Nyêkake Ɔtɛkɛta waki Nzambi mbala la mbala lo nkumbo
‘Onto hasɛnɛ paka la mbo ya ndɛ tsho, koko l’ɔtɛkɛta tshɛ watomba oma l’onyɔ wa Jehowa.’—MATEU 4:4.
1. Bible atatɔ lo dikambo di’ɔkɛndɛ w’ewandji wa nkumbo wa ndakanya anawɔ mboka ya Jehowa?
JEHOWA NZAMBI mboholaka ewandji wa nkumbo mbala la mbala dia vɔ wekɔ l’ɔkɛndɛ wa ndakanyaka anawɔ. Olakanyelo wa ngasɔ wayosha ana akoka wahombama lo lɔsɛnɔ la kakianɛ ndo wayokoka mbalɔngɔsɔla nto lo dikambo dia lɔsɛnɔ la lo nshi yayaye. Ondjelo ɔmɔtshi wakaye lo lokombo la Nzambi akatɛ Abarahama dia nde aki l’ɔkɛndɛ wa ndakanya wa lo luudu lande dia vɔ ‘kɛndakɛndaka ɔlɔlɔ lo mboka ka Jehowa.’ (Etatelu 18:19) Wakatɛ ambutshi w’Ase Isariyɛlɛ dia nembetshiyaka anawɔ ɔnkɔnɛ wakatshungola Nzambi Isariyɛlɛ oma l’Edjibito ndo nganɛ wakandawasha Ɛlɛmbɛ ande lo Dikona dia Sinai, l’oswe wa Hɔrɛba. (Etumbelu 13:8, 9; Euhwelu k’Elembe 4:9, 10; 11:18-21) Wekɔ lo kɔkɔmiya ewandji wa nkumbo w’Akristo dia mbodja anawɔ “lo ohokwelo la lo ɛhɛmwɛlɔ waki Jehowa.” (Ɛfɛsɔ 6:4, NW) Oyadi kânga ombutshi ɔtɔi oto mbakambɛ Jehowa, nde pombaka ndjâtshutshuya dia ndakanya anande mboka ya Jehowa.—2 Timote 1:5; 3:14 15.
2. Onde ekɔ ohomba nyu mbeka kâmɛ lo nkumbo naka nyu bu l’ana? Lembetshiya.
2 Kɛsɔ hɛnya ɔnɛ paka nkumbo yele ndo l’ana mbahomba mbekaka Ɔtɛkɛta wa Nzambi kâmɛ lo nkumbo. Lam’asala wadi l’omi wekelo wa lo nkumbo oyadi kânga vɔ kema l’ana, dui sɔ mɛnyaka ɔnɛ vɔ mɛtɛ mbɔsaka akambo wa lo nyuma la nɛmɔ efula.—Efeso 5:25, 26.
3. Bonde kele ekɔ ohomba salaka wekelo wa lo nkumbo mbala la mbala?
3 Di’etombelo woleki ɔlɔlɔ monga, olakanyelo pombaka salemaka esangɔ l’esangɔ, lo ndjela wetshelo ɔnɛ wakasha Jehowa Isariyɛlɛ l’oswe wa shɛnga: ‘Aha la mbo ya ndɛ tsho mbasɛna onto koko l’ɔtɛkɛta tshɛ watomba oma l’onyɔ wa Jehowa.’ (Euhwelu k’Elembe 8:3) Lo ndjela awui wa lo nkumbo la nkumbo, nkumbo mɔtshi mbeyaka monga l’ekongelo ka mbekaka lomingu la lomingu; nkumbo nkina mbeyaka nɔngɔsɔla dia mbekaka yema tshitshɛ lushi la lushi. Oyadi ekongelo kakɔna tshɛ kayonyɔsa, pombaka wekelo ntshamaka mbala la mbala lo tena tshɛ diakanyasɔnɔla. ‘Nyoyatshungole etena’ ka mbekaka. Ndjâtshungolɛ etena ka mbekaka ekɔ dui dia lomba, nɛ dia nyayokondja ɛlɔlɔ efula l’ɔkɔngɔ diko. Nsɛnɔ y’ase nkumbo kayɛ nemanɛka la dikambo sɔ.—Efeso 5:15-17; Filipi 3:16.
