Losanganya la distrikɛ la Ɛmɛnyi wa Jehowa la l’ɔnɔnyi 2008
1. a) Lande na kele dako diakasha Paulo Akristo w’ase Hɛbɛru diekɔ ohomba wa lânde ɛlɔ kɛnɛ? (Adia Heberu 10:24, 25.) b) Diaaso diakɔna diayonga laso dia kamba la dako diaki Paulo?
1 Ɔpɔstɔlɔ Paulo akakeketsha Akristo w’ase Hɛbɛru dia sanganaka kâmɛ ndo keketshanaka ndo ‘ndeka ntsha ngasɔ’ etena kɛnawɔ dia lushi lakɔ laya suke. (Heb. 10:24, 25) Tolembetelo tekɔ lo taleke mɛnama tɛnya dia “lushi” lakatɛkɛtaka Paulo lɔsɔ laya suke! Omalɔkɔ, sho nyangaka waaso wa sangana kâmɛ la anangɛso la akadiyɛso dia kondja wetshelo wa lo nyuma wakoka tɔlɔmbɔla lo “nshi y’ekumelu” ya kɔlɔ efula nyɛ. (2 Tim. 3:1) Tayonga la diaaso dia ngasɔ lo nsanganya ya distrikɛ yayosalema lo ɔnɔnyi 2008.
2. a) Lande na kele ekɔ ohomba mbɔtɔ lo losanganya la woke nshi yakɔ shato? b) Ngande wahombaso tatɛ ndjalɔngɔsɔla dia mbɔtɔ lɔkɔ?
2 Tonge nshi yakɔ shato: Sho kokeketshaka dia wɛ monga lawɔ nshi yakɔ shato. Naka ‘hatohekɔ dia sanganaka kâmɛ,’ kete hatotohandja diangɔ dia ndɛ dia lo nyuma di’ohomba efula. (Heb. 10:25) Aha la tshimbatshimba, tatɛ ndjalɔngɔsɔla kakianɛ. Wɛ ayokombola mbewoya owandji ayɛ w’olimu la ntondo dia naka kokaka nde sala etshikitanu wahombama. Naka anayɛ wayonga la kalasa nshi ya losanganya lanyu, kete ewoya embetsha awɔ kɛnɛ kambonyokongɛ. Ewoyawɔ dia losanganya lanyu la woke lasalema ɔnɔnyi tshɛ lekɔ etenyi kɛmɔtshi k’ɔtɛmwɛlɔ anyu. Wɛ kokaka ndjashikikɛ dia Jehowa ayɔtshɔkɔla welo wadjayɛ dia mbetsha wahɔ wa Diolelo lo dihole dia ntondo.—Mat. 6:33.
3. Lo toho takɔna takokaso mɛnya dia sho ndjakiyanyaka dikambo di’anto akina?
3 Tokimanyiya anto akina dia vɔ mbɔtɔ: Paulo akasɛngasɛnga nto anango dia vɔ ‘kananɛ onto la wonyande.’ (Heb. 10:24) Onde anangɛso l’akadiyɛso wa lo olui anyu wa Wekelo wa dibuku wa l’etshumanelo wekɔ l’ohomba w’ekimanyielo dia mbɔtɔ lo losanganya la woke? Onde wɛ kokaka kimanyiya ambeki ayɛ wa Bible dia vɔ monga kâmɛ la yɛ lo losanganya, oyadi kânga wayonga l’akoka wa monga lawɔ paka lushi ɔtɔi? Etena kewoyayɛ ewotɔ ayɛ wele kema ambetawudi dia losanganya la woke, lɔmbawɔ dia vɔ ndjɔtɔ kâmɛ la yɛ. Welo wa la ngandji wadjayɛ mbeyaka kela ɛtshɔkɔ wahayalongamɛ.
4. Lande na kahombaso mbɔtɔ losanganya layɔtɔ etshumanelo kaso?
4 Tɔtɔ lo losanganya layɔtɔ etshumanelo kaso: Listɛ l’ahole tshɛ wayosalema nsanganya ya weke layohanema lo dibaya diahanɛwɔ waewoyelo l’etshumanelo l’ɔkɔngɔ wa sɛdingola dikatshi di’okotsha nɛ lo Losanganya l’olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande mbɔtɔ losanganya la distrikɛ la l’ɔnɔnyi 2008. Dia ndjashikikɛ ɔnɛ ahole wa mbidjasɛ, abuku, pango ndo awui akina wayonga lo yɛdikɔ yakoka, wɛ keketshamaka dia mbɔtɔ lo losanganya layɔtɔ etshumanelo kanyu. Koko, naka akambo wele layɛ hakosha diaaso dia wɛ mbɔtɔ losanganya layɔtɔ etshumanelo kanyu, kete lam’alangayɛ tengengake dia mbɔtɔ lo losanganya lokina.
