Onde wɛ amboyalɔngɔsɔla dikambo dia esakelo ka wanyandja?

Dikambo dimɔtshi dia wanyandja diendana l’esakelo mbeyaka ntomba la shashimoya aha la sho mbeya. (Jak. 4:14) Ɔnkɔnɛ kanga yewo tayalɔngɔsɔlaki la ntondo. (Tuk. 22:3) Onde wɛ amboshikikɛka weho w’esakelo ndo toho takamba lawɔ tayoyetawɔ ndo ambofundaka akambo asɔ lofunda? Dia kokimanyiya, wakatondja vidɛo yele l’ɔtɛ a dui ɔnɛ: Soigner sans transfuser — Besoins et droits du patient, etenyi ka hende ka lo DVD diakɔ kele l’ɔtɛ a dui ɔnɛ: Des alternatives à la transfusion — Documentaires. Etena kakiendayɛ, enda kana wɛ kokaka nkadimola ambola wayela anɛ. Lam’ele lo vidɛo nyɛ vɔ mɛnya lo tshena pe weho ɛmɔtshi wasalema epaso, ambutshi pombaka monga la yewo etena kɔsawɔ yɛdikɔ ya kana anawɔ wa totshitshɛ koka menda vidɛo yakɔ kana bu.

1) Lande na kele enganga ɛmɔtshi wamboyokana yimba nto lo kɛnɛ kendana la okaloyelo wa dikila? 2) Shila bɛnyɛlɔ sato dia epaso wa wolo wakasalema aha la nkaloya dikila. 3) L’andja w’otondo adɔkɔtɛlɛ la enganga engana wetawɔ nsakɛ ɛkɔnyi aha la nkaloya dikila? 4) Kakɔna kakɛnya wekelo weke kasalema lo dikambo dia okambelo wa la dikila? 5) Wâle akɔna watomba oma lo okaloyelo wa dikila? 6) Kakɔna kamboyokoma ambewi efula lo mbuta lo kɛnɛ kendana la ɛlɔlɔ waya lo nkamba la toho t’esakelo tahalɔmbɛ nkaloya dikila? 7) Ele lo kiɔkɔ ya oshilelo wa dikila lo demba? Kakɔna kakoka salema dia nkimanyiya onto lamboshila dikila? 8) Ngande wakoka keketshama osalelo wa globules rouges lo demba di’ɔkɔnyi? 9) Toho takɔna takamba la enganga dia nkitshakitsha otombelo wa dikila wonya wasalawɔ epaso? 10) Onde toho tokina t’esakelo taha la nkaloya dikila kokaka monga dimɛna le ana w’akɛnda kana le anto waya l’asa eko la nyɔi? 11) Naa tɔndɔ dioleki ohomba diendana la esakelo ka dimɛna?

Lam’ele mbetawɔ esakelo ɛmɔtshi wɛnyishawɔ lo vidɛo nyɛ ekɔ yɛdikɔ yendana la nkum’otema k’onto ndamɛ, tokongɛke edja ndo wɛ amboyohomana la dikambo dia wanyandja ko wɛ ndjɔsɛdingola weho w’esakelo wayoyetawɔ kana bu. Tshapita 7 ya dibuku ‘Ngandji ka Nzambi’ ndo rɛferansɛ woshami lɔkɔ ndo dikatshi di’okotsha dia Olimu aso wa Diolelo wa ngɔndɔ ka dikumi l’ɔtɔi 2006 wayokokimanyiya dia wɛ mbɔsa yɛdikɔ lo ndjela kɛnɛ kamboyeka. Oma lâsɔ, naka wɛ ambobatizama, kete mfunda ɛsɔnwɛlɔ ayɛ lo kartɛ ka Instructions médicales (DPA) ndo ongaka la tɔ wonya tshɛ.

[Efundelo wa l’etei w’odingɔ wa lo lɛkɛ 3]

Onde wɛ amboshikikɛka weho w’esakelo ndo toho takamba lawɔ tayoyetawɔ ndo ambofundaka akambo asɔ lofunda?