Eyango wahombanyu nama lo yimba
4, 5. (a) Lo tshimbo ya Mɔsɛ, kakɔna kakasha Jehowa ambutshi oko oyango ɔmɔtshi w’ohomba lo olakanyelo w’anawɔ? (b) Ahombama ɛlɔ kɛnɛ dia ntsha dui sɔ?
4 Etena kalɔmbɔlayɛ wekelo wa nkumbo, etombelo w’ɛlɔlɔ efula wayoyala naka wɛ ekɔ la eyango wa shikaa lo yimba yayɛ. Ɛsɔ tênde awui amɔtshi wakokayɛ ntsha.
5 Lo wekelo tshɛ, yanga woho wa keketsha ngandji ka Jehowa Nzambi l’etema w’ase nkumbo. Lam’akatshumana Isariyɛlɛ l’oswe wa Mɔaba, la ntondo ka vɔ mbɔtɔ lo Nkɛtɛ ya Daka, Mɔsɛ akakotola yambalo yawɔ oya lo kɛnɛ kakayotaka Yeso Kristo l’ɔkɔngɔ diko ɔnɛ tɔ mbele ‘ɔlɛmbɛ woleki woke.’ Naa ɔlɛmbɛ akɔ ɔsɔ na? ‘Wɛ pombaka mboka Jehowa Nzambi kayɛ ngandji l’otema ayɛ tshɛ, l’anima ayɛ tshɛ ndo la lomu layɛ tshɛ.’ (Mateu 22:36, 37; Euhwelu k’Elembe 6:5) Mɔsɛ akakɔkɔmiya Ase Isariyɛlɛ dia vɔ tɔtɔmiya ɔlɛmbɛ ɔsɔ l’etema awɔ ndo mbôlakanya anawɔ. Dia dikambo sɔ ntshama, vɔ wakahombe mbaoholaka mbala la mbala, mbaɛnyaka bonde kahombaso mboka Jehowa ngandji, mbatɛka waonga la lɔkɛwɔ lakoka shimba onto monga la ngandji kɛsɔ ndo kɛnɛmɔla ngandji kokawɔ Jehowa lo nsɛnɔ yawɔ. Onde anaso wekɔ l’ohomba a wetshelo wa ngasɔ? Eelo! Ndo vɔ lawɔ mbele l’ohomba w’ekimanyielo dia ‘mbahenya etema awɔ ohekele,’ mbut’ate minya oseka dui tshɛ diakoka mbashimba vɔ mboka Nzambi ngandji. (Euhwelu k’Elembe 10:12, 16; Jeremiya 4:4) L’atei w’akambo asɔ wakoka mbadjɛ wekamu, mbeyaka monga nsaki ka mbo ya l’andja ɔnɛ ndo ka waaso wa ndjasha tshɛ l’akambo wa lɔkɔ. (1 Joani 2:15, 16) Ngandji kokaso Jehowa pombaka pɛtahɛtaka, mɛnama lo sɛkɛ, ndo totshutshuya dia sho ntshaka akambo wangɛnyangɛnya Shɛso lele l’olongo. (1 Joani 5:3) Dia nyu kondja ɛlɔlɔ wa pondjo oma lo wekelo anyu wa lo nkumbo, wekelo tshɛ pombaka salemaka lo yoho yakeketsha ngandji kɛsɔ l’otema w’onto.
6. (a) Kakɔna kalɔmbama dia mbisha ana ewo k’oshika? (b) Ngande watɛtɛ Afundelo ohomba w’ewo k’oshika?
