Ekadimwelo lo ambola anyu

◼ Ekanda ehende akɔna wahombaso mbekaka la ambeki aso wa Bible?

Dibuku Bible etshatɔ mbele ehomɔ ka ntondo katatɛso ndo kalɔmbɔlaso wekelo wa Bible. Naka nyambotatɛ wekelo wa Bible lo okanda okina, ɛnyɛlɔ oko traktɛ kɛmɔtshi kakoka, kete aha la tshimbatshimba nyosale la wolo dia nyu tatɛ mbeka dibuku Bible etshatɔ naka kokaka. Etombelo wa lânde wakakondjama lo kamba la dibuku Bible etshatɔ dia tatɛ wekelo.

Naka nyamboshidiya mbeka dibuku Bible etshatɔ ko ombeki ekɔ lo tahame, kete nyu pombaka tetemala la wekelo lo dibuku Tɛmɔla Nzambi. (Kol. 2:7) Lɛkɛ 2 la dibuku nɛ nembetshiyaka oyango wa dibuku diakɔ: “Bible keketshaka anto tshɛ woka Nzambi ngandji dia vɔ ‘shihodia otale la ɔhɔngɔ’ w’akambo ande wa mɛtɛ w’ohomba efula. (Efeso 3:18) Dia kotsha oyango ɔsɔ mbakalɔngɔsɔma dibuku nɛ. Tambolongamɛ dia diɔ diayokokimanyiya dia wɛ pama lo nyuma ndo monga l’akoka wa kɛndakɛnda lo mboka ka mpika katɔla otsha lo lɔsɛnɔ la l’andja w’oyoyo wosembwe waki Nzambi.”

Naka ombeki ambokotsha kɛnɛ kalɔmbama dia batizama la ntondo ka nde shidiya abuku akɔ ahende, kete wekelo pombaka tetemala polo ndo lam’ayoshila dibuku dia hende. Kânga naka ombeki ambobatizama, onto lalɔmbɔla wekelo kokaka mbadia wenya, wendelo w’oyoyo ndo mbâdia oko ombeki. Opandjudi watshindɛ ɔnɛ lalɔmbɔla wekelo ndo lasha kɔmatɛrɛ kokaka nto mbadia wenya.