Totondoya okakatanu wa sambisha apami
1. Ohomba akɔna wa wanyandja wendana la kokɛ wahɔ wa Diolelo wele nshi nyɛ?
1 Etena katatetemala pama olimu wa Diolelo lo nshi y’ekomelo nyɛ, ohomba w’apami wele l’akoka wa lo nyuma wa nɔmbɔla wekɔ efula. (Mako 4:30-32; Etsha 20:28; 1 Tim. 3:1-13) Koko l’ahole amɔtshi, wamato mbaleka mbetawɔ losango la Diolelo. L’ahole akina, apami mbɔsaka dia wadɛwɔ mbele l’ɔkɛndɛ wa mbisha anawɔ wetshelo wa lo nyuma. Ngande wakokaso ndeka kimanyiya apami dia vɔ mbeya ehomba awɔ wa lo nyuma ndo mbɔtɔ l’ɔtɛmwɛlɔ wa mɛtɛ?
2. Ngande wele welo wakadje Paulo nde la Petero dia sambisha apami waki l’etombelo w’ɛlɔlɔ?
2 Toyange apami: Etena ketawɔ owandji wa nkumbo akambo wa mɛtɛ, mbala efula nde kimanyiyaka ase nkumbo akina dia vɔ mbɔtɔ l’ɔtɛmwɛlɔ wa pudipudi. Ɛnyɛlɔ, etena kakiwɔ lo lokanu l’ɔtɛ w’esambishelo kawɔ, Paulo nde la Silasi wakasambisha olami wa lokanu. Pami kɛsɔ la nkumbo kande k’otondo wakabatizama. (Etsha 16:25-34) Etombelo waki l’esambishelo ka Paulo la Kɔrɛtɔ ele, “Kirispo, uwandji w’etemwelo, aketawo Khumadiondjo, ndu wa lu luudu landi tshe.” (Etsha 18:8) Jehowa akakambe la Petero dia sambisha Kɔnɛliyo owandji w’asɔlayi wata Bible ɔnɛ “ndi aki untu ololo [ndo] akukaka [Nzambi] woma.” Kɔnɛliyo kâmɛ l’ewotɔ ande ndo angɛnyi ande wakabatizama.—Etsha 10:1-48.
3. L’ɛnyɛlɔ ka Filipɛ, anto akɔna wele “lu ahuli wa ladiku” wakokayɛ sambisha?
3 Sambisha apami wele “lu ahuli wa ladiku” mbeyaka monga l’etombelo wahatakoke nongamɛ. (1 Tim. 2:1, 2) Ɛnyɛlɔ, ondjelo ɔmɔtshi waki Jehowa akatɛ Filipɛ dia sambisha ‘pami kɛmɔtshi ka woke’ kakalamaka diangɔ tshɛ dia nkumekanga ka womoto k’ose Etiyɔpiya. Filipɛ “akawuki ala buku di’umvutshi Isaya” ndo nde akolembetshiya lokumu l’ɔlɔlɔ lendana la Yeso. Ose Etiyɔpiya ɔsɔ akayokomaka ombeki waki Jehowa ndo ondo akadianganya lokumu l’ɔlɔlɔ lo mboka etena kakandatakalolaka. Ondo nde akasambisha nkumekanga ka womoto ndo ɛlɔhɛ tshɛ, anto wele ondo komongaka la waaso efula wa mboka lokumu l’ɔlɔlɔ.—Etsha 8:26-39.
4. Ngande wakokaso ndeka mbisha apami waaso wa mboka lokumu l’ɔlɔlɔ?
4 Woho wa sambisha apami efula: Lam’ele apami mongaka mbala efula l’ahole awɔ w’olimu, onde hatokoke ndjalɔngɔsɔla dia sambisha l’akɔlɔ, lo wikɛndɛ kana lo nshi ya fɛtɛ? Sambishaka mbala la mbala l’ahole wanda anto okanda ayotosha waaso akina wa sambisha apami wahaleke tanema lawakawɔ. Anangɛso kokaka nto mbidja welo wa lânde dia sambishaka apami wakamba la wɔ lo tshakitudi. L’esambishelo ka lo luudu la luudu, djekoleko l’ɛtshi ka nkɛtɛ kasambishama mbala la mbala, anangɛso mbeyaka nɔmba dia sawola la kanga ngelo ka pami.
5. Kakɔna kakoka kadiyɛso kahomana la pami kayasha lo losango la Diolelo sala?
5 Kadiyɛso kahomana la pami ketawɔ akambo wa mɛtɛ hahombe kalola ndamɛ dia towenda. Nde mbeyaka ntshɔ l’omɛnde kana l’opandjudi okina. Naka pami kakɔ ekɔ lo tetemala ndjasha l’akambo wa mɛtɛ, kete ayoleka dimɛna mbosha ɔnangɛso ɔmɔtshi lele l’akoka dia vɔ tetemala la wekelo.