6 Shawɔ ewo k’oshika ka kɛnɛ katɔlɔmba Nzambi. Kakɔna kahombama lo dikambo sɔ na? Aha paka mbeya mbadia la kadimola wembola wa lo periodikɛ kana lo dibuku dimɔtshi ko pe. Esangɔ efula, pombaka sawolaka dia menda kana ɛtɛkɛta w’ohomba la tokanyi ta weke wamboshihodiama dimɛna. Ewo k’oshika kekɔ ohomba efula di’onto ndɔta lonto l’oyoyo, dia nde shikikɛ washo ande lo akambo wele mɛtɛ ohomba lam’ende la ntondo k’awui wa lo lɔsɛnɔ, ndo dia ntshaka kɛnɛ kangɛnyangɛnya Nzambi mɛtɛ.—Filipi 1:9-11; Kolosai 1:9, 10; 3:10.
7 Kimanyiyawɔ dia vɔ kitanyiyaka kɛnɛ kekawɔ. L’oyango ɔsɔ lo yimba, yambolaka ɔnkɔnɛ lo wekelo tshɛ wa lo nkumbo: ‘Dui nɛ ngande wakokadiɔ monga la shɛngiya lo nsɛnɔ yaso? Onde pombaka tshikitanya dui dimɔtshi lo kɛnɛ katshaso nshi nyɛ? Bonde kahombaso ntsha etshikitanu ɛmɔtshi la lolango laso shamɛ?’ (Tukedi 2:10-15; 9:10; Isaya 48:17, 18) Mbidjaka yimba lo yɛdikɔ yakoka dia menda ɔnkɔnɛ wakokaso kitanyiya kana ndjela akambo wekaso kokaka monga ohomba efula di’ase nkumbo pama lo nyuma.
Kamba la dihomɔ di’olakanyelo oko kanga lomba
8. Dihomɔ diakɔna dia wekelo diakatosha olui w’ɔhɔmbɔ?
8 ‘Ɔhɔmbɔ wa kɔlamelo ndo wa kɛsɔ’ toshaka dihomɔ efula diakoka tokimanyiya lo wekelo. Tshoto y’Etangelo, periodikɛ yahombaso mbekaka l’ekimanyielo ka Bible, tanemaka l’ɛtɛkɛta 131. Abuku wa wekelo wa Bible wekɔ l’ɛtɛkɛta 153, tobukubuku l’ɛtɛkɛta 284, bandɛ-kasɛtɛ l’ɛtɛkɛta 61, bandɛ ya video l’ɛtɛkɛta 41, ndo prɔgramɛ y’eyangelo w’awui wa Bible l’ɔrdinatɛrɛ l’ɛtɛkɛta 9 w’etondo!—Mateu 24:45-47.
9. Ngande wakokaso kitanyiya alako wa l’avɛsa wofundami l’odingɔ ɔnɛ wonya wekaso Tshoto y’Etangelo l’atei a nkumbo?
9 Nkumbo efula mbɔsaka tena dia wekelo wa lo nkumbo dia nɔngɔsɔlaka Wekelo wa Tshoto y’Etangelo wa l’etshumanelo. Dui sɔ mɛtɛ kokaka mbakimanyiya efula. Lo Tshoto y’Etangelo mbatanema mma dia lo nyuma dioleki ohomba diakahanyema dia keketsha ekambi wa Jehowa wa l’andja w’otondo. Lam’ekanyu Tshoto y’Etangelo lo nkumbo, aha nyu komɛ paka lo mbadia edingɔ la kadimola wembola wofundami. Nyoyasha tshɛ dia mana akambo wa lɔkɔ fundo. Nyɔ̂sake etena ka mbadiaka avɛsa woshilami koko awui wa lɔkɔ hawofundami. Lɔmbaka ase nkumbo dia vɔ mbishaka kɔmatɛrɛ yɛnya woho wɔtɔnɛ divɛsa la kɛnɛ kofundami l’odingɔ akɔ. Nanda etema awɔ.—Tukedi 4:7, 23; Etsha 17:11.
