Tekɔ l’akoka tshɛ wahombama dia monga embetsha w’Ɔtɛkɛta wa Nzambi
“[Nzambi] . . . akatuhilula dia shu nkuka uku ekambi.”—2 KORETO 3:5, 6.
1, 2. Naa welo wadjama mbala efula lo kɛnɛ kendana l’esambishelo, ko bonde kakitawɔ tatala mbala ko mbala?
NGANDE wokokiyɛ ndjaoka naka wambokosha olimu ɔmɔtshi weyɛ kema l’akoka wa mbokamba? Ohokanyiya yema: Diangɔ ndo dihomɔ dieyɛ l’ohomba diekɔ la ntondo kayɛ. Koko wɛ heye woho wakambawɔ olimu akɔ kânga yema. Ndo, kɛnɛ kamboleka konya dikambo sɔ wolo ele olimu ɔsɔ pombaka salema esadi. Anto wekɔ lo kongɛ le yɛ. Wɔɔngɔ ayɛ wayohandjɔ vwa mɛtɛ!
2 Tɔfɔnyake dia dikambo dia ngasɔ diekɔ dia lɔfɔnya. Tɔshi ɛnyɛlɔ kɛnɛ. Mbala mɔtshi, ɛtɛmwɛlɔ wa lo Lokristokristo pembaka dia sambisha lo luudu la luudu. Koko, mbala ko mbala, vɔ kitaka tatala ndo mpekɔka l’ɔkɔngɔ wa mingu kana wa ngɔndɔ mɔtshi tsho. Lande na? Ekɔ nɛ dia Lokristokristo kokimanyiya anto wa lɔkɔ dia monga l’akoka wa kamba olimu ɔsɔ. Kânga ewandji w’ɛtɛmwɛlɔ kema l’akoka wa kamba olimu w’esambishelo oyadi lokema l’ɛnɔnyi wa wekelo wasalawɔ lo wa kalasa ndo lo wa seminɛrɛ. Lande na kakokaso mbuta ngasɔ na?
3. Tshɛkɛta yakɔna yokambiwɔ layɔ mbala shato lo 2 Koreto 3: 5, 6, ndo alembetshiyayɔ?
3 Ɔtɛkɛta wa Nzambi nembetshiyaka kɛnɛ kasha osambisha wa mɛtɛ wa lokumu l’ɔlɔlɔ l’Okristo akoka wahombama. Ɔpɔstɔlɔ Paulo akatshutshuyama oma le nyuma dia funda ɔnɛ: “Shu shame hatukuki, dia shu nkana shati: Engo kambuya uma le su shame, keli ekukelu kasu keko uma le [Nzambi]. Ndi akatuhilula dia shu nkuka uku ekambi.” (2 Koreto 3:5, 6) Tolembete tɔtɛkɛta t’eshikikelo tɔsɔ tokambiwɔ latɔ mbala shato lanɛ, tata ɔnɛ “nkuka.” Alangatɔ mbuta na? Dibuku (Vine’s Expository Dictionary of Biblical ) mbutaka ɔnɛ: “Lam’atɛkɛtawɔ dikambo dia diangɔ, [tshɛkɛta ya lo Grɛkɛ nyɛ] nembetshiyaka ‘lofulo lambokoka’ . . . ; lam’atɛkɛtawɔ dikambo di’anto, yɔ nembetshiyaka ‘diewo,’ kana monga la ‘dikoka.’” Ɔnkɔnɛ, onto lele ‘l’akoka’ ekɔ la diewo ndo kokaka kamba olimu wowoshawɔ. Eelo, ekambi wa mɛtɛ wa lokumu l’ɔlɔlɔ wekɔ l’akoka wa kamba olimu ɔsɔ. Vɔ wekɔ la diewo, l’akoka, kana sunganaka sambisha.
4. (a) Ngande wɛnya ɛnyɛlɔ kaki Paulo dia monga l’akoka wa kamba olimu w’Akristo kema dikambo diendana paka la djui ya tshitshɛ ya wanɛ wakasɔnama? (b) Naa toho tosato tatokimanyiya Jehowa dia sho monga ekambi wele l’akoka?