5. Awui akɔna w’ohomba wahombaso nama lo yimba etena kayangaso pango, ndo lande na?
5 Ohangelo: Naka nyayolanga tohanga laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litomɛ Departɛma diendana l’ohangelo l’osomba wasalema losanganya. Lo listɛ lɔsɔ, nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde la onto akɔ naka laka owotɔ ande mbayondotohanga. Kɛsɔ ayokimanyiya anangɛso wakamba lo Departɛma di’ohangelo dia vɔ kondja etena ka nyangɛ anto tshɛ pango. Kɔmite k’olimu ka l’etshumanelo pombaka sɛdingola dionga di’opandjudi la ntondo ka toma listɛ lo Departɛma di’ohangelo. Naka wambotɛnya pango, kete hatonga dimɛna dia sho shoamɛ ndjayangɛ dihole dikina dia todjasɛ laka ɔnangɛso okina kana laka ɔngɛnyi aso. Kɛsɔ ayetɛ ɔkɛndɛ wa anangɛso wakamba lo Departɛma di’ohangelo wotsho. Koko, naka onto ayotodjasɛ nshi ya losanganya laka ose nkumbo kande lele bu ɔnangɛso la lo nyuma, kete atokimɔke lokombo lande le sekeletɛlɛ dia nde mbodja lo listɛ l’anto walɔmba pango.
6. a) Tɛdikɔ takɔna tahombama mbɔsama naka anangɛso la akadiyɛso wambohanga lo Mbalasa ka Diolelo? b) Naa awui amɔtshi wahomba sɛdingɔma dia mbɔtɔ lo losanganya la distrikɛ? (Enda kiombo “Awui amɔtshi wa sɛdingola . . . ”)
6 Tambolanga nyosha alako amɔtshi wendana la ohangelo wa lo Mbalasa ka Diolelo. Kɔmite ka losanganya la distrikɛ ayɔsɔna ekumanyi kɛmɔtshi dia mendaka dikambo sɔ. Nde ayonga la okimanyedi, ndeka dimɛna ekumanyi kekina kana okambi wakimanyiya wele la lonyuma la dimɛna ndo wakoka. Mbalasa la dia kahanyema lo tenyi pende: Etenyi kɛmɔtshi dikambo di’akadiyɛso l’anawɔ ndo ana wa wamato ndo etenyi kekina dikambo di’anangɛso la ana w’apami. Mbalasa ka Diolelo ayonga paka dikambo dia ndalaka tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla olimu wa djamu ko anto mengɔnyaka diaha wovi ndjova diangɔ di’anto. Anangɛso wele la lonyuma la dimɛna mbahomba sala olimu wa djamu ɔsɔ. Ndoko onto lahomba katɛ l’etei ka Mbalasa ka Diolelo. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo dia anto katɛka paka lo nshi yasalema losanganya. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo sɛkɛ diatɔ mongaka wonya tshɛ pudipudi ndo kɔmba. Pombaka menda ɔlɔlɔ diaha ndanya ndoko ɛngɔ ɔtɔi ka lɔkɔ. Wanɛ wayohanga lo mbalasa wayosala la wolo tshɛ dia monga la lɔkɛwɔ l’ɔlɔlɔ lakoka le Akristo wa mɛtɛ lam’asawɔ ndo otsha le asukanyi.—1 Kor. 10:31.
7. a) Lo toho takɔna takokaso tombola Jehowa etena kɔtɔso lo nsanganya yaso? b) L’ɔtɛ wa lɔkɛwɔ l’ɔlɔlɔ l’anangɛso, kakɔna kakate anto amɔtshi wakaye lo losanganya ndo jɛra mɔtshi ya lo ɔtɛlɛ?
