Ekadimwelo lo ambola anyu

◼ Onde ekɔ dimɛna dia ampokami mbidaka nsaka l’ɔkɔngɔ wa sawo tshɛ dia lo Kalasa k’olimu wa teokrasi kana dia lo Losanganya l’olimu?

Etena kakatonge Jehowa nkɛtɛ, ‘tɔɔtɔ ta pindju takade ekoko w’ɔngɛnɔngɛnɔ kâmɛ, ndo ana wa Nzambi tshɛ wakatatɛ mbida nsaka.’ (Jobo 38:7) Andjelo, mbuta ate ana waki Nzambi asɔ wakalangaka tombola Jehowa l’ɔtɛ w’olimu ande wa diambo w’etongelo waki yoho y’oyoyo yakandɛnya lomba, ɔlɔlɔ ndo wolo ande.

Ekɔ dui dia dimɛna dia sho mɛnya lowando laso l’oma k’ɛse otema lo welo wadja anangɛso ndo lo wetshelo washawɔ. Ɛnyɛlɔ, sho mbidaka nsaka mbala efula l’ɔkɔngɔ w’asawo wa lo sɛkɛ ndo wa lo nsanganya ya weke. Asawo asɔ nɔmbaka mbidja welo wa lânde ndo nɔmbaka wenya efula dia nɔngɔsɔla. Woho wadaso nsaka mɛnyaka lowando laso aha tsho l’olimu wa wolo wosadi ɔnɛ losha sawo, koko ndo lo wetshelo watosha Jehowa lo tshimbo y’Ɔtɛkɛta ndo y’okongamelo ande.​—Is. 48:17; Mat. 24:45-47.

Ko kayotota dikambo dia mbida nsaka lo asawo washama lo Kalasa k’olimu wa teokrasi ndo lo Losanganya l’olimu? Ndoko ɔlɛmbɛ washimba dia mbida nsaka naka dui sɔ salema oma k’ɛse otema, ɛnyɛlɔ oko l’ɔkɔngɔ w’ombeki mbisha sawo diande dia ntondo lo kalasa. Koko, wodelo wa nsaka mbeyaka ndjokoma oko mbekelo kɛmɔtshi ko ndjoshisha nɛmɔ. Lâsɔ, hatode nsaka l’ɔkɔngɔ wa sawo tshɛ.

Kânga mbahatahombe mbida nsaka l’ɔkɔngɔ w’asawo tshɛ wa lo Kalasa k’olimu wa teokrasi ndo Losanganya l’olimu, tekɔ la toho tokina takokaso mɛnya lowando laso lo wetshelo ndo lo welo wadja wanɛ washa asawo akɔ. Sho kokaka sala dikambo sɔ lo mpokamɛka atɛkɛtshi la yambalo tshɛ. Ndo l’ɔkɔngɔ wa nsanganya, mbala efula sho mongaka la waaso wa mbisha wanɛ wakasha asawo losaka.​—Ef. 1:15, 16.