4 Ko oma lende aya diewo sɔ? Onde oma l’akoka wele l’onto ndamɛ? Onde oma lo yimba y’efula yakotɔ l’onto? Onde oma lo wekelo wa lânde wa lo kalasa yɔsama la nɛmɔ efula? Ɔpɔstɔlɔ Paulo aki mɛtɛ l’akambo asɔ tshɛ. (Etsha 22:3; Filipi 3:4, 5) Koko, la ndjakitshakitsha tshɛ nde mbetawɔka di’akoka waki lande oko okambi wakaye, aha oma le nde ndamɛ koko oma le Jehowa Nzambi. Onde paka djui mɔtshi y’anto yakasɔnama mbakoka kondja akoka asɔ? Paulo akafundɛ etshumanelo ka la Kɔrɛtɔ lo kɛnɛ kendana la ‘woho weso l’akoka wahombama.’ Dikambo sɔ mɛnyaka mɛtɛ ɔnɛ Jehowa ndjashikikɛka dia kana ekambi ande tshɛ wa kɔlamelo wekɔ la diewo ndo l’akoka wa kamba olimu wakandawasha. Jehowa ngande washande Akristo wa mɛtɛ akoka asɔ ɛlɔ kɛnɛ na? Nyɛsɔ tɔsɛdingole toho tosato takamba lande: (1) Ɔtɛkɛta ande, (2) nyuma kande k’ekila, ndo (3) ɔlɔngɔswamelo ande wa la nkɛtɛ.
Ɔtɛkɛta wa Jehowa toshaka akoka
5, 6. Shɛngiya yakɔna yele l’Afundelo w’Ekila le Akristo wa mɛtɛ?
5 Ntondotondo, ngande watokonya Ɔtɛkɛta wa Nzambi ekambi wele l’akoka na? Paulo akafunde ate: “Efundelu tshe k’uma le [Nzambi] keko ololo mbetsha antu, la mbalaka, la mbaewula, la mbaekiya lu akambu w’ololo. Dia untu a [Nzambi] aluwani, ndu akuki dia ntsha elimu w’ololo tshe.” (2 Timote 3:16, 17) Ɔnkɔnɛ, Afundelo w’Ekila koka ‘tolowanya ndo tosha akoka tshɛ’ wa tetemala ntsha “[o]limu w’ololo” wa mbetsha anto akambo wendana l’Ɔtɛkɛta wa Nzambi. Ko kayotota dikambo dia wanɛ tshɛ wele l’ɛtɛmwɛlɔ wa lo Lokristokristo na? Vɔ lawɔ mbadiaka Bible. Ko ngande wakoka dibuku diakɔ diamɛ kimanyiya anto amɔtshi dia koma ekambi wele la diewo ko tshikaka anto akina na? Otshikitanu ɔsɔ ndja oma lo woho wɔsaso Bible.
6 Lonyangu ko, l’atei w’anto watshɔ lo mvudu y’ɛtɛmwɛlɔ, yema tshitshɛ tsho mbetawɔ losango la lo Bible dia lɔ lekɔ ‘mɛtɛ ɔtɛkɛta wa Nzambi.’ (1 Tesalonika 2:13) Lo dikambo sɔ, Lokristokristo halokoke ndjafuna kânga yema tshitshɛ. L’ɔkɔngɔ wa vɔ mbetsha ɛnɔnyi efula lo kalasa yalakanyawɔ teoloji, onde ewandji w’ɛtɛmwɛlɔ mongaka l’akoka wahombama dia monga embetsha w’Ɔtɛkɛta wa Nzambi? Ndooko. Ambeki amɔtshi tatɛka wekelo awɔ wa lo seminɛrɛ wele la mbetawɔ lo Bible koko l’ɔkɔngɔ wa vɔ shidiya kalasa yawɔ, vɔ ndjokomaka amɔnyɔdi atɔ. L’ɔkɔngɔ diko, lo dihole dia sambisha Ɔtɛkɛta wa Nzambi wele efula ka l’atei awɔ waya bu la mbetawɔ ka l’otema ɔtɔi lɔkɔ, vɔ ndjɔlɔmbɔlaka olimu awɔ otsha l’akambo akina oko, tambɛ l’akambo wa pɔlitikɛ, sala atshunda watawɔ vamɛ ɔnɛ wayoshidiya ekakatanu wele l’anto kana sukɛ tokanyi ta filozofi lo alako washawɔ. (2 Timote 4:3) Koko otshikitanyi l’anto asɔ, Akristo wa mɛtɛ mbokoyaka ɛnyɛlɔ kaki Yeso Kristo.
