Jehowa tolowanyaka dikambo di’olimu w’esambishelo
1. Etena kasha Jehowa anto ɔkɛndɛ, kakɔna kasalande nto?
1 Etena kasha Jehowa anto ɔkɛndɛ ɔmɔtshi, nde mbashaka ekimanyielo kewɔ l’ohomba dia nkotsha ɔkɛndɛ akɔ. Ɛnyɛlɔ, etena kakatɛ Jehowa Nɔa dia nde nsɛla wâto, dikambo diaki Nɔa atasalaka ndoko lushi, Nde akawotɛ woho wakandahombe nsala. (Etat. 6:14-16) Etena kakalongola Mɔsɛ laki olami w’ɛkɔkɔ waki la memakana ɔkɛndɛ wa ntshɔ tɛnana la dikumanyi di’ase Isariyɛlɛ ndo la Farawɔ, Jehowa akôshikikɛ ate: “Okone utshu kakiane, dimi layuyala la unyo aye, layuketsha okone ayuyoteketa.” (Etum. 4:12) Lo kɛnɛ kendana l’ɔkɛndɛ aso wa nsambisha lokumu l’ɔlɔlɔ, Jehowa tetshaka nto woho wahombaso nkamba olimu akɔ. Nde tolowanyaka dikambo di’olimu ɔsɔ lo tshimbo ya Kalasa k’olimu wa teokrasi ndo ya Losanganya l’olimu. Ngande wakokaso nkondja wahɔ oma l’olowanyelo ɔsɔ?
2. Ngande wakokaso nkondja wahɔ oma lo Kalasa k’olimu wa teokrasi?
2 Kalasa k’olimu wa teokrasi: La ntondo ka ntshɔ lo losanganya tshɛ, totadisha ndo toteki awui wayɔtɛkɛtama lɔkɔ. Oma lâsɔ, etena kɛnaso ambeki wɔmbɔla awui asɔ l’asawo awɔ, dui sɔ diayotokimanyiya dia ndowanya diewo diaso dia mbetsha. (Tuk. 27:17) Katotshɔke la dibuku Kalasa k’olimu lo losanganya ndo katofundake towuiwui tɔmɔtshi lɔkɔ. Etena kakamba omendji wa kalasa la diɔ l’ɔkɔngɔ wa sawo di’ombeki tshɛ, tekɛ eshidi l’awui wayotolanga tokamba la wɔ ndo tofunde nɔtɛ mɔtshi l’ehembo wa dibuku diakɔ. Koko, yoho yoleki dimɛna ya nkondja wahɔ oma lo kalasa kɛsɔ ele mbisha lonya lɔkɔ. Onde wɛ ambofundjaka lokombo lɔkɔ? Etena kalongolayɛ sawo, lɔngɔsɔladiɔ dimɛna ndo nkamba la dako diakoshawɔ. Etena keyɛ l’olimu w’esambishelo, nkamba la kɛnɛ kakayeke.
3. Kakɔna kayotokimanyiya dia nkondja wahɔ oma lo Losanganya l’olimu?
3 Losanganya l’olimu: Tayoleka monga l’akoka wa mbohɔ alako washama lo losanganya lɔsɔ naka sho tadisha awui akɔ la ntondo ndo tayalɔngɔsɔdi dia tosha kɔmatɛrɛ. Naka tayoshaka kɔmatɛrɛ ya lo tshena pe, kete tayonga l’akoka wa mbisha kɔmatɛrɛ efula. Dja yimba lo wɛnyɛlɔ wasalema ndo kamba l’alako wɛnayɛ dia wayokokimanyiya dia monga manamana l’olimu ayɛ w’esambishelo. Lama kɔpi ka Olimu aso wa Diolelo kele l’asawo w’ohomba wayoyokamba la yɛ lo nshi yayaye.
4. Lande na kahombaso nkamba dimɛna l’olowanyelo wa teokrasi walongolaso?
4 L’ɛnyɛlɔ k’ɔkɛndɛ wakalongola Nɔa nde la Mɔsɛ, ɔkɛndɛ aso wa nsambisha lokumu l’ɔlɔlɔ lo nkɛtɛ k’otondo ekɔ tshondo y’okakatanu. (Mat. 24:14) Sho kokaka ntondoya naka sho ndjaɛkɛ le Jehowa, Ombetsha aso a Woke, ndo naka sho nkamba dimɛna l’olowanyelo watoshande.—Is. 30:20.