10. Akokaso ntsha dia ndo ana tɛkɛtaka yema lo wekelo ndo dia mbetɛ wekelo akɔ dui di’ɔngɛnɔngɛnɔ le wɔ?
10 Naka ana wekɔ l’atei a nkumbo, kakɔna kakokanyu ntsha di’aha wekelo anyu monga oko etshelo kɛmɔtshi kambosawɔ koko etena k’ekeketshelo, ka dimɛna efula ndo k’ɔngɛnɔngɛnɔ na? Yâtshutshuyaka di’onto tshɛ mbishaka kɔmatɛrɛ lo yoho yakoka kele timba tawɔ tshɛ kôngake lo akambo wekanyu. Naka kokaka, sala woho w’ɔna l’ɔna monga la Bible kande hita ndo la periodikɛ kekanyu. Lo ndjela ɛnyɛlɔ ka ngandji kakɛnyaka Yeso otsha le anto, ombutshi mbeyaka mbidjasɛ suke l’ɔna la dikɛnda, ndo kânga mbodinga lonya. (Enda lo Mako 10:13-16.) Papa ka nkumbo mbeyaka nɔmba ɔna la dikɛnda dia nde nembetshiya osato ɔmɔtshi wa l’okanda wekawɔ. Kokaka tashaki ɔna dikɛnda divɛsa dimɔtshi la ntondo dia nde ndjâdia. Kokaka nɔmba ɔna laya opalanga dia nde mbuta waaso wɛnama wakokanyu ndjela kana kitanyiya awui akɔ wekanyu.
11. Naa dihomɔ dikina dia wetshelo diakawatotondjɛ, ndo wanɛ wele la diɔ ngande wakokawɔ kamba la diɔ lo yoho y’ɔlɔlɔ lo kɛnɛ kendana la wekelo wa lo nkumbo?
11 Kânga mbakokanyu mbɔsa Tshoto y’Etangelo oko etshina ka sawo dianyu, tanyohɛke dia dihomɔ dikina dia wekelo diekɔ lo ɛtɛkɛta efula. Naka nyekɔ l’ohomba wa mbeya awui amɔtshi kana olembetshiyelo wa tɔtɛkɛta tɔmɔtshi ta lo Bible, nyu kokaka menda lo dibuku dielɛwɔ Étude perspicace des Écritures. Nyayokoka kondja ekadimwelo wa wembola ekina lo Index des publications de la Société Watch Tower kana lo prɔgramɛ kaki la Société k’eyangelo w’awui wa lo Bible l’ɔrdinatɛrɛ. Mbeka woho wa kambaka la dihomɔ sɔ, naka diekɔ l’ɔtɛkɛta anyu, kokaka monga etenyi kɛmɔtshi k’ohomba efula ka wekelo wa lo nkumbo. Dia nomialomia mposa k’ana w’akɛnda, wɛ mbeyaka mbetshaka wenya ɛmɔtshi wa lo wekelo anyu wa lo nkumbo dia menda etenyi kɛmɔtshi ka bandɛ ya video yaki la Société kana mpokamɛ etenyi kɛmɔtshi ka dramɛ ko sawola awui akɔ. Naka nyu kamba la dihomɔ sɔ ɔlɔlɔ kete wekelo anyu wa lo nkumbo wayonga ndo ɔlɔ ndo wayokimanyiya nkumbo k’otondo.
Ɔtɔnganyiya l’ehomba wa lo nkumbo
12. Ngande wakoka wekelo wa lo nkumbo nyokimanyiya dia shidiya ehomba ɛmɔtshi wa lo nkumbo w’esadi esadi?
12 Mbeyaka monga ko lo wekelo anyu wa lo nkumbo, nyu mbekaka wekelo wa lo Tshoto y’Etangelo wahomba mbekama lomingu lakɔ lenyu. Koko, pombaka wɛ mbeya ekakatanu la tokanyi t’ase nkumbo. Naka mama ka nkumbo hakambe olimu ɔmɔtshi wa l’emunyi, kete nde kokaka mbidjasɛka l’ana lushi tshɛ dia sawolaka la wɔ lam’akalolawɔ oma lo kalasa. Ekakatanu ɛmɔtshi kokaka shidiyama etena kakɔ; ekina mbeyaka mona paka nyomoyenda nto. Naka ekɔ ehomba ɛmɔtshi wa lo nkumbo wahomba shidiyama esadi esadi, kete towanyake yimba. (Tukedi 27:12) Ehomba ɛsɔ mbeyaka monga ko hakome paka lo ekakatanu wa la kalasa eto koko ekɔ ndo ekakatanu ekina. Sɔnɔla awui wasungana, ndo tewoyisha ase nkumbo ɔnɛ awui anɛ kana wanɛ mbayoteka.
