Lushi la lânde la nɔmba anto dia mbeka la wɔ Bible
1 Tatɛ Ngɔndɔ ka ntondo, etshumanelo tshɛ kayɔsɔnaka wikɛndɛ ɔtɔi ngɔndɔ tshɛ, mbala mɔtshi wikɛndɛ wa ntondo dia ndjasha lo nɔmbaka anto dia mbeka la wɔ Bible. Dui sɔ diayosalemaka Lushi la samalo kana la lomingu lo ndjela lushi loleki ɔlɔlɔ le etshumanelo. Lo lushi lɔsɔ, naka ampokami wambotona dia sho mbeka la wɔ Bible, kete apandjudi mbeyaka mbasha dibuku Bible etshatɔ kana periodikɛ yeke katomba. Dikumanyi la ekambi wakimanyiya tshɛ pombaka ndjalɔngɔsɔla dia ndjasha tshɛ l’olimu ɔsɔ ndo kimanyiya apandjudi dia tatɛ mbeka l’anto Bible.
2 Kɔmite k’olimu ka l’etshumanelo kayoshikikɛ lo wikɛndɛ akɔna wayowɔsɔnaka lushi layowɔlɔmbaka anto dia mbeka la wɔ Bible. Waohwelo wayoshamaka tena la tena dia apandjudi mbeya ndjalɔngɔsɔla ndo mbidja welo wa lânde dia nɔmba anto dia mbeka la wɔ Bible etena kasambishawɔ lo luudu la luudu ndo kembolawɔ wanɛ wakɛnya nsaki mbala ketshi.
3 Woho wa ndjalɔngɔsɔla: Sho kokaka tana alako wendana la woho wa tatɛ mbeka l’anto Bible l’okotsha wa Olimu aso wa Diolelo wa Ngɔndɔ ka ntondo 2006 ndo lo lɛkɛ 12 la dibuku Comment raisonner. Amɔtshi mbeyaka mɛna ɔlɔlɔ kamba la traktɛ kɛmɔtshi, ɛnyɛlɔ traktɛ kata ɔnɛ: Onde wɛ nangaka mbeya akambo wa mɛtɛ? Ndo lɛkɛ 3 la Olimu Aso wa Diolelo wa Ngɔndɔ k’enanɛi 2007 mbishaka alako wendana la woho wa tatɛ wekelo wa Bible etena kembolaso wanɛ waketawɔ periodikɛ yaso. Dikumanyi la ekambi wakimanyiya mbayɔlɔmbɔlaka lo tshena pe losanganya l’otsha l’olimu w’esambishelo layɔsaka minitɛ 10 polo 15. Lo losanganya lɔsɔ, dako ɔtɔi kana alako ahende wɛnya woho wa tatɛ mbeka l’anto Bible diayɔkɛtshanyemaka kana sala wɛnyɛlɔ ɔmɔtshi.
4 Lo mɛtɛ, aha anto tshɛ mbayetawɔ dia sho mbeka la wɔ Bible kana tetemala mbeka la wɔ l’etena kɛmɔtshi k’otale. Koko, dui sɔ hadiohombe toshimba dia sho nɔmba anto dia tatɛ mbeka la wɔ Bible, nɛ dia Jehowa mbakotola anto oya l’okongamelo ande. (Joa. 6:44) Ɔkɛndɛ aso kema tsho wa monɛ ntɔngɔ y’akambo wa mɛtɛ, koko ndo wa mbutɛ ashi lo lɔtɔngɔ lambɔsɔnga edio ndo mbeka Bible l’anto walanga mbeya awui wendana la Jehowa. Lo sala ngasɔ, sho mongaka la diɛsɛ dia monga ekambi kâmɛ la Nzambi.—1 Kor. 3:9.