Ayonga mɛtɛ esambishelo ka woke
1. Lâdiko dia sawo diashama, naa dui dikina diakoka mambiya anto wakatele? Lembetshiya.
1 Kakɔna kayonga mɛtɛ esambishelo ka woke? Eohwelo. Welo efula wekɔ lo mbidjama dia mbelɛ anto dia vɔ ndjonga kâmɛ la so. Aha paka kɛnɛ kayooka anto wakatelɛ keto mbayowawambiya. L’ɔkɔngɔ wa nde mbɔtɔ lo Eohwelo, mama kɛmɔtshi akate lo yoho ya shikaa awui wakandɛnyi, mbuta ate lɔngɛnyi laki lam’asa anto tshɛ ndo woho wakayakimɔ anto amɔtshi la lolango dia mbetɛ dihole diakasalema Eohwelo pudipudi ndo olangala. Mbokɛmaka hwe dia lâdiko di’ɔtɛkɛtshi, sho tshɛ kokaka mbisha lonya dia dikambo dioleki ohomba dia l’ɔnɔnyi sɔ monga tshondo y’esambishelo le anto wakatele.—Ef. 4:16.
2. Ngande wakoka ɔmɔmɔ l’atei aso nsambisha angɛndangɛnda wakaye lo Eohwelo?
2 Tolongole angɛndangɛnda la waasaso tshɛ: Woho wayotolongola angɛndangɛnda l’ɔmɔnɔmɔnɔ ndo l’ɔngɛnɔngɛnɔ tshɛ ayonga tshondo y’esambishelo. (Joa. 13:35) Oyadi wɛ kema l’akoka wa nsawola l’onto tshɛ, wɛ kokaka ndjaeyanya la waasaso tshɛ le wanɛ wele suke la yɛ. (Heb. 13:1, 2) Toyange angɛndangɛnda wɛnama diele oko haweye ndoko onto. Mbeyaka monga ko onto ɔmɔtshi akawaelɛ etena kakatatakahanyaka akatshi wa leeta. Wɛ mbeyaka mambola ɔnɛ: “Onde ɔnɛ mbele mbala kanyu ka ntondo ka ndja lanɛ?” Lɔmbawɔ dia mbidjasɛ suke la yɛ ndo tɛwɔ dia wɛ ayonga suke dia mbâkadimola lo dimbola tshɛ diakokawɔ monga la diɔ. Naka etshumanelo kanyu pombaka ntshika dihole esadi di’ase etshumanelo kekina nsangana vɔ lawɔ, kete wɛ kokaka mimbola angɛndangɛnda wakadjashi la yɛ wate: “Ngande wakanyɛnyi losanganya lɔnɛ? Ngande wakokaso mɛnana lushi lokina?”
3. Ngande wakokaso nongola apandjudi wahayosambisha?
3 Tolongole wanɛ wahayosambisha wakaye: Aha la tâmu, apandjudi wahayosambisha wayoya, mbidja ndo wanɛ wahaye lo nsanganya nkina paka lo Eohwelo. Taalongole ndo towate dia tambɔngɛnangɛna dia mbaɛna. (Romo 15:7) Dikumanyi kokaka aha la ntshimbatshimba ntshɔ dia towaenda lawakawɔ dia tâkeketsha dia vɔ ntetemala ndja lo nsanganya. Tekɔ lo nɔmba dia wanɛ wayoya watshutshuyame dia ntombola Nzambi aha tsho l’ɔtɛ wa kɛnɛ kakawoki, koko ndo l’ɔtɛ wa ‘etsha aso w’ɔlɔlɔ wakawɛnyi.’—1 Pet. 2:12.