7, 8. Ngande wakatshikitana dionga diaki la Yeso otsha l’Ɔtɛkɛta wa Nzambi la nɛ diaki l’ewandji w’ɛtɛmwɛlɔ wa lo nshi yande?
7 Yeso kombetawɔ di’ewandji w’ɛtɛmwɛlɔ wa lo nshi yande monga la shɛngiya lo kanyi yande. Oyadi etena kakandalakanyaka djui y’anto ya tshitshɛ ɛnyɛlɔ apɔstɔlɔ ande kana nyemba y’anto ya weke, Yeso akakambaka l’efundelo w’ekila lo yoho ya dimɛna. (Mateu 13:10-17; 15:1-11) Tshelo shɔ yakotshikitanyaka l’ewandji w’ɛtɛmwɛlɔ wa lo nshi yande. Ewandji ɛsɔ kokeketshaka anto k’anto dia vɔ ndjasha l’akambo w’ohomba efula waki Nzambi. Ɔnkɔnɛ, ombetsha wa lo nshi shɔ aki la mbekelo ka mbetawɔ ɔnɛ avɛsa amɔtshi wa l’Afundelo waki wolo efula dia mbashihodia woho wa sawola l’oseka onto tshɛ onyake paka l’ombeki walekande nanga ndo kânga le ombeki akɔ ɔsɔ akahombamaka paka sawola la nde la dui di’ɔkɔkɛ ndo komba ɔtɛ! Ewandji w’ɛtɛmwɛlɔ ɛsɔ waki oko la wɔma wa kɛtshanya l’anto avɛsa amɔtshi wa Bible oko wakawokaka wɔma tɛkɛta lokombo laki Nzambi!
8 Kristo kosala yoho shɔ. Nde aketawɔka dia, aha paka djui ya tshitshɛ yakasɔnama tsho, koko anto tshɛ mbakahombaka sɛdingola ‘awui tshɛ watomba oma l’onyɔ wa Jehowa.’ Yeso konyanga dia mbisha sapi k’ewo le djui mɔtshi yakasɔnama ya waa nomb’ewo l’awui w’Afundelo. Nde akatɛ ambeki ande ate: “Akambu wanyutelami lu udjima, kanyuwati lu yanyi. Akambu wukanyu lu hyotehote, kanyuwati l’ete a mvudu.” (Mateu 10:27) Yeso aki la mposa k’efula ka ndakanya anto efula ewo kaki Nzambi.
9. Ngande wakamba Akristo wa mɛtɛ la Bible?
9 Ɔtɛkɛta wa Nzambi mbahombaso mbetsha la ntondo lo wetshelo aso. Ɛnyɛlɔ, etena kashaso dako dia lo sɛkɛ lo Mbalasa ka Diolelo k’Ɛmɛnyi wa Jehowa, mbala efula kema dimɛna komɛ paka lo mbadia avɛsa wakasɔnami oma lo Bible tsho ko pe. Mbeyaka monga ohomba sho nembetshiya, mbisha ɛnyɛlɔ ndo mɛnya anto woho wa kamba l’avɛsa akɔ. Oyango aso ele wa mbɔsa losango lofundami l’akatshi wa lo Bible ko lifunda kana lidja l’etema w’ampokami aso. (Nehemiya 8:8, 12) Pombaka nto kamba la Bible dia mbisha onto dako kana mongola etena konga ohomba. Kânga mbele ekambi waki Jehowa tɛkɛtaka ɛtɛkɛta wotshikitanyi ndo ndja oma l’ahole wotshikitanyi, vɔ tshɛ nɛmiyaka Bible, dibuku dioleki abuku akina tshɛ.
