Losanganya la distrikɛ l’Ɛmɛnyi wa Jehowa la lo 2009
1. a) Ɛtshɔkɔ akɔna wayotokondja naka sho monga nshi yakɔ shato lo Losanganya la distrikɛ? b) Ɛlɔngɔswɛlɔ akɔna wahombaso sala oma ko kakianɛ?
1 Sho tshɛ tekɔ lo kongɛ Losanganya la distrikɛ la lo 2009 ndo waaso w’eyoyo wa tshumana l’asekaso watombola Jehowa oko sho ‘weya ehomba awɔ wa lo nyuma.’ (Mat. 5:3) Oko wayaleke sukana lushi la Jehowa, sho keketshaka onto tshɛ dia monga nshi yakɔ shato dia kondja wahɔ w’efula oma lo lɔngɛnyi la dimɛna efula l’Akristo ndo oma l’ekeketshelo ka lo nyuma kayotolongola dia ntshikala nge lo mbetawɔ. (Zef. 1:14) Embetsha ndo ewandji aso w’olimu weye dia losanganya la woke lɔsɔ lekɔ etenyi kɛmɔtshi k’ohomba k’ɔtɛmwɛlɔ aso. La dihonga tshɛ, toyalɔngɔsɔlɛ kɔ̂lɔmɔ ndo toyange ɛtshɔkɔ wa Jehowa, ko nde ayotosukɛ.—Is. 50:10.
2. Naka hawotele lo nsanganya ya wedja efula, naa nsanganya yele oko ya wedja efula yalongamɛso dia mbɔtɔ?
2 Nsangaya ya weke ya wedja efula: Lam’ele nsanganya shɔ yayosalema paka lo wedja kana l’esomba ɛmɔtshi eto, paka wanɛ wayelamɛ lo nsanganya shɔ mbahomba ndjiɔtɔ. Naka sho nɛmiya yɛdikɔ shɔ, kete tayewɔ diaha lofulo l’anto ndjotamba olelo. (1 Kor. 14:40; Heb. 13:17) Koko, nsanganya efula ya distrikɛ yayonga oko nsanganya ya wedja efula nɛ dia waa misiɔnɛrɛ efula, ase Bɛtɛlɛ wakamba lo wedja ekina ndo ekambi weteta wakamba lo wedja efula wayɔtɔ onto l’onto lo losanganya la woke layosalema lo wodja awɔ.
3. Ngande wakokaso mɛnya ngandji k’Okristo le anto amɔtshi wa l’etshumanelo kaso?
3 Tokimanyiya anto akina dia mbɔtɔ: Onde anto amɔtshi wa l’etshumanelo kanyu wekɔ l’ohomba w’ekimanyielo kanyu dia mbɔtɔ lo losanganya la woke? Etena kakimanyiyaso anto akina dia mbɔtɔ lo nsanganya shɔ, sho mɛnyaka dia ‘hatoke washo paka lo wahɔ aso hita, koko ndo lo wahɔ w’anto akina.’—Fil. 2:4.
4-6. a) Awui akɔna w’ohomba wahombaso nama lo yimba etena kayangaso pango ndo lande na? b) Tɛdikɔ takɔna tahomba mbɔsama naka anangɛso la akadiyɛso wambohanga lo Mbalasa ka Diolelo? c) Naa awui amɔtshi wahomba sɛdingɔma dia mbɔtɔ lo Losanganya la distrikɛ? (Enda kiombo yele lo lɛkɛ 4.)
4 Ohangelo: Mbala efula ahole w’ohangelo wa l’osomba wasalema losanganya mongaka lo mvudu y’anto (mvudu ya anangɛso la akadiyɛso), lo Mbalasa ya Diolelo kana laka ase nkumbo. Listɛ l’ahole tshɛ wayosalema nsanganya ya weke layohanema lo dibaya diahanɛwɔ waewoyelo l’etshumanelo l’ɔkɔngɔ wa sɛdingola dikatshi di’okotsha nɛ lo Losanganya l’olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande mbɔtɔ Losanganya la distrikɛ la l’ɔnɔnyi 2009.
5 Naka nyayolanga tohanga laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litomɛ Departɛma diendana l’ohangelo l’osomba wasalema losanganya. Lo listɛ lɔsɔ, nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde la onto akɔ naka laka owotɔ ande mbayondotohanga. Kɛsɔ ayokimanyiya anangɛso wakamba lo Departɛma di’ohangelo dia vɔ kondja etena ka nyangɛ anto tshɛ pango. Kɔmite k’olimu ka l’etshumanelo pombaka sɛdingola dionga di’opandjudi la ntondo ka toma listɛ lo Departɛma diendana l’ohangelo. Naka wambotɛnya pango, kete hatonga dimɛna dia sho shoamɛ ndjayangɛ dihole dikina dia todjasɛ laka ɔnangɛso okina kana laka ɔngɛnyi aso. Kɛsɔ ayetɛ ɔkɛndɛ wa anangɛso wakamba lo Departɛma diendana l’ohangelo wotsho. Koko, naka onto ayotodjasɛ nshi ya losanganya laka ose nkumbo kande lele bu ɔnangɛso la lo nyuma, kete atokimɔke lokombo lande le sekeletɛlɛ dia nde mbodja lo listɛ l’anto walɔmba pango.