13. Lande na kakoka ase nkumbo kondja ɛlɔlɔ efula naka vɔ sawolaka awui wendana la woho wa mbeya sɛna lo wôla?
13 Oko ɛnyɛlɔ, wedja efula wa lo nkɛtɛ kɛnɛ wekɔ la wola wa mamba; ɔnkɔnɛ, l’ahole efula ekɔ ohomba sawolaka dia mbeya woho wa mbeya mbikikɛ lɔsɛnɔ la ngasɔ. Onde wekelo wa lo nkumbo waka epole ɔsɛkɛ lo akambo watomba mɛtɛ lo lɔsɛnɔ ndo l’akambo amɔtshi wa lo Bible kokaka monga la wahɔ le wa lo luudu layɛ?—Tukedi 21:5; Undaki 9:11; Heberu 13:5, 6, 18.
14. L’ɔtɛ w’awui akɔna mɛtɛ wele sunganaka efula sawolaka lo nkumbo lo kɛnɛ kendana la kanyi ya Jehowa lo akambo wa ngala, ata la lomangemange l’Akristo?
14 Dui dikina diahombanyu sawolaka ele dia akambo wa ngala. Sho tshɛ tekɔ l’ohomba wa kanyi ya Jehowa tɔtɔmiyama lo timba ndo l’etema wakiso. (Etatelu 6:13; Osambu 11:5) Wekelo wa dui sɔ lo nkumbo kokaka monga diaaso di’ɔlɔlɔ dia nyu kɛtshanya woho wahomba ana ntshaka la ntondo k’anto wâhɛnyahɛnya la kalasa, sawola la wɔ dikambo dia wekelo wa tɔkɛnyɔ ta ngala tele oko karate, la woho wa sɔnɔlaka diendenda diasungana. Ɛlɔshanelo wa ngala wambekɔnɛ efula; suke la wodja tshɛ wekɔ lo mɛna pâ oyadi l’ata wa l’asa ase ngelo, ɛlɔshanelo l’akambo wa pɔlitikɛ kana wa dibila, ndo ata w’atɔmbɔki. Omalɔkɔ, nkumbo kayɛ mbeyaka monga l’ohomba wa nyu sawolaka dia mbeya woho wahomba onto nama dionga di’Okristo lam’ende l’atei a wanɛ walɔshana.—Isaya 2:2-4; Joani 17:16.
15. Ngande wahomba ana ndakanyema awui wendana la tenyi dia demba dia dieyanelo ndo la diwala?
15 Lam’atole ana, vɔ wekɔ l’ohomba w’onto mbalakanya tenyi dia demba dia dieyanelo dia pami la womoto, ndo awui wa diwala lo ndjela ɛnɔnyi awɔ. Lo bɛkɛ dimɔtshi, ambutshi efula hawosawolaka l’anawɔ awui wa tenyi dia demba dia dieyanelo ndoko lushi. Ana wahakondjisha wetshelo l’akambo asɔ mbeyaka tɔ̂sa tokanyi ta kashi oma le ɛlɔngɔlɔngɔ kana esekaseka ekina, ko awui wa kɔlɔ mbeyaka ndjotomba. Onde kema ɔlɔlɔ mbokoya Jehowa, ɔnɛ latosha alako wasembɔ tɔɔ ndo w’eshika lo dikambo sɔ l’atei a Bible oka? Alako w’oma le Nzambi wayokimanyiya anaso dia vɔ nama nɛmɔ diayashawɔ ndo nɛmiyaka anto wotshikitanyi la wɔ bɛkɛ dia demba. (Tukedi 5:18-20; Kolosai 3:5; 1 Tesalonika 4:3-8) Oyadi kânga wɛ ambosawolaka la wɔ akambo asɔ, têngengake dia nyomosawola la wɔ nto. Ekɔ ohomba mboholaka dikambo mbala la mbala lam’ele awui w’eyoyo tatombaka.
