Onde wɛ ambokilodia?
Ndodia na? Ndodia kartɛ ka Instructions médicales (DPA) kakawatondja dikambo dia Ɛmɛnyi wa Jehowa wambobatizama. Lam’ele ‘wɛ heye woho wayoyala lɔsɛnɔ layɛ loyi,’ ekɔ ohomba efula wɛ nshikikɛ la ntondo ndo mfunda lofunda esakelo ndo toho t’ekambelo tayoyetawɔ dia vɔ kosakɛ etena katomba dikambo dia wanyandja. (Jak. 4:14; Etsha 15:28, 29) Dia kokimanyiya, wakatondja vidɛo kele l’ɔtɛ a dui ɔnɛ: Soigner sans transfuser — Besoins et droits du patient. Endatɔ, kana yimba l’ekimanyielo ka dɔmbɛlɔ ndo oma lâsɔ vusola awui wamboyeka l’ekimanyielo ka ambola wayela anɛ.—Diewoyelo: Lam’ele lo vidɛo kɛnɛ vɔ mɛnya lo tshena pe weho ɛmɔtshi wasalema epaso, ambutshi pombaka monga la yewo etena kɔsawɔ yɛdikɔ ya kana anawɔ wa totshitshɛ koka menda vidɛo kakɔ kana bu.
1) Lande na kele enganga ɛmɔtshi wamboyokana yimba nto lo kɛnɛ kendana la okaloyelo wa dikila? 2) Shila bɛnyɛlɔ sato dia epaso wa wolo wakasalema aha la nkaloya dikila. 3) L’andja w’otondo adɔkɔtɛlɛ la enganga engana wetawɔ nsakɛ ɛkɔnyi aha la nkaloya dikila? Lande na ketawɔwɔ nsala dui sɔ? 4) Kakɔna kakɛnya wekelo weke kasalema lo dikambo dia okambelo wa la dikila? 5) Wâle akɔna watomba oma lo okaloyelo wa dikila? 6) Kakɔna kamboyokoma ambewi efula lo mbuta lo kɛnɛ kendana la ɛlɔlɔ waya lo nkamba la toho t’esakelo tahalɔmbɛ nkaloya dikila? 7) Ele lo kiɔkɔ ya oshilelo wa dikila lo demba? Polo lo yɛdikɔ yakɔna yakoka demba di’onto mbetawɔ okitekitelo wa dikila? Kakɔna kakoka salema dia nkimanyiya onto lamboshila dikila? 8) Ngande wakoka keketshama osalelo wa globules rouges lo demba di’ɔkɔnyi? 9) Toho takɔna takamba la enganga dia nkitshakitsha otombelo wa dikila wonya wasalawɔ epaso? 10) Onde toho tokina t’esakelo taha la nkaloya dikila kokaka monga dimɛna le ana w’akɛnda kana le anto waya l’asa eko la nyɔi? 11) Naa tɔndɔ dioleki ohomba diendana la esakelo ka dimɛna? 12) Lande na kele ekɔ ohomba le Akristo dia vɔ tasɔnyi la ntondo esakelo wahalɔmbɛ nkaloya dikila wakokawɔ mbetawɔ? Ngande wakokaso nsala dui sɔ?
Mbetawɔ esakelo ɛmɔtshi wɛnyishawɔ lo vidɛo kɛnɛ ekɔ yɛdikɔ yahomba onto ndamɛ mbɔsa lo ndjela nkum’otema kande kambetshama oma lo Bible. Onde wɛ amboshila nsɔna esakelo ndo toho t’ekambelo tayoyetawɔ dikambo diayɛ ndo dia anayɛ ndo oma lâsɔ, wɛ ambolodia kartɛ ka DPA? Dia mbeya awui efula wendana la dikambo sɔ, sɛdingola dimɛna dimɛna tshapita 7 ya dibuku ‘Ngandji ka Nzambi’ ndo rɛferansɛ woshami lɔkɔ. Enda ndo dikatshi di’okotsha dia Olimu aso wa Diolelo wa Ngɔndɔ ka dikumi l’ɔtɔi 2006 diele l’ɔtɛ a dui ɔnɛ: “Ngande wɔsami tangangɔ tɔsami oma lo dikila ndo ɛgzamɛ kana esakelo walɔmbawɔ dia kamba la dikila diami?” L’ekomelo, yashikikɛ dia wɛ ambofunda ɛsɔnwɛlɔ ayɛ lo kartɛ kayɛ ka DPA. Enganga ayɛ ndo ase nkumbo wele bu Ɛmɛnyi wa Jehowa pombaka mbeya dimɛna tɛdikɔ tayɛ.
[Kiombo ya lo lɛkɛ 3]
• Onde wɛ amboshikikɛ esakelo ndo toho t’ekambelo tayoyetawɔ dikambo diayɛ ndo dia anayɛ?
• Onde wɛ akashile ndodia kartɛ kayɛ ka DPA ndo wɛ mbetetaka latɔ wonya tshɛ?