6. Ngande wakokaso mbokoya ɔpɔstɔlɔ Paulo dia sho “ndeka mbetawuya antu efula”?
6 Tɔsɔnɛ asawo wangɛnyangɛnya apami: Ɔpɔstɔlɔ Paulo akadjaka yimba le anto wakohokamɛka ndo akɔtɔnganyiyaka wetshelo ande la wɔ dia “ndeka mbetawuya antu efula.” (1 Kor. 9:19-23) Woho akɔ wâmɛ mbele, sho pombaka mbidja yimba lo awui wayoleka ngɛnyangɛnya apami wakoka pomana la so ko sho ndjalɔngɔsɔla lo dikambo sɔ. Ɛnyɛlɔ, apami ndekaka ndjasha l’awui wendana l’ekondjelo, la lowandji la dimɛna ndo la woho wa ndjakokɛ ndo kokɛ nkumbo yawɔ. Vɔ mbeyaka ndjasha nto l’oyango wa lɔsɛnɔ, lo kɛnɛ kayokomɛ nkɛtɛ lo nshi yayaye ndo lo ɔkɔkɔ watshika Nzambi asui. Losango laso la Diolelo layɔngɛnyangɛnya apami naka sho kamba la mbɔtwɛlɔ yendana l’awui asɔ.—Tuk. 16:23.
7. Ngande wakoka ase etshumanelo tshɛ monga la shɛngiya y’ɔlɔlɔ le waomi wele bu ambetawudi wamboya lo losanganya?
7 Tokimanyiya waomi wele bu ambetawudi: Kânga mbele lɔkɛwɔ la dimɛna l’akadiyɛso w’Akristo mongaka mbala efula la shɛngiya ya wolo le waomɛwɔ wele bu ambetawudi, ase etshumanelo akina kokaka nto mbakimanyiya. (1 Pet. 3:1-4) Etena katshindɛ omi lele bu ombetawudi wadɛnde lo nsanganya, woho wolongola ase etshumanelo la waasaso mbeyaka monga esambishelo ka woke le nde. Woho woyende lo losanganya mɛnyaka lo yɛdikɔ mɔtshi woho wayashande l’akambo wa mɛtɛ ndo nde mbeyaka mbetawɔ dia mbeka Bible.
8. Ngande wakoka anangɛso kimanyiya waomi wele bu ambetawudi wahaleke ndjasha l’akambo wa mɛtɛ?
8 Lo wedi okina, waomi amɔtshi wele bu ambetawudi hawoleke ndjasha l’akambo wa mɛtɛ l’etatelo, koko vɔ mbeyaka ndjetawɔ dia mbeka Bible l’ɔnangɛso ɔmɔtshi langɛnangɛnawɔ. Anangɛso wa l’etshumanelo kɛmɔtshi wakadje welo wa lânde dia membolaka tena la tena nkumbo kɛmɔtshi kaki lo ɛtɛmwɛlɔ wotshikitanyi dia tosawola l’omi laki komonga ombetawudi akambo wakaweyaka ɔnɛ nde ndjashaka lɔkɔ. Dui sɔ diakayokonyaka dia vɔ kɛtshanya awui wa lo Bible ndo kakianɛ nde ambobatizama. Lo diaaso dikina, ɔnangɛso ɔmɔtshi akakimanyiya omi ɔmɔtshi laki komonga ombetawudi lo nɔngɔsɔla lokombo lande. L’ɔtɛ wakandayasha le nde l’otema ɔtɔi lo yoho shɔ, nde akayotatɛ mbeka la nde Bible. (Ngal. 6:10; Fil. 2:4) Naka wɛ ekɔ ɔnangɛso l’Okristo, lande na kahayasale la wolo dia kimanyiya omi kana waomi wele bu ambetawudi?
9. Etombelo akɔna wakoka monga naka sho ndowanya apami w’Akristo?
9 Nyolowanya apami w’Akristo dia vɔ ndjɛmba ɛkɛndɛ: Apami wetawɔ losango la Diolelo ndo wele l’ɛkɛndɛ l’olimu waki Jehowa wekɔ l’atei wa ‘apami wele oko weshasha,’ mbuta ate dikumanyi di’Akristo diakamba l’akoka ndo la wolo awɔ lo wahɔ wa tshumanelo di’ekambi waki Jehowa. (Ef. 4:8; Osam. 68:18) Apami asɔ namaka etshumanelo la lolango lawɔ ndo la waasaso. (1 Pet. 5:2, 3) Vɔ mɛtɛ wekɔ tshondo y’ɔtshɔkɔ le nkumbo kaso k’onto l’ɔnango ka l’andja w’otondo!
10. Ngande wele welo wakadje Ananiya dia sambisha Paulo wambokimanyiya anto efula?
10 Ɛnyɛlɔ, Saulo akakome ‘ɔpɔstɔlɔ w’ase Wedja’ kânga mbakandahɛnyahɛnyaka Akristo ntondo. (Romo 11:13) L’etatelo, ombeki Ananiya aki la wɔma dia tosambisha Saulo l’ɔtɛ wa dikambo sɔ. Koko, Ananiya akayele ɛlɔmbwɛlɔ kaki Nkumadiɔndjɔ ko nde akasambisha pami kɛsɔ kakayokomaka ɔpɔstɔlɔ Paulo. L’edja k’ɛnɔnyi efula, Paulo akakimanyiya anto efula wakahokamɛ esambishelo kande ndo miliyɔ nkina y’anto wekɔ lo tetemala kondja wahɔ oma lo mikanda ande wakasambiyama wele lo Ɔtɛkɛta wa Nzambi.—Etsha 9:3-19; 2 Tim. 3:16, 17.
11. Lande na kahombaso sala etshikitanu wahombama dia sambisha apami?
11 Ɔnkɔnɛ, nyɛsɔ tosale etshikitanu tshɛ wahombama dia sho tondoya okakatanu wa sambisha apami. Etena katatawese oyango ɔsɔ, teye dia Jehowa ayotɔtshɔkɔla lo welo wadjaso dia sala lolango lande ndo kokɛ wahɔ wa Diolelo.