Onde wɛ kokaka tshikitanya ekongelo kayɛ?
1. Lande na kahombaso tshikitanya ekongelo kaso k’esambishelo?
1 Oko weso Akristo, sho taketawɔ leeta la monga “amundji w’antu.” (Mat. 4:19) Oko amundji wa nse wa mɛtɛ mɛtɛ, sho kokaka kondja etombelo w’ɛlɔlɔ l’olimu wa munda anto, naka sho kongɛ wenya aso dia sambisha lo tena diatanema anto lawakawɔ. Lo wenya w’akɔlɔ, anto efula tanemaka lawakawɔ. Mbala efula vɔ hawonge la elimu wenya ɛsɔ ndo vɔ mbeyaka monga suke dia nongola angɛndangɛnda. Onde wɛ kokaka tshikitanya ekongelo kayɛ dia sambisha wenya ɛsɔ?—1 Kor. 9:23.
2. Naa toho tɔmɔtshi takokaso sambisha anto efula lokumu l’ɔlɔlɔ?
2 Esambishelo ka la dikɔlɔ: Ndjalɔngɔsɔla la ntondo dia sambisha lo wenya w’akɔlɔ ayotokimanyiya dia sambisha anto efula lokumu l’ɔlɔlɔ. (Tuk. 21:5) Akɛnda kokaka sambisha l’ɔkɔngɔ wa vɔ tomba oma la kalasa. Anto akina kokaka sambisha naka wambokawola oma l’elimu. Elui ɛmɔtshi wa wekelo wa dibuku koka ndjalɔngɔsɔla dia sambishaka kânga wonya ɔtɔi a tango la ntondo ka wekelo wa dibuku.
3. Lo toho takɔna takokaso sambisha lo wenya w’akɔlɔ l’ɛtshi kaso ka nkɛtɛ?
3 Esambishelo ka lo luudu la luudu lo wenya w’akɔlɔ ayotokimanyiya dia sho sawola l’anto wahaleke tanema wenya ekina lawakawɔ. Lo bɛtshi dia nkɛtɛ efula, esambishelo ka l’ɛsɛsɛ la ka lo ahole watanema anto efula koka nto salema lo wenya w’akɔlɔ. Ndo anto efula mɛnaka dia la dikɔlɔ mboleki etena ka dimɛna ka sala waendelo w’eyoyo ndo tatɛ mbeka l’anto Bible.
4. Lande na kele ekɔ ohomba monga la shɛnɔdi ndo kanɛka anto akina etena kasambishaso la dikɔlɔ?
4 Shɛnɔdi yekɔ ohomba: Ekɔ ohomba monga la shɛnɔdi etena kasambishaso la dikɔlɔ. Tena efula, ndeka dimɛna kumiya esambishelo naka wonya aya tosho ta shimba, lo dihole dia tetemala polo wonya wayanga ampokami aso ndala. (Fil. 4:5) Lam’akɔkɔlayɛ lo soko, emala lam’akokawɔ kɛna ndo keya esadi. Tɛwɔ oyango woyeyɛ ndjowaenda aha la tshimbatshimba. Naka wɛ amboyohomana l’etena kewɔ la wosanu, oko wonya wele nkumbo k’otondo wekɔ lo ndɛ, kete lɔmbawɔ dia nyu ndjosawola wonya okina. Paka wɛ kanɛka anto akina.—Mat. 7:12.
5. Ngande wakokaso mbewɔ wâle wakoka tokomɛ l’esambishelo?
5 Sho pombaka mbeya nto wâle wakoka tokomɛ. Naka nyekɔ lo tasambisha la dikɔlɔ di’otsho, kete ndeka dimɛna nyu tetetaka anto ahende ahende kana lo djui. Nyete l’ɛsɛsɛ wele bu wodjima efula. Nyosambisha paka l’ahole weyanyu dia bu wâle. Nyewɔ ahole wakoka monga wâle naka aya wodjima.—Tuk. 22:3.
6. Naa ɔlɔlɔ okina wakokaso kondja lo sambishaka la dikɔlɔ ndo la dikɔlɔ dia yɔɔ?
6 Esambishelo ka la dikɔlɔ dia yɔɔ toshaka diaaso dia sambisha la ambatshi mboka wa tshanda ndo wa pondjo. (Romo 1:12) Onde wɛ koka tshikitanya ekongelo kayɛ dia sambisha lo yoho shɔ?