendana la awui w’ɔlɔlɔ efula wakatolake Nzambi, ayosamba ndo ayosha wanɛ wele l’etema w’ɛlɔlɔ elongamelo. Nyɛsɔ tohɔke nshi tshɛ ohomba wa keketsha wanɛ wele la etema wambatɛ.—Is. 61:1.