Sho mɛnyaka ngandji kokaso Nzambi l’olimu aso w’esambishelo
1. Ngandji kaki la Yeso otsha le Nzambi kakotshutshuya dia sala na?
1 Ngandji kakatshutshuya Yeso dia sambisha. Toho tshɛ t’olimu w’esambishelo takakambe la Yeso takɛnyaka hwe ngandji kakandokaka Jehowa. Yeso akate ate: “Dimi latutshaka uku elembe wakambisha Papa, dia wa la kete weyi vati: Dimi latulangaka Papa.” (Joa. 14:31) Oko weso ambeki waki Yeso, sho lawɔ tekɔ la diɛsɛ dia kɛnɛmɔla ngandji k’efula kokaso Nzambi l’olimu aso w’esambishelo.—Mat. 22:37; Ef. 5:1, 2.
2. Shɛngiya yakɔna yele la ngandji ka Jehowa l’olimu aso w’esambishelo?
2 ‘Lokombo layɛ lakidiame’: Etena kakambaso la waaso tshɛ dia mbewoya anto akina akambo wendana la Jehowa ndo la Diolelo diande, sho mɛnyaka ngandji kokaso Nzambi ndo lo sala ngasɔ, tekɔ lo mbisha lonya dia lokombo lande kidiama. (Osam. 83:18; Ezek. 36:23; Mat. 6:9) Oko wakidiɔ lo dikambo di’olimu waki Yeso, mbele ndo sho mɛnyaka oma l’olimu aso w’esambishelo nsaki ka l’otema ɔtɔi kele laso ka kidia lokombo laki Jehowa ndo sala lolango lande.—Mat. 26:39.
3. Lo yoho yakɔna yatokimanyiya ngandji kokaso Jehowa dia tondoya wekamu?
3 Ngandji totshutshuyaka dia tondoya wekamu: Ngandji kokaso Jehowa bu l’elelo. (1 Kor. 13:4, 7) Yeso akahomana la awui efula wa lo lɔsɛnɔ lande wakakoke mboshimba dia nde sambisha. Koko, etena kakandahomanaka l’ekakatanu, ngandji ndo nsaki k’efula kaki la nde ka sala lolango laki Jehowa kakokimanyiyaka dia nde tondoya ekakatanu tshɛ. (Mako 3:21; 1 Pet. 2:18-23) Sho lawɔ pomanaka l’ekakatanu efula wele ngandji kokaso Nzambi kokaka tokimanyiya dia mbatondoya. Lo ndjela dimɛna ɛnyɛlɔ kakatotshikɛ Kristo, sho mbeyaka monga la dihonga ndo sala kɛnɛ tshɛ kakokaso sala l’olimu aso. Kânga mbele ɔlɔshamelo wa lo nkumbo, hemɔ, lotshundu kana wendjodi w’anto wasambishaso wekɔ la shɛngiya le so, awui asɔ hawokoke toshimba dia sho kɛnɛmɔla ngandji kokaso Jehowa lo sambisha l’ohetoheto tshɛ.
4. Diɛsɛ diakɔna diatosha ngandji kokaso Jehowa?
4 Ngandji kekɔ la nkudu k’efula ndo tekɔ la dikoka dia kɛnɛmɔla ngandji ka l’otema ɔtɔi kokaso Nzambi l’olimu w’esambishelo. (1 Kor. 13:13) Lam’ele tekɔ lo tasukana efula l’etena kele lokombo laki Jehowa layokidiama mbala ɔtɔi lo pondjo, nyɛsɔ ‘totetemale pamia ngandji kaso.’—Fil. 1:9; Mat. 22:36-38.