16. (a) Lo nkumbo efula, wekelo wa lo nkumbo salemaka wonya akɔna? (b) Ngande wakayekola wekamu ɛmɔtshi dia ntshaka wekelo wa lo nkumbo mbala la mbala?
16 Etena kakɔna kakoka wekelo wa lo nkumbo salemaka na? Lo ndjela ɛnyɛlɔ ka nkumbo ya Bɛtɛlɛ ya lo nkɛtɛ k’otondo, nkumbo efula wekɔ l’ekongelo ka salaka wekelo wa lo nkumbo Lushi l’Ɔtɔi la dikɔlɔ. Nkumbo nkina yekɔ l’ekongelo kotshikitanyi. Lo wodja w’Argentine, nkumbo kɛmɔtshi k’anto 11, wadi l’omi l’ana 9, mbetɔka lushi tshɛ l’eshidi etanu wa pindju dia vɔ ntsha wekelo awɔ wa lo nkumbo. Ndoko wonya okina wakawakokaka ntsha wekelo ɔsɔ, nɛ dia ase nkumbo wakakambaka elimu lo tena diotshikitanyi. Ɔsɔ komonga dui dia wɔdu, koko diɔ diakatɔtɔmiya ohomba wa wekelo wa lo nkumbo lo timba ndo l’etema w’ana. Lo wodja wa Philippines, ekumanyi kɛmɔtshi ka l’etshumanelo akasalaka wekelo wa lo nkumbo mbala la mbala nde la wadiɛnde l’ana awɔ asato lam’akawayolaka. L’atei a lomingu, ambutshi wakekaka nto l’ɔna l’ɔna woho w’ɔna tshɛ mbɔtshiya akambo wa mɛtɛ l’otema ande. L’États-Unis, kadiyɛso kɛmɔtshi kele omɛnde bu Ɔmɛnyi wa Jehowa kɛndakɛndaka l’anande pindju tshɛ dia tɔ̂sa mutuka w’otsha la kalasa. Etena kakongawɔ mutuka, vɔ mbetshaka suke la minitɛ dikumi dia mbadia kâmɛ, ndo kɛtshanyaka awui wasungana wa wekelo w’Afundelo; oma lâsɔ ko kadiyɛso kɛsɔ nɔmba lo tshena pe la ntondo k’anande mbɔtɔ lo mutuka. Lo République démocratique du Congo, womoto ɔmɔtshi lele omɛnde akalawɔ nkumbo akahombaka mbidja wolo efula lo wekelo lam’ele nde kɔmbɔtɔ kalasa efula. Ɔnande la pami lambola ndjâka lomingu tshɛ dia ndjowaenda ko ndjɔlɔmbɔlaka wekelo wasalema kâmɛ la nyango ndo l’akosɛnde w’apami. Mama kɛsɔ mbishaka ɛnyɛlɔ k’ɔlɔlɔ lo woho wende l’etete lo nɔngɔsɔlaka wekelo. Onde ekɔ awui amɔtshi wêtɛ wekelo wa lo nkumbo wa mbala la mbala dikambo dia wolo lo nkumbo kanyu? Tanyohekɔke. Nyoyasha tshɛ dia nyanga woho wa Jehowa tshɔkɔla wolo wadjanyu dia mbekaka Bible lo nkumbo mbala la mbala.—Mako 11:23, 24.
Afuto w’oma lo etete
17. (a) Kakɔna kalɔmbama dia ntshaka wekelo wa lo nkumbo mbala la mbala? (b) Bɛnyɛlɔ diakɔna diɛnya ohomba wa ndakanyaka ase nkumbo mboka ya Jehowa mbala la mbala?
