Onde lekɔ l’akoka wa nsambisha?
1. Lande na kahatahombe mboka wɔma w’ɔnɛ sho bu l’akoka wa nsambisha?
1 Naka wɛ amboyambolaka dimbola dia ngasɔ, kete tɔkɔmɔke! Aha kalasa yakɔtɔ onto kana akoka amɔtshi wakotɔ la nde mbakonya onto okambi. Akristo amɔtshi wa lo ntambe ka ntondo wakɔsamaka oko ‘haweye mukanda ndo anto k’anto.’ Koko, vɔ waki esambisha w’eshika wa lokumu l’ɔlɔlɔ nɛ dia vɔ wakayashikikɛ dia ndjela ɛnyɛlɔ kakâtshikɛ Yeso.—Etsha 4:13; 1 Pet. 2:21.
2. Naa toho tɔmɔtshi taketshaka Yeso?
2 Woho waketshaka Yeso: Nde aketshaka lo yoho ya wɔdu ndo yakokɛmaka esadi eto. Ambola, bɛnyɛlɔ ndo mbɔtwɛlɔ ya wɔdu yakakambaka la nde akakotolaka yambalo y’ampokami ande. (Mat. 6:26) Nde akayakiyanyaka l’otema ɔtɔi lo dikambo di’anto. (Mat. 14:14) Ndo nto, Yeso aketshaka la eshikikelo ndo la lowandji lo mbeya dia Jehowa akawosha ɔkɛndɛ ndo akoka wa nkotsha ɔkɛndɛ akɔ.—Luka 4:18.
3. Ngande watokimanyiya Jehowa dia sho nkotsha olimu aso?
3 Jehowa tokimanyiyaka: Lo tshimbo y’Ɔtɛkɛta ndo y’okongamelo ande, Ombetsha aso a woke toshaka wetshelo wele la so ohomba dia nsambisha lokumu l’ɔlɔlɔ dimɛna. (Is. 54:13) Lam’ele Jehowa akasale dia ɔkɔndɔ wa woho waketshaka Yeso namema lo Bible, tekɔ l’akoka wa nsɛdingola awui asɔ ndo mbokoya toho tande ta mbetsha. Jehowa toshaka nyuma kande k’ekila ndo tetshaka lo tshimbo ya nsanganya ya l’etshumanelo. (Joa. 14:26) Ndo nto, nde toshaka apandjudi wa tomanamana wakoka tokimanyiya dia sho ndeka nsambisha dimɛna.
4. Lande na keso l’ɔkɔkɔ wa dimɛna wa ndjaoka dia sho koka nsambisha anto akina lokumu l’ɔlɔlɔ?
4 Tekɔ l’ɔkɔkɔ w’oshika wa ndjaoka dia tekɔ l’akoka wa nsambisha, lam’ele ‘Nzambi mbatosha akoka.’ (2 Kor. 3:5) Naka sho ndjaɛkɛ le Jehowa ndo nkamba dimɛna la tɛdikɔ toludi la ngandji tatoshande, kete ‘tayolowanyema dimɛna ndo tayonga l’akoka tshɛ wa ndjasha l’olimu w’ɔlɔlɔ.’—2 Tim. 3:17.