Tosambe wanɛ walela
1. Lande na kele wanɛ walela wekɔ l’ohomba w’esambelo?
1 Mvusha lakiso ɔmɔtshi la ngandji ekɔ dikambo diasha kandji efula, djekoleko le wanɛ wele bu la elongamelo ka Diolelo. (1 Tes. 4:13) Tena efula, anto ndjambolaka ɔnɛ: ‘Lande na kavɔ anto? Lende atshɔwɔ? Onde lokɛna lakimi la ngandji nto?’ Tayanga mɛna alako amɔtshi wayotokimanyiya dia samba anto wahomana laso l’esambishelo wavusha ewotɔ kana angɛnyi awɔ.—Is. 61:2.
2. Naka ompokami ambototɛ dia nde ekɔ l’otanda, onde sho pombaka mbala tshɛ nyanga dia mbosambisha edja?
2 Lo soko la soko: Onto ɔmɔtshi mbeyaka totɛ dia nde ma la mvusha ose nkumbo ɔmɔtshi. Onde mɛnamaka dia nde ekɔ la lɔkɔnyɔ l’efula? Onde ewotɔ ande wakaye ndjôledia weke tɔɔ la ngelo? Etena kɛsɔ honga dimɛna sho mbôsambisha edja. (Und. 3:1, 7) Ondo sho kokaka mbɛ̂nya kandji kawokaso, mbosha traktɛ, periodikɛ kana biukubuku mɔtshi yakoka ndo ndakana la nde la loshilambo. Oma lâsɔ, sho kokaka ndjokalola lo etena kakoka dia ndeka mbosha esambelo k’oma lo Bible.
3. Naka kokaka, avɛsa akɔna wakokaso mbadiɛ onto lele l’otanda?
3 Lo waaso akina, sho mbeyaka mɛna dia ekɔ dimɛna mbosambisha awui efula. Kânga mbele ɔsɔ bu etena ka manya tokanyi tande ta kɔlɔ, sho mbeyaka mbadiɛ alaka w’oma lo Bible wendana la eolwelo. (Joa. 5:28, 29) Kana sho koka mbɛnya kɛnɛ kata Bible lo dikambo dia eongelo ka wanɛ wavɔ. (Und. 9:5, 10) Ɔkɔndɔ ɔmɔtshi w’oma lo Bible wa eolwelo mbeyaka nto mbosamba. (Joa. 11:39-44) Dui dikina diakokaso sala ele sɛdingola ɛtɛkɛta wɛnya elongamelo kaki la Jɔbɔ, pami ka kɔlamelo le Jehowa. (Jobo 14:14, 15) La ntondo ka sho mbotshika, sho mbeyaka mbosha biukubuku Ngande wayalaso lam’avɔso? kana Etena kavɔ onto ɔmɔtshi lalangayɛ, kana biukubuku kina kana traktɛ kakoka. Kana sho mbeyaka mbotshikɛ dibuku Bible etshatɔ, ko sho kotola yambalo yande lo awui wele lo tshapita 6, ndo mbokana la nde dia ndjɔsɛdingola awui akɔ mbala kayaye.
4. Naa waaso akina wele laso dia samba anto?
4 Lo waaso akina: Naka sawo di’okundelo diayosalema lo Mbalasa ka Diolelo, onde ndo anto wele bu ambetawudi wayoya? Naka ngasɔ, kete kokaka kitsha ekanda washa esambelo dikambo diawɔ. Anto amɔtshi mɛnaka dia ekɔ dimɛna monga la ekanda wahombama lo ahole washimbɛwɔ edo dia mbisha ase nkumbo wambovusha. Lo tena dimɔtshi, nsango ya nyɔi yewoyawɔ lo tita sango akakimanyiya anto amɔtshi dia vɔ fundɛ ase nkumbo wambovusha mukanda wa mbasamba. Lo diaaso dimɔtshi, l’ɔkɔngɔ wa vɔ nongola mukanda wakawadje ndo traktɛ mɔtshi l’etei, pami kɛmɔtshi kakavusha wadɛnde nde la ɔnande la womoto wakatshu laka opandjudi wakâtomɛ mukanda ko wakawombola vate: “Onde wɛ mbakatotomɛ mukanda ɔnɛ? Sho nangaka mbeya awui efula wendana la Bible!” Pami kɛsɔ nde l’ɔnande waketawɔ dia mbeka Bible ndo wakatatɛ mbɔtɔ lo nsanganya ya l’etshumanelo.
5. Lande na kahombaso nyanga waaso wa samba wanɛ wele l’otanda?
5 Undaki 7:2 mbutaka ɔnɛ: “Ntsho utsha lu luudu l’utanda ndeka ntsho utsha lu luudu la dambu ololo.” Mbala efula wanɛ wele l’otanda ndekaka monga suke dia mpokamɛ Ɔtɛkɛta wa Nzambi oleki wanɛ wangɛnangɛna. Sho tshɛ onto l’onto pombaka nyanga waaso wa samba wanɛ wambovusha lakiwɔ la ngandji.