Etshikitanu w’amɛna wendana la Tshoto y’Etangelo!
1 Lo etatelo k’ɔnɔnyi ɔnɛ, tshumanelo diakalongola diewoyelo dia dimɛna efula di’ɔnɛ: Tatɛ Ngɔndɔ ka ntondo 2008, Tshoto y’Etangelo yayotombaka lo numɛlɔ hiende yotshikitanyi lo ngɔndɔ, mbuta ate numɛlɔ kɛmɔtshi ayongaka dikambo di’anto tshɛ ndo kekina kayongaka paka dikambo dia nkumbo kaso k’Akristo! Ondo wɛ akayambola ɔnɛ: ‘Lo woho akɔna wayotshikitana numɛlɔ hiende shɔ? Wahɔ akɔna wayotokondja lo monga la numɛlɔ hiende yotshikitanyi shɔ? Onde awui amɔtshi w’eyoyo wayonga lo numɛlɔ shɔ?’
2 Etshikitanu: Numɛlɔ ka ngɔndɔ lushi 1, kayelamɛ ɔnɛ Tshoto y’Etangelo y’anto tshɛ. Asawo tshɛ wa lo numɛlɔ kɛsɔ wayɔlɔngɔswamaka dikambo dia wahɔ w’anto tshɛ. Numɛlɔ ka ngɔndɔ nshi 15 kayelamɛ ɔnɛ Tshoto y’Etangelo ya wekelo ndo hatotoshaka anto Tshoto y’Etangelo shɔ l’esambishelo. Yɔ yayongaka la asawo tshɛ wa wekelo wa ngɔndɔ k’otondo kâmɛ ndo asawo akina wele ohomba le Ɛmɛnyi wa Jehowa. Tshoto y’Etangelo y’anto tshɛ yayɔngɛnyangɛnya aha tsho Ɛmɛnyi wa Jehowa, koko djekoleko anto wele bu Ɛmɛnyi wa Jehowa wetawɔ Bible. Koko, Réveillez-vous ! ayotetemala tɛkɛta awui wendana la anto wa weho la weho, mbidja ndo amɔnyɔdi ndo wanɛ wayata ɔnɛ vɔ kema lo ɛtɛmwɛlɔ w’Akristo.
3 Ɛlɔlɔ: Lo numɛlɔ ka wekelo, honga nto ohomba nembetshiya tɔtɛkɛta tele oko “ombatshi mboka” dia kimanyiya wanɛ wele kema Ɛmɛnyi wa Jehowa dia vɔ shihodia. Numɛlɔ kɛsɔ kayonga ndo la awui w’ohomba efula wayɔlɔngɔswamaka dikambo di’Ɛmɛnyi wa Jehowa ndo di’ambeki wa Bible watahame lo nyuma. Ko kayotota dia Tshoto y’Etangelo y’anto tshɛ? Lam’ele asawo ndo yoho y’ofundelo yayendanaka la anto tshɛ, anto wele kema Ɛmɛnyi wa Jehowa wayɔngɛnangɛna mbadia periodikɛ kɛsɔ oma k’etatelo polo ekomelo. Lo mɛtɛ, Ɔmɛnyi wa Jehowa tshɛ ayokondjaka wahɔ lo mbadiaka numɛlɔ tshɛ. Lam’ele tayoshaka anto paka Tshoto y’Etangelo ɔtɔi la Réveillez-vous ! ɔtɔi ngɔndɔ tshɛ l’esambishelo, tayongaka la ngɔndɔ k’otondo ka nɔngɔsɔlaka mbɔtwɛlɔ y’eshika.
4 Awui w’eyoyo: Awui amɔtshi w’eyoyo w’amɛna efula wayotombaka lo Tshoto y’Etangelo y’anto tshɛ. Sawo dimɔtshi diayɔtɛkɛtaka dia wetshelo w’etatelo wa lo Afundelo lo yoho ya wɔdu efula. Sawo dikina diayɛnyaka woho wakoka Bible kimanyiya nkumbo. Wayodjɛka ɛlɔngɔlɔngɔ la esekaseka awui amɔtshi wendana la wekelo wa Bible. Numɛlɔ tshɛ kayongaka la sawo dimɔtshi diayɔtɔtɔmiyaka avɛsa amɔtshi wa shikaa watetsha awui wendana la lonto laki Jehowa.
5 Sho nɔmbaka Jehowa dia nde tshɔkɔla yɛdikɔ y’oyoyo shɔ yendana la Tshoto y’Etangelo. Jehowa akimanyiya dia periodikɛ kɛsɔ kâmɛ ndo Réveillez-vous !, ndeka munanda anto wele la etema w’ɛlɔlɔ dia vɔ mpokamɛ lokumu l’ɔlɔlɔ.—Mat. 10:11.