10. Shɛngiya yakɔna yakoka monga la losango lakasambiyama lele lo Bible le so?
10 Etena kakambawɔ lalɔ lo yoho shɔ, losango la lo Bible mongaka la nkudu. (Heberu 4:12) Lɔ tshutshuyaka anto dia tshikitanya nsɛnɔ yawɔ, ɛnyɛlɔ oko ntshika ditshelo diahɔtɔnɛ l’Afundelo diele oko monanyi, loseka, ɔtɛmwɛlɔ wa dikishi, edjwelo ka wanu ndo wovi. Lɔ kimanyiyaka anto efula dia nkolola lonto l’edjedja ko ndɔta l’oyoyo. (Efeso 4:20-24) Eelo, naka sho nɛmiya Bible oleki tokanyi kana wetshelo w’ashidi ndo kamba latɔ la kɔlamelo, kete tɔ koka mɛtɛ tosha diewo ndo akoka tshɛ wa monga embetsha w’Ɔtɛkɛta wa Nzambi.
Nyuma ka Jehowa toshaka akoka
11. Bonde kasungana nyuma k’ekila kaki Jehowa mbelamɛ ɔnɛ “ukimanyidi” na?
11 Dikambo dia hende, nyɛsɔ tende ohomba wele la nyuma k’ekila kaki Jehowa kana wolo ande wakamba olimu dia ntosha akoka wahombama. Tatohɛke pondjo dia nyuma ka Jehowa kekɔ wolo woleki welo ekina tshɛ. Jehowa akasha Ɔnande la ngandji nkudu ka kamba la wolo ɔsɔ wa diambo dikambo dia wahɔ w’Akristo tshɛ wa mɛtɛ. Diɔ diakɔ diakɔsaka Yeso nyuma k’ekila oko “ukimanyidi.” (Joani 16:7) Nde akakeketsha ambeki ande dia vɔ nɔmba Jehowa nyuma kɛsɔ lo mbashikikɛ dia Jehowa ayowashatɔ la lokaho tshɛ.—Luka 11:10-13; Jakoba 1:17.
12, 13. (a) Lande na ekɔ ohomba nɔmba dia nyuma k’ekila tokimanyiya l’olimu aso? (b) Ngande wakɛnya Afarisɛ dia nyuma k’ekila komonga la shɛngiya le wɔ?
12 Sho pombaka nɔmba dia kondja nyuma k’ekila lushi la lushi, djekoleko dia tɔ tokimanyiya l’olimu aso. Shɛngiya yakɔna yakoka monga la wolo ɔsɔ wakamba olimu le so na? Vɔ kokaka monga la shɛngiya lo timba ndo l’etema aso ndo tokimanyiya dia tshikitana, dia pama lo nyuma ndo dia kolola lonto l’edjedja ko ndɔta lonto l’oyoyo. (Kolosai 3:9, 10) Tɔ tokimanyiyaka nto dia monga la waonga w’amɛna wa woho wa wanɛ waki la Kristo. Efula ka l’atei aso koka mbuta kɛnɛ kele lo Ngalatiya 5:22, 23 lo yimba. Avɛsa asɔ shilaka elowa wa nyuma kaki Nzambi. Olowa wa ntondo ele ngandji. Dionga sɔ diekɔ ohomba efula l’olimu aso. Lande na?
13 Ngandji ekɔ la shɛngiya y’efula. Ngandji kokaso Jehowa ndo asekaso anto totshutshuyaka dia sambisha lokumu l’ɔlɔlɔ. (Mako 12:28-31) Naka sho bu la ngandji ka ngasɔ, kete hatotonga l’akoka wa koma embetsha w’Ɔtɛkɛta wa Nzambi. Tende otshikitanu wele lam’asa Yeso nde l’Afarisɛ. Mateu 9:36 mbutaka lo dikambo dia Yeso ɔnɛ: “Lam’akandenyi elui w’antu, ndi akawauki ketshi, ne dia vo wakahenyahenyama, ndu kundjala la ekimanyelu, uku ekoko waha la ulami.” Ko Afarisɛ ngande wakawɔsaka anto k’anto na? Vɔ wakate ɔnɛ: “Keli ului w’antu ako haweyi elembe, wambudjama mananu.” (Joani 7:49, sho mbɛnganyisha alɛta ango.) Afarisɛ asɔ komonga la ngandji otsha le anto koko waki la diɔnyɔ di’efula otsha le wɔ. Mbokɛmaka hwe dia nyuma kaki Jehowa komonga la shɛngiya le wɔ.
