Tanyengengake dia nsambisha
1. Kakɔna kalɔmbama dia monga la dihonga ndo lande na?
1 Onde wɛ atengengaka dia nsambisha la kalasa l’ɔtɛ wa wɔma w’ɔnɛ wayokɔnyɔla? Nɔmbamaka mɛtɛ dia monga la dihonga dia nsambisha, djekoleko naka tekɔ kanga ɔsɔnyi. Ko kakɔna kayotokimanyiya?
2. Etena kasambishanyu la kalasa, ngande wakokanyu monga l’ekanelo k’ɔlɔlɔ?
2 Nyonge l’ekanelo k’ɔlɔlɔ: Kânga mbakoka kalasa mbɔsama oko ɛtshi kanyu ka nkɛtɛ, nyohɔ dia hanyohombe nongamɛ dia nyayosambisha onto tshɛ oko wakokanyu nsala etena kasambishanyu lo luudu la luudu. Nyonge l’ekanelo k’ɔlɔlɔ dia nshikikɛ etena kahombanyu ntɛkɛta. (Und. 3:1, 7) Dikambo dia sawola anto wa la kalasa kana devɔara dimɔtshi mbeyaka nyosha diaaso dia nyu nkɛnɛmɔla dietawɔ dianyu. Kana osekanyu ombeki mbeyaka nyombola lande na kahanyasale awui amɔtshi. Akristo amɔtshi wakewoya embetsha awɔ kam’akadihɔ kalasa ɔnɛ vɔ wekɔ Ɛmɛnyi wa Jehowa ndo wakawasha ekanda walembetshiya dietawɔ diaso. Akina wakakitsha ekanda walembetshiya Bible l’ekala wadjasɛwɔ woho wa asekawɔ ambeki mbaoka ambola wendana l’ekanda akɔ.
3. Ngande wakokanyu ndjalɔngɔsɔla dia tosambisha la kalasa?
3 Nyoyalɔngɔsɔlɛ: Naka nyu ndjalɔngɔsɔla, kete wɛkamu anyu wayofula. (1 Pet. 3:15) Ɔnkɔnɛ, nyotakanyiyisha la ntondo ambola wakokawɔ tonyôka ndo woho wakokanyu nkadimola. (Tuk. 15:28) Naka kokaka, nyonge la Bible ndo l’ekanda ɛmɔtshi, ɛnyɛlɔ dibuku Comment raisonner, Les jeunes s’interrogent, ndo ekanda ekina wendana l’etongelo woho wa nyu tenda lɔkɔ naka ohomba wambɛnama. Nyɔlɔmbɛ ambutshi anyu dia vɔ mbidja tenyi dimɔtshi di’ɔkɛtshanyelo ɔsɔ l’ekongelo kanyu ka ɔtɛmwɛlɔ wa lo nkumbo.
4. Lande na kahombanyu ntetemala nsambisha la kalasa?
4 Nyɛnyi akambo la sso di’ɔlɔlɔ: Tanyɔfɔnyake esadi eto ɔnɛ asekanyu wa la kalasa wayonyɔnyɔlaka nshi tshɛ etena kâsambishanyu akambo wa mɛtɛ. Amɔtshi wayonyɔkɔmiya l’ɔtɛ wenyu la dihonga ndo vɔ mbeyaka nyohokamɛ. Koko, tanyɔkɔmɔke naka ndoko onto letawɔ. Jehowa ayɔngɛnangɛna woho wahembanyu dia nsambisha. (Heb. 13:15, 16) Nyotetemale mbɔlɔmba dia nde nyokimanyiya dia nyu ‘ntetemala ntɛkɛta la dihonga.’ (Etsha 4:29; 2 Tim. 1:7, 8) Nyokanyiya ɔngɛnɔngɛnɔ wayonyonga lawɔ etena kayonyohokamɛ onto ɔmɔtshi. Onto ɔsɔ mbeyaka ndjokoma osekanyu okambi wa Jehowa.