Akɔna Ele L’akoka Wa Sambisha?
1 Onde ndo wɛ akayala la kanyi yele oko yaki la Mɔsɛ lo dikambo dia olimu? Nde akate ate: “Ai! [Jehowa, NW], dimi untu lahatudjaka nteketa, kuyanga lu nshi ya ntundu kuyanga kam’ateketaye la ukambi aye aso.” (Etum. 4:10) Naka ndo wɛ mbele la kanyi shɔ, kete ondo yɔ memadiaka esambishelo kayɛ. Koko, Yeso ‘akatɔkɔkɔmiya dia sambisha’ anto ndo dia mbewoya akambo tshɛ. (Etsha 10:42) Ngande wokokiso koma esambisha wa lokumu l’ɔlɔlɔ wele l’akoka?
2 Aha diewo diaso dia mukanda mbatosha akoka wa kamba olimu. Paulo akate ate: “akanga a tomba ta l’emunyi kombetama efula” ndo ɔnɛ: “lomba la l’andja ɔnɛ lekɔ enginya lo asho wa Nzambi.” (1 Kɔr. 1:26; 3:19, NW) Yeso akasɔnɛ apɔstɔlɔ ande oma l’atei w’ase olimu w’anya; anɛi l’atei awɔ waki amundji mundji a nse. Ewandji w’ɛtɛmwɛlɔ wakawaɔnyɔlaka wawaɔsa oko ‘anto waheye mukanda ndo anto k’anto.’ Lo ndjela kɛnɛ kalɔmbama l’andja ɔnɛ, apɔstɔlɔ komonga l’akoka wa sambisha. Koko, dako dia mamba diakasha Petero lushi la Pɛntɛkɔsta akasokoya anto 3000 dia vɔ batizama!—Etsha 2:14, 37-41; 4:13.
3 Jehowa Toshaka Akoka dia Sho Sambisha: Paulo akate ate: “Dikoka diaso ndja oma le Nzambi.” (2 Kɔr. 3:5, NW) Jehowa, Kiɔkɔ ya lomba, aketsha miliyɔ y’anto dia vɔ sambisha akina mɛtɛ k’endana la Diolelo. (Is. 54:13) Olimu ɔsɔ kambemaka wolo ndo tondjaka elowa efula: kɛnɛ kɛnya ko, ɔnɔnyi wetshi (1995) anto w’eyoyo 338491 wakabatizama, vɔ wanɛ wele “mikanda wa ndjenyanya” wasɛna. (2 Kor. 3:1-3) Kɛsɔ tshɛ tosokoyaka lo sambisha kɛnɛ kakatolakanya Jehowa la dihonga ndo l’eshikikelo.
4 Ɔlɔngɔswamelo wa Nzambi akasale ekongelo ka ndowanyaka ekambi ande l’andja w’otondo. L’ekimanyielo k’Afundelo ndo k’ekanda wotshikitanyi wɔmbɔla Bible, sho mbetshamaka ndo ndowanyemaka dia monga l’‘akoka tshɛ ndo dihomɔ di’efula’ dia sambisha. (2 Tim. 3:16, 17) Anto efula mambaka diewo dia lɔ̂ka diele l’ekanda waki la Société. Oko ɛnyɛlɔ, enda kɛnɛ kâlaso lo jurunalɛ mɔtshi y’Ase Suede: “Mbetawɔ kasambisha Ɛmɛnyi wa Jehowa mɛnyaka dia wekɔ la diewo dia mamba dia Bible ndo wekɔ l’ekanda wa mamba l’andja w’otondo.”
5 Lo alako wakondjaso lo nsanganya yaso tshanu ya lomingu la lomingu, ekongelo kaso ka walelo ndo ka wekelo wa Bible, alako wakondjaso lo Kalasa k’Olimu wa Teokrasi, ekimanyielo k’onto ndamɛ kakondjaso oma le ekambi wa tomanamana ndo, djekoleko, osukɔ wa nyuma k’ekila ka Jehowa, sho kokaka ndjashikikɛ ɔnɛ Jehowa tɛnaka dia tekɔ l’akoka tshɛ dia sambisha. ‘Mɛtɛ, oko atomami wa Nzambi, lo asho wa Nzambi, tele kâmɛ la Kristo, mbatɛkɛtaso.’—2 Kor. 2:17.
6 Naka tayokondja ɛlɔlɔ tshɛ watomba oma lo wetshelo wa Teokrasi watosha Nzambi lo tshimbo y’ɔlɔngɔswamelo ande, kete ndoko kayokoka temandja kana tôtsha wɔma. Tosambisha akina l’ɔngɛnɔngɛnɔ tshɛ, l’eshikikelo ɔnɛ Jehowa ayɔtshɔkɔla weolo wadjaso.—1 Kor. 3:6.