14. Ngande wahomba ɛnyɛlɔ kaki Yeso ka woho wakandɛnya ngandji l’olimu ande monga la shɛngiya le so?
14 Yeso akokaka anto kɛtshi. Nde akeyaka asui awɔ. Nde akeyaka dia vɔ wakasoyamaka, waki ekalema, ndo wakahandjɔnɛ oko ɛkɔkɔ waha l’onami. Joani 2:25 totɛka dia Yeso “akeyi akambu wa l’etema w’antu.” Lam’ele nde aki Okambi wa Kɔmba waki Jehowa l’etena k’etongelo, Yeso aki nshi tshɛ la eokelo k’efula ka woho wele eongelo kaki anto. (Tukedi 8:30, 31) Eokelo kɛsɔ mbakafudia ngandji kande otsha le anto. Ngandji kɛsɔ katotshutshuyake nshi tshɛ l’olimu aso w’esambishelo! Naka sho mɛnaka dia sho koka ndjalowanya lo dikambo sɔ, kete tɔlɔmbɛ dia kondja nyuma k’ekila kaki Jehowa ndo tɔtɔnganyiya etsha aso l’alɔmbɛlɔ aso. Jehowa ayoka alɔmbɛlɔ aso. Nde ayotoma wolo ɔsɔ wahadjama anya dia ndjotokimanyiya woho wa sho nyomoleka monga oko Kristo, ɔnɛ laki l’akoka woleki tshɛ wa sambisha lokumu l’ɔlɔlɔ.
15. Ngande wakakotshama ɛtɛkɛta wa l’Isaya 61:1-3 le Yeso ko ndo l’etena kakɔ kamɛ tondja afundji l’Afarisɛ sɛkɛ?
15 Ko oma lende akaye akoka waki Yeso? Nde akate ate: “Nyuma ka [Jehowa] kambumbahema.” (Luka 4:17-21) Eelo, Jehowa ndamɛ akasɔnɛ Yeso l’ekimanyielo ka nyuma k’ekila. Yeso komonga l’ohomba w’akoka akina w’oma le anto. Onde ewandji w’ɛtɛmwɛlɔ wa lo nshi yande wakasɔnama oma le nyuma k’ekila? Kema. Ndo diakɔ diakiwɔ kokoka kotsha Isaya 61:1-3, divɛsa diakadia Yeso la dui dia wolo ndo mɛnya ɔnɛ dikambo sɔ diambokotshama le nde ndamɛ. Lam’alanganyu, nyadia avɛsa akɔ ko nyayɛna nyamɛ dia afundji la Afarisɛ waki akanga wa dungi pende ndo kokotshaka ɛtɛkɛta wa l’avɛsa ango. Vɔ komonga ndoko la lokumu l’ɔlɔlɔ la mbewoya ase wola. Ndo ngande wakawakoke sambisha wanɛ wele lo fumbe dikambo dia etshungwelo ndo akanga wa totshungu dikambo di’ɛsɛnɛlɔ na? Lo yoho ya lo nyuma, vamɛ waki totshungu ndo fumbe y’awui w’ashidi. Otshikitanyi l’anto asɔ, onde sho tekɔ l’akoka wa ndakanya anto?
16. Eshikikelo kakɔna kakoka ekambi wa Jehowa wa nshi nyɛ monga latɔ lo kɛnɛ kendana l’akoka awɔ oko ekambi?
16 Mɛtɛ, sho kombeka lo kalasa ya lâdiko ya lo Lokristokristo. Sho hatɔsɔnama oko embetsha oma lo seminɛrɛ yekawɔ teoloji. Onde lâsɔ sho kema l’akoka wahombama? Sho tekɔ lawɔ! Jehowa mbakatɔsɔnɛ oko Ɛmɛnyi ande. (Isaya 43:10-12) Naka sho nɔmba dia kondja nyuma kande ndo mbɔtɔnganyiya etsha aso la dɔmbɛlɔ diaso, kete tayonga l’akoka woleki tshɛ. Lo mɛtɛ, sho kema kokele ndo hatokoke mbokoya Yeso Kristo, Ombetsha wa Woke tshɛ lo tshɛ. Ko, onde hatɔngɛnangɛna lo woho wakamba Jehowa la nyuma kande dia tosha akoka ndo kɛnɛ kahombama dia monga embetsha w’Ɔtɛkɛta ande?
