Ɛlɔngɔlɔngɔ L’esekaseka: Nyokondja Ɛlɔlɔ Oma Lo Kalasa Kɔtɔnyu
1 Ngande wakanyiyɛ dia kalola lo kalasa etena kɛnɛ kamboshila vakashi ya woke na? Onde wɛ kongɛka ɔnɔnyi w’oyoyo l’asolo lokoloko dia kondja ɛlɔlɔ w’oma lɔkɔ? Onde wɛ ayokamba la waaso wakondjayɛ la kalasa dia sambisha asekayɛ wa lo kalasa l’embetsha ayɛ? Hatame dia wɛ nangaka ntsha kɛnɛ kɛdimi l’akoka ayɛ la kalasa.
2 Onga Ombeki w’Ɔlɔlɔ: Naka wɛ ayodjaka yambalo dimɛna lam’ekanyu lo kalasa ndo mpokɛ lotui dimɛna, kete wɛ ayokondja ɛlɔlɔ wa pondjo. Kotshake adɛvɔarɛ ayɛ aha la tshimbatshimba, koko tofukutanyake elimu ayɛ wa Teokrasi l’ɔkɔkɔ wa dɛvɔarɛ.—Fil. 1:10.
3 Tatɛ ɔnɔnyi ayɛ w’oyoyo wa kalasa la wadielo wa biukubuku Les Témoins de Jéhovah et l’instruction. L’ɔkɔngɔ, ko wɛ kana ambutshi ayɛ mbisha embetsha ayɛ tshɛ biukubuku yakɔ tshɔi tshɔi. Tɛwɔ ɔnɛ wembola tshɛ wayonga lawɔ wayokadimɔma. Dikambo sɔ diayowakimanyiya dia vɔ nyomoleka shihodia awui ayɛ la dietawɔ diayɛ, ndo hawotokoshimba dia wɛ ndjela mbetawɔ akambo wakayeke. Ndo nto, dikambo sɔ diayowashikikɛ ɔnɛ wɛ l’ambutshi ayɛ nangaka kamba la wɔ kâmɛ, vɔ wanɛ wakokimanyiya dia mbeka mukanda dimɛna.
4 Onga Ɔmɛnyi w’Ɔlɔlɔ: Lande na kahayɔshi kalasa oko mbilo kayɛ ka sambishaka lo tshakitudi na? Ɔnɔnyi ɔnɛ wɛ ayonga la waaso wa lânde wa sambisha. Wɛ ekɔ l’ewo ka dimɛna efula k’akambo wa lo nyuma; lam’ayokidianganya ‘wɛ ayoyashimbela wɛmɛ ndo wanɛ wakolonga.’ (1 Tim. 4:16) Lam’ayoyongaka nshi tshɛ la lɔkɛwɔ l’Okristo l’ɔlɔlɔ ndo ayoyosambishaka tena tshɛ diasungana, wɛ ayokondjaka ɛlɔlɔ, ndo anto akina lawɔ popo.
5 Ɔnangɛso ɔmɔtshi l’ɔlɔngɔlɔngɔ akasambisha asekande wa la kalasa lo tshakitudi. L’atei a wanɛ waketawɔ aki: Oseka Mupɛ ɔmɔtshi, onto ɔmɔtshi lahetawɔ ɔnɛ Nzambi ekɔ ndo laki la mbekelo ka sɔkaka wanɛ wetawɔ Nzambi ndo ɔlɔngɔ ɔmɔtshi wakanɔka fɔka la wanu efula. Ɔnangɛso ɔsɔ akakimanyiya tshɛtshɛ anto 15 dia vɔ ndjakimɔ le Nzambi ndo batizama!
6 Ɔnkɔnɛ, ɛlɔngɔlɔngɔ l’esekaseka, nyekake woho wa sambishaka lo mbilo kanyu ka lânde. Lâsɔ kayonyokondja ɔlɔlɔ woleki tshɛ oma l’otshwelo anyu la kalasa.