Tongake nshi tshɛ suke dia nɔmba anto
dia sho mbeka la wɔ Bible
1. Kakɔna kahombama dia nkotsha ɔkɛndɛ wakatosha Yeso wele lo Mateu 28:19, 20?
1 Yeso akatosha ɔkɛndɛ wa ‘mbetɛ anto ambeki ndo mbaetsha.’ (Mat. 28:19, 20) Ɔnkɔnɛ, sho pombaka mongaka nshi tshɛ suke dia nɔmba anto dia sho mbeka la wɔ Bible aha paka lushi lakalɔngɔswama dia nɔmba anto dia mbeka la wɔ Bible. Awui wayela anɛ mbeyaka tokimanyiya efula.
2. Anto akɔna wakokaso nɔmba dia mbeka la wɔ Bible?
2 Lɔmba onto dia mbeka la nde Bible: Lo yɛdikɔ yayotoleka nɔmba anto dia mbeka la wɔ Bible, mbayotoleka nkondja anto wa mbeka la wɔ. (Und. 11:6) Onde wɛ ambohembaka shambo ya nɔmba onto dia mbeka la nde Bible mbala kakɔ ɔtɔi? Ase etshumanelo kɛmɔtshi ka lo wodja wa États-Unis wakadje welo dia nsala dikambo sɔ l’edja ka ngɔndɔ k’otondo. Vɔ waki l’ɔngɛnɔngɛnɔ dia ntatɛ mbeka l’anto 42 Bible. Tatɔsake la ntondo di’ɔnɛ onto lasawola la so mbeyaka di’oyango aso ele wa mbeka la nde Bible. Etena kakalolayɛ mbala kekina, lande na kahayɔlɔmbɛ dia mbeka la nde Bible? Tɔkɔmɔke naka nde hetawe mbeka la yɛ Bible. Wɛ kokaka ntetemala nomialomia nsaki kande. Onde wɛ ambɔlɔmbaka asukanyi ayɛ, ewotɔ ayɛ, asekayɛ wa l’olimu ndo wa la kalasa dia kana vɔ wayolanga wɛ mbeka la wɔ Bible? Wɛ kokaka mimbola nto ambeki ayɛ wa Bible kana vɔ wekɔ l’angɛnyi kana ewotɔ wayolanga wɛ mbeka la wɔ Bible.
3. Naa ehomɔ ka dimɛna ka ntatɛ mbeka l’anto Bible kele la so, ndo etena kakɔna kahombaso nkamba la tɔ?
3 Ehomɔ ka dimɛna efula: Ehomɔ ka dimɛna kele la so ka ntatɛ mbeka l’anto Bible ele traktɛ kele l’ɔtɛ a dui ɔnɛ: Onde wɛ nangaka mbeya akambo wa mɛtɛ? Wɛ kokaka mbisha anto wasambishayɛ traktɛ kakɔ oyadi vɔ mbetawɔ ekanda aso kana bu. Wɛ kokaka nsala dikambo sɔ etena kasambishayɛ l’ɛtshi ka nkɛtɛ k’amundji w’okanda, kasambishayɛ lo toshinga, katomɛyɛ anto mikanda ndo kasalayɛ waendelo w’eyoyo. Sho mbeyaka kitshikɛ nto anto wahatatanyi lawakawɔ. Lande na kahayatshu la tɔ etena keyɛ lo mutuka, katayasombe diangɔ kana keyɛ l’olimu? Awui wofundami l’ɔkɔngɔ wa dikatshi di’ekomelo mɛnyaka lo tshena pe yoho yekaso l’anto Bible ndo mbɔtshiyaka dibuku Bible etshatɔ.
4. Ngande wakokaso nkamba la traktɛ Mbeya akambo wa mɛtɛ dia ntatɛ mbeka l’onto Bible?
4 L’ɔkɔngɔ wa mbisha onto traktɛ, wɛ mbeyaka mbotshumɛ lohita lo ambola wele lo lɛkɛ la ntondo ndo mbombola ɔnɛ: “Naa dimbola dialeka kɔngɛnyangɛnya lo ambola anɛ?” Oma lâsɔ, nyɔsɛdingole okadimwelo wele lo traktɛ ndo nyadia kana ta awui wele l’ɔkɔngɔ wa dikatshi di’ekomelo wɛnya woho wekaso l’anto Bible. Wɛ kokaka mbɛnya nto lɛnɛ akokande ntana akambo amɔtshi wendana l’ɔtɛ a dui ɔsɔ lo dibuku Bible etshatɔ. Shande dibuku diakɔ ndo nyokane dia nyu ndjotetemala nsawola.
5. Lande na kahombaso monga suke dia nɔmba anto dia mbeka la wɔ Bible?
5 Ɛtshi kaso ka nkɛtɛ kekekɔ l’anto wakombola mbeka kɛnɛ ketsha Bible mɛtɛ. Lo monga suke dia nɔmba anto dia mbeka la wɔ Bible, tayoleka monga la waaso wa nkondja ɔngɛnɔngɛnɔ wa nkimanyiya anto dia vɔ mbɔtɔ lo mboka ka lɔsɛnɔ.—Mat. 7:13, 14.