Ɔlɔngɔswamelo wa Jehowa toshaka akoka
17-19. Ngande watokimanyiya nsanganya tshanu yasalema lomingu tshɛ dia sho monga l’akoka wa monga ekambi?
17 Kakianɛ nyɛsɔ tɔsɛdingole yoho ya sato yatosha Jehowa akoka wa monga embetsha w’Ɔtɛkɛta ande, yoho yakɔ ko etshumanelo, kana ɔlɔngɔswamelo ande wa la nkɛtɛ watetsha dia sho koma ekambi. Lo woho akɔna? Ohonyokanyiya ekongelo ka wetshelo kele laso! Lomingu tshɛ sho mbɔtɔka nsanganya tshanu y’Akristo. (Heberu 10:24, 25) Sho tshumanaka lo tolui ta totshitshɛ lo Wekelo wa Dibuku wa l’Etshumanelo dia sala wekelo wa Bible wa lotshimola l’ekimanyielo k’okanda ɔmɔtshi wakalɔngɔsɔla ɔlɔngɔswamelo waki Jehowa. Lo mpokamɛ ndo lo mbisha kɔmatɛrɛ sho kondjaka wetshelo ndo keketshanaka lam’asaso. Sho kondjaka nto wetshelo ndo omendji wa wekelo wa dibuku todjaka yimba l’onto ndo l’onto. Lo Losanganya la lo Sɛkɛ ndo lo Wekelo wa Tshoto y’Etangelo, sho kondjaka nto mbo ya ndɛ ya lo nyuma efula.
18 Kalasa kaso k’Olimu wa Teokrasi kakalɔngɔswama dia toshaka wetshelo wa woho wa mbeya mbetsha anto akina. Lam’alɔngɔsɔlaso asawo wayosha ambeki, sho mbekaka woho wa kamba l’Ɔtɛkɛta wa Nzambi dia mbetsha anto weho tshɛ w’asawo. (1 Petero 3:15) Onde wɛ atashaka sawo lo dikambo dimɔtshi diakayafɔnyaka wate wɛ dieyaka dimɛna koko l’ɔkɔngɔ wɛ ndjɛna dia wɛ amboyeka dikambo dimɔtshi di’oyoyo diendana la sawo diakɔ? Mongaka ngasɔ mbala efula, nɛ dia etena ketshaso anto akina sho ndekaka ndowanya ewo kele laso lo dikambo dimɔtshi. Oyadi kânga sho bu la sawo dia mbisha shamɛ, sho kokaka tetemala mbeka dia monga embetsha w’ɔlɔlɔ. Le ombeki tshɛ, sho mɛnaka akoka kana waonga amɔtshi w’amɛna, ndo sho kokaka kanyiya woho wa mbokoya akoka kana waonga akɔ.
19 Ndo Losanganya l’Olimu lakalɔngɔswama dia tokimanyiyaka dia monga embetsha w’eshika w’Ɔtɛkɛta wa Nzambi. Mingu tshɛ, sho mbokaka asawo w’amɛna, ɛkɛtshanyelo ndo bɛnyɛlɔ diendana l’olimu aso. Ɛnyɛlɔ kakɔna kayotokamba latɔ na? Ngande wakokaso tondoya ekakatanu ɛmɔtshi wa lânde l’olimu aso wa lo sɛkɛ na? Naa toho t’esambishelo t’eyoyo tahombaso kamba la tɔ efula na? Kakɔna kayotokimanyiya dia nyomoleka monga embetsha w’eshika lam’asalaso waendelo w’eyoyo ndo walɔmbɔlaso wekelo wa Bible na? (1 Koreto 9:19-22) Wembola wa ngasɔ mumbɔmaka ndo nembetshiyamaka efula lo Losanganya l’Olimu. Efula ka tenyi dia losanganya lɔnɛ mbɔsamaka oma l’ɛtɛ w’awui wele l’Olimu Aso wa Diolelo, ehomɔ kekina katondjama dia tokimanyiya l’olimu aso w’ohomba efula.