6 Tambolanga nyosha alako amɔtshi wendana la ohangelo wa lo Mbalasa ka Diolelo. Kɔmite ka Losanganya la distrikɛ ayɔsɔna ekumanyi kɛmɔtshi dia mendaka dikambo sɔ. Nde ayonga la okimanyedi, ndeka dimɛna ekumanyi kekina kana okambi wakimanyiya wele la lonyuma la dimɛna ndo wakoka. Mbalasa la dia kahanyema lo tenyi pende: Etenyi kɛmɔtshi dikambo di’akadiyɛso l’anawɔ ndo ana wa wamato ndo etenyi kekina dikambo di’anangɛso la ana w’apami. Mbalasa ka Diolelo ayonga paka dikambo dia ndalaka tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla olimu wa djamu ko anto mengɔnyaka diaha wovi ndjova diangɔ di’anto. Anangɛso wele la lonyuma la dimɛna mbahomba sala olimu wa djamu ɔsɔ. Ndoko onto lahomba katɛ l’etei ka Mbalasa ka Diolelo. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo dia anto katɛka paka lo nshi yasalema losanganya. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo sɛkɛ diatɔ mongaka wonya tshɛ pudipudi ndo kɔmba. Pombaka menda ɔlɔlɔ diaha ndanya ndoko ɛngɔ ɔtɔi ka lɔkɔ. Wanɛ wayohanga lo mbalasa wayosala la wolo tshɛ dia monga la lɔkɛwɔ l’ɔlɔlɔ lakoka le Akristo wa mɛtɛ lam’asawɔ ndo otsha le asukanyi.—1 Kor. 10:31.
7. Lo dikambo diakɔna diahombaso ndjakiyanya ntondo etena kayalɔngɔsɔlaso dia mbɔtɔ lo Losanganya la distrikɛ la lo 2009?
7 Etsha watombola Nzambi: Etena kakɛnɛmɔlaso olowa wa nyuma l’akambo tshɛ wasalaso, lo ndeka mbidja yimba lo ɛtɛkɛta ndo lo lɔkɛwɔ laso, etena kakambaso kâmɛ l’anto akina wa lo dihole diasalema losanganya la woke, sho salaka dia ekambi waki Jehowa mandɔma ndo sho mbewɔka dia takanya anto akina. (1 Kor. 10:31; 2 Kor. 6:3, 4) Tosale dia wɔtwɛlɔ ndo lɔkɛwɔ laso tombola Nzambi lo toho tɔsɔ lo Losanganya la distrikɛ la lo 2009!—1 Pet. 2:12.
[Kiombo ya lo lɛkɛ 3]
Ekongelo ka wenya:
Lushi la nɛi (Nsanganya ya wedja efula tsho)
1:20 wa l’ɔkɔngɔ a midi - 4:55 wa dikɔlɔ
Lushi la tanu ndo la Samalo
9:20 wa pindju - 4:55 wa dikɔlɔ
Lushi la lomingu
9:20 wa pindju - 4:00 wa dikɔlɔ
[Kiombo ya lo lɛkɛ 4]
Awui amɔtshi wa sɛdingola dia mbɔtɔ lo Losanganya la distrikɛ:
◼ Naka wɛ pombaka minda lɔkɛndɔ l’otale dia tɔɔtɔ lo Losanganya la distrikɛ, kete tatɛ momba falanga ya lɔkɛndɔ ndo y’olelo ayɛ wɛ la nkumbo kayɛ lɛkɔ.
◼ Kanyokanyiya nto dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu dia nɛmɔ.’—Euh. 16:16; Tuk. 3:9.
◼ Lo wonya wa losanganya, sho tombolaka lokombo la Jehowa oma lo lɔkɛwɔ l’ɔlɔlɔ ndo oma l’ɔlɔtɔ aso wa pudipudi ndo wa kɔmba.—1 Kor. 10:31.
◼ Ntsha tshɛ dia ndjela kɛnɛ kata anangɛso walongola anto ndo wele la ɔkɛndɛ wa mbisha anto ahole. Tâmbɛke ahole wamambɛ onyake paka dikambo di’ase nkumbo kayɛ kana dia wanɛ woye la yɛ.
◼ Dia wɛ kondja wahɔ efula oma lo etenyi ka l’ɔkɔngɔ a midi, tɔlɛke diangɔ dia wotsho lo wonya wa diomuyelo nɛ dia mbo ya ndɛ ya wotsho koka kosha djɔ.—Luka 8:18.
◼ Pudipudi tombolaka Jehowa. L’ekomelo k’etenyi tshɛ ka losanganya, onto l’onto koka mbisha lonya dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadjaka l’ahole wakalɔngɔswama dia mbikadjaka mindo.—1 Pet. 1:15, 16.