7 Elimu w’ɛlɔlɔ: Kitanyiya didjango diaki Jehowa dia sangana kâmɛ dia tɛmɔla tokimanyiyaka dia sho ‘ndjakondjiyɛ wahɔ.’ Kɛnɛ koleki ohomba ele, dui sɔ toshaka diaaso dia sho tombola lokombo la Jehowa. (Is. 48:17) ‘Etsha aso w’ɛlɔlɔ mɛnamaka lo sɛkɛ’ le anto efula lo nsanganya ya distrikɛ ndo amɔtshi wakatshutshuyama dia mbuta woho wayaokawɔ. (1 Tim. 5:25) Etena kakendaka pami kɛmɔtshi anangɛso wakakitaka mukubu lo sɛkɛ dia losanganya, nde akate ate: “Etena kɛnami esato wendana la paradiso wele lo ekanda anyu, dimi lakataka mbala tshɛ ɔnɛ ‘Ɛmɛnyi wa Jehowa alɔ mɛtɛ mbɛnawɔ’. Koko kakianɛ, dimi mɛnaka dia vɔ kokaka kadimola nkɛtɛ paradiso!” oma lâsɔ, nde akawasha alɛmbɔlɛmbɔ lo mbuta ɔnɛ: “Lam’alanganyu, nyɔsɛ, dimi lawɔ kombolaka mbisha lonya l’olimu ɔnɛ.” Lo osomba ɔmɔtshi wasalema nsanganya aya ɛnɔnyi efula, jɛra y’ɔtɛlɛ ɔmɔtshi akasuya ate: “Anto efula wa l’osomba ɔnɛ tɛkɛtaka dikambo di’Ɛmɛnyi wa Jehowa ndo dia kɛnɛ kalembetshiya nsanganya yawɔ le so. Sho mbeyaka woho wayetɛka anto anyu ahole walowɛwɔ dia sala nsanganya ya weke pudipudi ndo sho mɛnaka woho wayowetɛka waa parkingɛ pudipudi. Ekɔ mɛtɛ ɔngɛnɔngɛnɔ efula dia monga l’anto anyu lo nshi y’ɔwɔ. Sho nongamɛka dia sho kokaka tetemala monga la diɔtɔnganelo diaso lo nshi yayaye.” Dionga di’anangɛso diakonya anto lo mbuta ngasɔ ndo lo mbuta kɔmatɛrɛ efula ya woho ɔsɔ ngɛnyangɛnyaka otema wa Nzambi kaso Jehowa!
8. Ngande watɔtɔmiya Mateu 4:4 ohomba wa mbidjaka yimba lo tenyi diakɔ tshɛ dia losanganya?
8 Yeso akate dia nsɛnɔ yaso nemanɛka la mpokamɛ “aui tshe watumba uma l’unyo wa [Jehowa].” (Mat. 4:4) Lo nsanganya yaso yasalema ɔnɔnyi tshɛ, Jehowa toshaka ‘mbo ya ndɛ ya lo nyuma’ yatɔlɔngɔsɔlɛ ‘ɔhɔmbɔ wa kɔlamelo ndo wa kɛsɔ lo tena diahombama.’ (Mat. 24:45) Olimu efula salemaka dia tɔlɔngɔsɔlɛ ndo tosha lokema la mbo ya ndɛ ya lo nyuma shɔ. Tɛnya lowando laso lo woho wayakiyanya Jehowa la ngandji tshɛ lo monga lawɔ ndo mbidjaka yimba lo tenyi diakɔ tshɛ dia losanganya.
[Kiombo ya lo lɛkɛ 3]
Ekongelo ka wenya:
Lushi la tanu ndo la samalo
9:20 la pindju - 4:55 l’ɔkɔngɔ a midi
Lushi la lomingu
9:20 la pindju - 4:00 l’ɔkɔngɔ a midi
[Kiombo ya lo lɛkɛ 4]
Awui amɔtshi wa sɛdingola dia mbɔtɔ lo losanganya la distrikɛ:
1. Naka wɛ pombaka minda lɔkɛndɔ l’otale dia tɔɔtɔ lo losanganya la distrikɛ, kete tatɛ momba falanga ya lɔkɛndɔ ndo y’olelo ayɛ wɛ la nkumbo kayɛ lɛkɔ.
2. Kanyokanyiya nto dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu dia nɛmɔ.’—Euh. 16:16; Tuk. 3:9.
3. Lo wonya wa losanganya, sho tombolaka lokombo la Jehowa oma lo lɔkɛwɔ l’ɔlɔlɔ ndo oma l’ɔlɔtɔ aso wa pudipudi ndo wa kɔmba.—1 Kor. 10:31.
4. Ntsha tshɛ dia ndjela kɛnɛ kata anangɛso walongola anto ndo wele la ɔkɛndɛ wa mbisha anto ahole. Tâmbɛke ahole wamambɛ onyake paka dikambo di’ase nkumbo kayɛ kana dia wanɛ woye la yɛ.
5. Dia wɛ kondja wahɔ efula oma lo etenyi ka l’ɔkɔngɔ a midi, tɔlɛke diangɔ dia wotsho lo wonya wa diomuyelo. Nɛ dia mbo ya ndɛ ya wotsho koka kosha djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto koka mbisha lonya dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.