20. Ngande wakokaso kondja wahɔ efula oma lo nsanganya ya totshitshɛ ndo ya weke?
20 Lo nɔngɔsɔlaka ndo lo mbɔtɔka lo nsanganya yaso ndo lo kambaka la kɛnɛ kekaso lo nsanganya yakɔ l’olimu aso oko weso embetsha, sho kondjaka wetshelo w’oshika. Koko lâdiko wa lâsɔ, ekɔ akambo efula wahombama. Tekɔ nto la nsanganya ya weke yele l’oyango wa tokimanyiya dia sho monga embetsha w’Ɔtɛkɛta wa Nzambi. Ndo tekɔ lo nongamɛ mɛtɛ dia mpokamɛka la yambalo tshɛ ndo dia kamba olimu l’alako akɔ!—Luka 8:18.
21. Kakɔna kɛnya dia taketshama dimɛna, ndo ahomba nongola lokumu lo dikambo sɔ?
21 Onde wetshelo washa Jehowa wekɔ l’etombelo w’ɔlɔlɔ? Akambo weta kadimolaka vamɛ lo wombola ɔsɔ. Ɔnɔnyi tshɛ, nkama ya nunu di’anto wekɔ lo kimanyiyama dia mbeka atshina w’akambo wa lo Bible ndo dia mbɔtɔnganyiya nsɛnɔ yawɔ la kɛnɛ kâlɔmba Nzambi. Lofulo laso lekɔ lo tadɛ koko ndoko ɔtɔi l’atei aso lakoka mpomɛ ntolo ate nde mbasala dikambo sɔ. Sho pombaka mɛna akambo la dietawɔ tshɛ l’ɛnyɛlɔ ka Yeso. Nde akate ate: “Nduku untu leya ndja le mi, tshikima Papa lakantumi kûkutudi.” Oko apɔstɔlɔ wa lo nshi yakete, efula ka l’atei aso wekɔ anto k’anto ndo kombeka mukanda. (Joani 6:44; Etsha 4:13) Olimu aso tondjaka etombelo w’amɛna diɛsɛ oma le Jehowa lakotola anto wele l’etema w’ɛlɔlɔ oya l’akambo wa mɛtɛ. Paulo akafunde ate: “Dimi lakune, Apolo akatela ashi, keli [Nzambi] akatosha diango.”—1 Koreto 3:6.
22. Lande na kahatakoke pondjo kɔmɔ otema lo kɛnɛ kendana la ndjasha tshɛ l’olimu w’Akristo?
22 Eelo, Jehowa Nzambi ndjashaka tshɛ l’olimu aso w’embetsha w’Ɔtɛkɛta ande. Mbeyaka monga k’aha nshi tshɛ mbayaokaso dia tekɔ l’akoka wa monga embetsha. Koko tohɔ dia Jehowa mbakotola anto oya le nde ndamɛ ndo oya le Ɔnande. Jehowa mbatosha akoka wa monga ekambi ande oma lo tshimbo y’Ɔtɛkɛta ande, ya nyuma kande k’ekila ndo y’ɔlɔngɔswamelo ande wa la nkɛtɛ. Nyɛsɔ tetawɔ wetshelo waki Jehowa lo kamba l’akambo w’amɛna watetshande kakianɛ dia tosha akoka wa sho monga embetsha w’Ɔtɛkɛta wa Nzambi!
Ngande wayoyokadimola
• Ngande watokimanyiya Bible dia kamba olimu w’esambishelo?
• Olimu akɔna wakamba nyuma k’ekila dia tokimanyiya dia sho koma ekambi wele l’akoka?
• Lo toho takɔna tambokokimanyiya ɔlɔngɔswamelo waki Jehowa wa la nkɛtɛ dia wɛ monga opandjudi wa lokumu l’ɔlɔlɔ wele l’akoka?
• Bonde kakokaso monga l’eshikikelo tshɛ lam’eso l’esambishelo?
[Osato wa lo lɛkɛ 19]
Oko wakinde ombetsha w’Ɔtɛkɛta wa Nzambi, Yeso akokaka anto ngandji