Tetsha wanɛ waheye mbadia dimɛna
1. Okakatanu akɔna wakoka pomana la so l’olimu w’esambishelo?
1 Tena efula, etena kasambishaso sho pomanaka l’okakatanu wa mbetsha anto waheye mbadia dimɛna akambo wa mɛtɛ. Akokaso sala na?
2. Ngande ndo lande na kahombaso nɛmiyaka wanɛ waheye mbadia dimɛna?
2 Tâlɛmiyake: Le Jehowa eongelo k’otema w’onto kele ohomba, koko aha kalasa yakandɔtɔ. (1 Sam. 16:7; Tuk. 21:2) Ɔnkɔnɛ, hatohombe mɔnyɔla anto waheye mbadia. Anto asɔ kokaka mbetawɔ ekimanyielo kaso naka sho mbalɛmiya ndo monga la solo dia lotutsha otsha lewɔ. (1 Pet. 3:15) Kɛsɔ mbeyaka nɔmba diaha tɛtɛ dia paka onto mbadia divɛsa kana odingɔ. Etena katatetemala onto mbeka akambo wa mɛtɛ wa lo Bible w’ohomba efula, nde mbeyaka ndjoleka nomɔlomɔ dia mbeya mbadia dimɛna dia nde monga l’ɔngɛnɔngɛnɔ waya lo mbadia Ɔtɛkɛta wa Nzambi la ‘dui di’ɔkɔkɛ la yanyi ndo l’otsho.’—Osam. 1:2, 3.
3. Toho takɔna takokaso kamba la tɔ dia mbetsha wanɛ waheye mbadia?
3 Toho ta mbaetsha Bible: Esato wekɔ dihomɔ di’amɛna diatokimanyiya dia mbetsha anto ndo diɔ kimanyiyaka ɔnɛ leka dia nde kimɛ kɛnɛ kekande. Wɛ mbeyaka mbɔlɔmba dia nde nembetshiya osato wele lo mukanda wekanyu. Oma lâsɔ, oka ambola wa shikaa wakoka mbokimanyiya dia nde shihodia wetshelo wele l’osato. Kamba l’avɛsa wasukɛ wetshelo wele l’osato akɔ. Wɛ kokaka kamba nto l’osato dia mvusola kɛnɛ kekinyu. Tanyekake awui efula mbala ɔtɔi. Ka epole ɔsɛkɛ l’ɔtɛ a dui ndo l’akambo woleki ohomba wa lo wekelo ndo ewɔ dia mbidja awui wahendana la wekelo akɔ. Kadiake avɛsa mbala kakɔ ɔtɔi oma lo Bible ndo kokambake la ambola dia ndjashikikɛ dia kana nde amboka kɛnɛ kadishayɛ. Sala ngasɔ mbeyaka fudia nsaki kande ka mbeya mbadia dia ndamɛ mbeya nyangiayangia akambo wa mɛtɛ wele lo Bible.
4. Ngande wakokaso kimanyiya ambeki aso dia vɔ mbeya mbadia dimɛna?
4 Dihomɔ diakimanyiya dia mbeya mbadia dimɛna: Onto laheye mbadia dimɛna kana laki komonga la diaaso dia mbeka woho wa mbadia mbeyaka shihodia ndo kimɛ awui dimɛna. Wɛ mbeyaka keketsha anto asɔ dia vɔ mpokamɛka dimɛna dimɛna ambadi w’eshika etena katawende lo abuku awɔ ndo katawokoya la dui di’ɔkɔkɛ kɛnɛ katadia ambadi akɔ. Dui sɔ ayowakimanyiya dia vɔ mbeya mbadia dimɛna. Biukubuku Eka woho wa mbeya mbadia la funda mbeyaka nto kokimanyiya. L’ahole amɔtshi, dikumanyi mbeyaka nto nɔngɔsɔla kalasa ya mbeya mbadia la funda l’etshumanelo. Alako w’eshika asɔ mbeyaka tokimanyiya dia sho kimanyiya wanɛ waheye mbadia dimɛna dia vɔ shihodia “afundelu w’ekila” wakoka mbakimanyiya dia vɔ kondja panda.—2 Tim. 3:15.