17 Ekɔ ohomba takongɛki awui la ntondo, ndo pombaka monga l’etete. Koko ɛlɔlɔ w’oma lo wekelo wa lo nkumbo wa mbala la mbala wekɔ efula. (Tukedi 22:6; 3 Joani 4) Lo wodja w’Allemagne, Franz nde la Hilda wakodja ana 11. Ɛnɔnyi efula l’ɔkɔngɔ diko, ɔnawɔ la womoto lelɛwɔ Magdalena akayota ate: “Kɛnɛ komɛna oko dui dioleki ohomba nshi nyɛ ele woho wakiso kombetshaka lushi ko hatolongodi olakanyelo ɔmɔtshi wa lo nyuma.” Lam’akayoleka pama ngandji k’ɔtɛkɔya ka wodja lo nshi ya lowandji laki Adolf Hitler, she Magdalena akakambaka la Bible dia nɔngɔsɔla nkumbo lo ehemba wakandeyaka ɔnɛ wekɔ lo ndjaye. L’edjedja ka wonya, anawɔ w’akɛnda wa lo nkumbo wakayondama ko wakatɔlama otsha lo kalasa ka tosolama wɔɔngɔ; ase nkumbo akina wakandama ndo wakadjama lo nkanu la lo mpango ya nkanu ya shidi. Amɔtshi wakadiakema. Mbetawɔ kawɔ vɔ tshɛ kaki nge—aha paka l’etena kɛsɔ keto kakawahɛnyahɛnyama efula koko ndo l’ɛnɔnyi wa l’ɔkɔngɔ diko, le wanɛ waki kondjakema.
18. Ɛlɔlɔ akɔna wakakondja ambutshi amɔtshi w’enyemba wodja ana vamɛ na?
18 Ambutshi efula w’enyemba ndo wanɛ wele waomɛwɔ kana wadiɛwɔ bu lo mbetawɔ mbetshaka anawɔ Bible mbala la mbala. Lo wodja wa Inde, mama kɛmɔtshi kakavusha omi akasalaka la wolo tshɛ dia tɔtɔmiya ngandji ka Jehowa l’etema w’anande ahende. Koko, otema ande wakalole la lonyangu lam’akayotombaka ɔnande la pami oma l’atei w’ekambi wa Jehowa. Nde akalɔmbɛ Jehowa dia mbodimanyiya kana nde akasale munga kɛmɔtshi lam’akandalakanyaka ɔnande. Koko ɔnande ɔsɔ mɛtɛ kombohɛ kɛnɛ kakandeke. L’ɔkɔngɔ w’ɛnɔnyi dikumi l’ɛmɔtshi, nde akayokalolaka, akayohama dimɛna lo nyuma, ndo akayokomaka ekumanyi l’atei w’etshumanelo. Ɛlɔ kɛnɛ, nde la wadiɛnde wekɔ lo kamba oko ambatshi mboka wa pondjo. Ambutshi asɔ mɛtɛ wekɔ l’ɔngɛnɔngɛnɔ nɛ dia vɔ wakadje alako wa Jehowa la w’ɔlɔngɔswamelo ande l’otema, alako akɔ watokeketsha dia ndakanyaka Bible mbala la mbala lo nkumbo! Onde wɛ ekɔ lo ndjela alako asɔ lo nkumbo kayɛ?
7. (a) Wembola akɔna wakokaso kamba la wɔ dia kimanyiya nkumbo dia tɔ ndjela awui wa lo wekelo? (b) Afundelo ngande watɛtɛwɔ ohomba w’oyango wa ngasɔ?
[Caption]
Onde wɛ kokaka nembetshiya?
◻ Bonde kele ekɔ ohomba salaka wekelo wa lo nkumbo mbala la mbala?
◻ Eyango akɔna wahombaso mongaka la wɔ mbala tshɛ kasalaso wekelo wa lo nkumbo?
◻ Naa dihomɔ dia wetshelo diakawatotondjɛ?
◻ Ngande wakoka wekelo mbɔtɔnɛ l’ehomba wa lo nkumbo?
[Caption]
[Study Questions]
[Caption on page 25]
[Picture on page 25]
Eyango wa shikaa wayolowanya wekelo anyu wa lo nkumbo