Onde wɛ ambokilodia?

Ndodia na? Ndodia kartɛ ka Instructions médicales (DPA) kakawatondja dikambo dia Ɛmɛnyi wa Jehowa wambobatizama. Lam’ele ‘wɛ heye woho wayoyala lɔsɛnɔ layɛ loyi,’ ekɔ ohomba efula wɛ shikikɛ la ntondo ndo funda lofunda esakelo ndo toho t’ekambelo tayoyetawɔ dia vɔ kosakɛ etena katomba dikambo dia wanyandja. (Jak. 4:14; Etsha 15:28, 29) Dia kokimanyiya, wakatondja vidɛo kele l’ɔtɛ a dui ɔnɛ: Soigner sans transfuser ​— Besoins et droits du patient. Endatɔ ndo oma lâsɔ vusola awui wamboyeka l’ekimanyielo ka ambola wayela anɛ.​—Diewoyelo: Lam’ele lo vidɛo kɛnɛ vɔ mɛnya lo tshena pe weho ɛmɔtshi wasalema epaso, ambutshi pombaka monga la yewo etena kɔsawɔ yɛdikɔ ya kana anawɔ wa totshitshɛ koka menda bandɛ kakɔ kana bu.

1) Lande na kele enganga ɛmɔtshi wamboyokana yimba nto lo kɛnɛ kendana la okaloyelo wa dikila? 2) Shila bɛnyɛlɔ sato dia epaso wa wolo wakasalema aha la kaloya dikila. 3) L’andja w’otondo adɔkɔtɛlɛ la enganga engana wetawɔ sakɛ ɛkɔnyi aha la kaloya dikila? Lande na ketawɔwɔ sala dui sɔ? 4) Kakɔna kakɛnya wekelo weke ka salema lo dikambo dia okambelo wa la dikila? 5) Wâle akɔna watomba oma lo okaloyelo wa dikila? 6) Kakɔna kamboyokoma ambewi efula lo mbuta lo kɛnɛ kendana la ɛlɔlɔ waya lo kamba la toho t’esakelo tahalɔmbɛ kaloya dikila? 7) Ele lo kiɔkɔ ya oshilelo wa dikila lo demba? Polo lo yɛdikɔ yakɔna yakoka demba di’onto mbetawɔ okitekitelo wa dikila? Kakɔna kakoka salema dia kimanyiya onto lamboshila dikila? 8) Ngande wakoka keketshama osalelo wa globules rouges lo demba di’ɔkɔnyi? 9) Toho takɔna takamba la enganga dia kitshakitsha otombelo wa dikila wonya wasalawɔ epaso? 10) Onde toho tokina t’esakelo taha la kaloya dikila kokaka monga dimɛna le ana w’akɛnda kana le anto waya l’asa eko la nyɔi? 11) Naa tɔndɔ dioleki ohomba diendana la esakelo ka dimɛna? 12) Lande na kele ekɔ ohomba le Akristo dia vɔ tasɔnyi la ntondo esakelo wahalɔmbɛ kaloya dikila wakokawɔ mbetawɔ? Ngande wakokaso sala dui sɔ?

Mbetawɔ esakelo ɛmɔtshi wɛnyishawɔ lo vidɛo kɛnɛ ekɔ yɛdikɔ yahomba onto ndamɛ mbɔsa lo ndjela nkum’otema kande kambetshama oma lo Bible. Onde wɛ amboshila sɔna esakelo ndo toho t’ekambelo tayoyetawɔ dikambo diayɛ ndo dia anayɛ? Dia mbeya awui efula wendana la dikambo sɔ, enda “Ambola w’oma le ambadi” wele lo Tshoto y’Etangelo ya Ngɔndɔ ka samalo 15, 2004, lo Falase ndo Tshoto y’Etangelo ya Ngɔndɔ ka dikumi l’ɔtɔi 1, 2000 ndo dikatshi di’okotsha dia Olimu aso wa Diolelo wa Ngɔndɔ ka dikumi l’ɔtɔi 2006 wele l’ɔtɛ a dui ɔnɛ: “Ngande wɔsami tangangɔ tɔsami oma lo dikila ndo ɛgzamɛ kana esakelo walɔmbawɔ dia kamba la dikila diami?” Anto wakayasɔnɛ ndo ase nkumbo kayɛ wele kema Ɛmɛnyi wa Jehowa pombaka mbeya tɛdikɔ tayɛ dimɛna.