Tetsha anto akina dia vɔ mboka Jehowa ngandji
1. Kakɔna kakotola anto amɔtshi oya le Jehowa?
1 Onde wɛ akôhɔ mbala ka ntondo kakayoke anto watɛkɛta dia Jehowa? Onde dui sɔ mbakakokotola oya lende? Anto efula wele l’etema w’ɛlɔlɔ wayokotɛ dia vɔ wakakotwama oya le Otungi aso etena kakaweke akambo efula wendana la waonga ande wa lânde, djekoleko kɛtshi ndo ngandji kande.—1 Joa. 4:8.
2, 3. Ngande wakokaso kamba la dibuku Bible etshatɔ dia sho kimanyiya ambeki wa Bible dia vɔ fudia ngandji kokawɔ Jehowa?
2 ‘Ɔnɛ ele Nzambi kaso’: Dibuku Bible etshatɔ tɛkɛtaka dia ngandji ka Jehowa ndo dia ohomba wa onto monga la diɔtɔnganelo di’oshika lam’asande la nde. Ngande wakokaso kamba la dibuku sɔ dia mbetsha anto akina woho wa vɔ fudia ngandji kokawɔ Nzambi? Etena kakɛtshanyaso dikambo di’oyoyo, sho kokaka mboka ombeki dimbola dimɔtshi diakoka mbotshutshuya dia nde kana yimba, ɛnyɛlɔ oko: “Kakɔna kɛnya dikambo dia mɛtɛ nɛ lo kɛnɛ kendana la Jehowa?” kana “Lo yoho yakɔna yɛnya dikambo nɛ ɔnɛ Jehowa ekɔ Shɛso koleki tshɛ dimɛna kakoka onto monga la ohomba ande?” Mbetsha lo yoho shɔ kokaka kimanyiya ombeki dia nde tatɛ monga la diɔtɔnganelo dia pondjo la Jehowa.
3 Etena kakimanyiyaso ambeki wa Bible dia vɔ mɛna dia ekɔ tshondo ya diɛsɛ dia vɔ mbeka dia mbeya Nzambi ɔtɔi ka mɛtɛ ndo kasɛna, vɔ wayoyokoma lo ndjota ɛtɛkɛta waki Isaya ɛnɛ: ‘Ɔnɛ ele Nzambi kaso.’ (Is. 25:9) Etena kalembetshiyaso Ɔtɛkɛta waki Nzambi, sho pombaka mbikaka epole ɔsɛkɛ lo woho wakoka anto wa l’andja w’otondo tshɔkwama oma lo okotshamelo wa sangwelo diaki Jehowa lo tshimbo ya Diolelo diande diele l’anya waki Kristo Yeso.—Is. 9:6, 7.
4, 5. Kakɔna kalembetshiya mboka Jehowa ngandji?
4 Djembetelo ya ngandji kokaso Jehowa: Sho mbeyaka dia nanga Jehowa la otema aso tshɛ, la anima aso tshɛ ndo la yimba yaso tshɛ nɔmbaka akambo efula, koko aha tsho monga la nsaki ya wolo lo dikambo dia Nzambi. Sho pombaka mbetawɔ ndo monga la yoho y’ekanelo ka yimba kele oko kande. (Osam. 97:10) Ngandji mɛnamaka oma lo woho watetemalaso kitanyiya wadjango ande ndo watetemalaso monga la ‘etsha wa lɔkɛwɔ l’ekila ndo la ditshelo di’anto wamamema Nzambi,’ oyadi kânga tekɔ lo diɛnɛ la ehemba ndo la ɔlɔshamelo.—2 Pet. 3:11; 2 Joa. 6.
5 Ekɔ tshondo y’ɔngɛnɔngɛnɔ dia sala lolango laki Nzambi l’ɔtɛ wa ngandji kawokaso. (Osam. 40:8) Ombeki wa Bible la dia shihodia dia wadjango tshɛ waki Nzambi wekɔ dia ɔlɔlɔ wa pondjo w’ekambi ande. (Euh. 10:12, 13) Onto mɛnyaka lowando l’efula lele la nde lo dikambo di’etsha wa diambo waki Jehowa lo nsɛna lo yoho yɔtɔnɛ la ɛlɔmbwɛlɔ Kande. Tokimanyiya ambeki wa Bible dia vɔ shihodia dia kɛndakɛnda lo mboka yosembwe yaki Jehowa kokɛka onto oma lo akambo wa pâ efula.
6. Ɛtshɔkɔ akɔna wakoka nongola wanɛ woka Jehowa ngandji?
6 Wanɛ woka Nzambi ngandji tshɔkwamaka: Jehowa ndjakiyanyaka efula lo dikambo di’anto wele la okitshakitsha wawoka ngandji ndo nde mbashwɛka ‘akambo woshami etale waki Nzambi.’ (1 Kor. 2:9, 10) Diɛsɛ oma lo ewo kɛsɔ kendana la asangwelo waki Jehowa, vɔ mbeyaka kɛnɛ kayosalema lo nshi yayaye ndo wekɔ la elongamelo ka shikaa. (Jer. 29:11) Jehowa mongaka la lɔsɛngɔ otsha le wanɛ wawoka ngandji. (Etum. 20:6) Vɔ wekɔ la elongamelo ka ndjɔsɛna pondjo pondjo nɛ dia Nzambi mbaokaka ngandji k’efula.—Joa. 3:16.
7. Ngande wayaokayɛ lo kɛnɛ kendana la mbetsha anto akina dia vɔ mboka Jehowa ngandji?
7 Lo yɛdikɔ yayotoleka mbeya akambo wendana la Shɛso lele l’olongo, mbayotoleka mbatɛ anto akina. (Mat. 13:52) Ekɔ mɛtɛ diɛsɛ dia woke efula dia sho mbetsha anto akina, djekoleko anaso dia vɔ mboka Jehowa ngandji! (Euh. 6:5-7) Nyɛsɔ sho tshɛ kâmɛ la ambeki aso wa Bible totetemale tombola Jehowa l’ɔtɛ wa “ololo [ande] waheyama mvuta.”—Osam. 145:7.