Onde wɛ ekɔ lo kamba layɔ dimɛna?

¹ “Lekɔ lo nomɔlɔmɔ dia kamba layɔ l’olimu w’esambishelo!” Ɛtɛkɛta ɛsɔ mbakate kadiyɛsɔ kɛmɔtshi l’ɔkɔngɔ wa nde mbadia Tshoto y’Etangelo ya Ngɔndɔ ka ntondo 1, 2008. Onde wɛ ambɔsɛdingolaka asawo amɔtshi watomba mbala la mbala lo Tshoto y’Etangelo yakahɛso anto ndo onde wɛ ambotana toho takokayɛ kahɛ anto Tshoto y’Etangelo yakɔ l’olimu w’esambishelo?

² “Wetshelo wakondjaso oma le Yeso”: Ondo tambɛna dia sawo sɔ koka tokimanyiya dia sho tatɛ wekelo wa Bible la anto. Naka tatasale ngasɔ, kete tohembe dia mbadiɛ ompokami aso ɔtɛ a dui wa sawo, ndo oma lâsɔ tokotole yambalo yande lo kɛnɛ kakate Yeso lo dikambo kapanda lo ndjela odingɔ wa ntondo. Etena kɛnya onto nsaki mbala ka ntondo kasawolaso lande, tosale la wolo dia tetemala sawola lande lo kamba la ɛtɛ w’awui wahɔnyi wele la ambola watshutshuya onto dia kana yimba. Tɔlɔmbɛ ompokami dia nde mbisha okadimwelo lo ambola. Tolembetshiya lo tshena pe esato wendana la dui diakɔ, oma lâsɔ ko sho mbeta l’odingɔ wayela. Sho koka shidiya ɔkɛtshanyelo wa etenyi ka ntondo ka sawo mbala ka ntondo kasawolaso l’anto ndo etenyi kahende lam’ayotokalola. Toyalɔngɔsɔlɛ dia ndjotetemala la wekelo lo kamba la dibuku Bible etshatɔ.

³ “Akambo w’ohomba wakimanyiya dia nkumbo monga l’ɔngɛnɔngɛnɔ”: Sawo nɛ diekɔ l’oyango wa kimanyiya waomi, waa wadi ndo ambutshi dia vɔ menda woho wakokawɔ kamba l’atɔndɔ wa lo Bible dia kandola ekakatanu wadja wɔladi wa nkumbo lo wâle. Sho kokaka nto kamba la sawo nɛ dia kimanyiya wanɛ wele bu Ɛmɛnyi wa Jehowa dia vɔ mɛna lomba lele lo Bible.​—2 Tim. 3:16, 17.

⁴ Dikambo dia ɛlɔngɔlɔngɔ la esekaseka aso: Sawo diele l’ɔtɛ a dui ɔnɛ: “Dikambo dia ɛlɔngɔlɔngɔ la esekaseka aso” diakalɔngɔsɔma lo woho washa ambadi diaaso dia vɔ kana yimba l’ɛkɔndɔ ɛmɔtshi wa lo Bible ndo lo woho wakokawɔ manyamanya ɔkɔndɔ ɔmɔtshi wa shikaa wele lo Bible. Sho koka kamba l’asawo anɛ dia kimanyiya ɛlɔngɔlɔngɔ l’esekaseka wahomana laso l’olimu w’esambishelo dia vɔ mbeya nɛmɔ di’oshika diele la wekelo w’Ɔtɛkɛta wa Nzambi. (Osam. 119:9, 105) Etena kayotosawolaka l’ambutshi, sho kokaka kɛtshanyaka lawɔ ɔtɛ a dui wata ɔnɛ: “Nyetsha ananyu.” Asawo asɔ kokaka kimanyiya ana w’akɛnda dia vɔ kondja wetshelo w’ohomba lo dikambo dia anto watɛkɛtama lo Bible. Onde tamboyadjɛ oyango wa mbadiaka asawo asɔ kâmɛ la ana aso?

⁵ Asawo akina: Sawo diele l’ɔtɛ a dui ɔnɛ: “Ambola w’oma le ambadi aso” sɛdingolaka dimbola dimɔtshi diakoka wanɛ wele kema Ɛmɛnyi wa Jehowa monyiya. Sho koka mbika epole ɔsɛkɛ lo sawo nɛ etena kashaso anto periodikɛ lo luudu la luudu. Sawo diele l’ɔtɛ a dui ɔnɛ: “Okanda oma le . . . ” ekɔ ɔkɔndɔ wɛnya woho watondoya waa misiɔnɛrɛ ndo Ɛmɛnyi wa Jehowa ekina ekakatanu etena kasambishawɔ. Asawo asɔ kokaka kimanyiya anto wele l’etema w’ɔlɔlɔ dia vɔ mbeya dia lokumu l’ɔlɔlɔ lekɔ lo sambishama lo nkɛtɛ k’otondo lo ekotshamelo ka djembetelo ya wôngelo waki Kristo.​—Mat. 24:3, 14.

⁶ Sawo diele l’ɔtɛ a dui ɔnɛ: “Yasukanya la Nzambi” diɔsama oma lo ekongelo ka wadielo wa Bible ka lo Kalasa k’olimu wa teokrasi kokaka tshutshuya anto wele l’etema w’ɔlɔlɔ dia vɔ nyomoleka mbeka akambo wendana la Jehowa. Sawo diele l’ɔtɛ a dui ɔnɛ: “Tokoya mbetawɔ kawɔ,” diekɔ l’oyango wa kimanyiya anto dia vɔ ndjaɔsa oko wekɔ lo mɛna woho waketaka ɛkɔndɔ wa lo Bible, ndjaɔsa oko anto watɛkɛtama lo Bible, mbuta ate mbɔsa ɛsɔnwɛlɔ awɔ, ekakatanu wakahomana lawɔ ndo mbetawɔ kawɔ.

⁷ Tekɔ l’ɔngɛnɔngɛnɔ dia nongolaka Tshoto y’Etangelo yalɔngɔswama dikambo di’esambishelo mbala nyɛi l’ɔnɔnyi! Ɔnkɔnɛ, nyɛsɔ tomanyamanyake awui wele lo Tshoto y’Etangelo shɔ woho wa sho kamba layɔ dimɛna l’esambishelo.