Todje Yimba dia Nongola Anto lo Losanganya la Eohwelo ka Nyɔi ka Yeso
1 L’ɛnɔnyi wetshi ɛnɛ, naka anto asato mbakɔtɔ lo losanganya la Eohwelo ka nyɔi ka Yeso, kete onto ɔtɔi oto mbaki opandjudi wa lokumu l’ɔlɔlɔ. Ondo ayonga woho akɔ wâmɛ ndo l’ɔnɔnyi ɔnɛ. Anto amɔtshi kokaka mbɔtɔ lo losanganya lɔsɔ nɛ dia onyaso kana onto leyana lande ɔmɔtshi ladjasɛ dihole dikina akawotɛ, koko akina wakelamɛ oma le opandjudi ɔmɔtshi wa l’etshumanelo. Akina nto wambolongolaka batismu koko, hawoyosambisha. L’otema ɔtɔi mbalongolaso anto wakitanyiya didjango dia Yeso nɛ: “Nyutshaki okone, dia nyu mbuhomi.”—1 Kor. 11:24; Romo 15:7.
2 Wanɛ wakamba olimu wa nongolaka anto pombaka ndjayoyaka anto tshɛ esadi, djekoleko oyoyo, kam’akomande lo Mbalasa ka Diolelo. Koko, sho tshɛ kokaka ndjâla la lomba la nongola angɛndangɛnda lo losanganya la Eohwelo ka nyɔi ka Yeso. (Romo 12:13) Woho akɔna?
3 La dikɔlɔ sɔ, anto amɔtshi wayoyasha dia ntshɔ otsha la tɔsa anto walanga. Akina kokaka koma la wonya w’ɔlɔlɔ dia nongolaka angɛndangɛnda woye vɔamɛ. Lam’ɔtɔ onto lahateye lo mbalasa, tôlongole la lɔngɛnyi tshɛ ndo totate sawola lande. Towombole dia kana nde mbeyanaka l’ose etshumanelo ɔmɔtshi. Naka ɔsɔku mbediɔ, tôkoke polo ndo lam’ayokoma opandjudi akɔ. (Enda lo Luka 10:35.) Naka nde heye ndoko onto, lande na ahatawotɛ dia nde mbidjasɛ suke laso lo wonya wa losanganya na? Tolembetshiya kɛnɛ kasalawɔ la mapa la vinyɔ lo losanganya lakɔ. Ondo nde kokaka ndjâla l’ohomba w’ekimanyielo kaso dia nyanga avɛsa wa l’Afundelo washila ombahemi a loseke.
4 Lam’ayoshila losanganya la Eohwelo ka nyɔi ka Yeso, towɛnya dia oyelo ande akatɔngɛnyingɛnyisha efula. Sho mbeyaka kadimola lo wembola wakokande mumbola w’endana l’olimu aso. Naka sho ndjasha shoamɛmɛ le nde, kete ondo tayotatɛ ɔkɛtshanyelo ɔmɔtshi w’oma lo Bible lo Mbalasa ka Diolelo kana lo dihole dikina. Anangɛso, wanɛ wɛna etale wambotatɛka mbeka l’anto Bible dimɛna efula lam’akawɔshi yɛdikɔ y’ɔlɔlɔ shɔ. La ntondo k’onto akɔ tomba oma lo Mbalasa ka Diolelo, towɛnyanya le anto akina ndo towele la wangasanu tshɛ dia nde ndja nto.
5 L’ɔngɛnɔngɛnɔ tshɛ mbalongolaso anangɛso l’akadiyɛso, wanɛ wahaye tena tshɛ lo sanganya kana waya edja hawoyosambisha. Lo dihole dia sho mbambola ɔkɔkɔ akɔna wahawayɛnama, towaɛnya tsho dia oyelo awɔ tɔngɛnyangɛnyaka. Ondo kanyi mɔtshi y’oma lo dako dia Eohwelo ka nyɔi ka Yeso kokaka mbasokoya dia vɔ nɔngɔsɔla diokanelo diasawɔ la Jehowa. Ondo woho wayotalongola la wangasanu ndo woho wayotoyasha le wɔ l’otema ɔtɔi ayonanda asolo awɔ. Towate dia tayɔngɛnangɛna naka sho mɛnana lawɔ nto.—Romo 1:11, 12.
6 Dako dimɔtshi dia lânde diele l’ɔtɛ a dui w’ɔnɛ: “Ekomelo k’ɛtɛmwɛlɔ wa kashi kaya suke” diayoshama lo tshumanelo efula lo Mɔmbi 23. Tele anto tshɛ wakɔtɔ lo losanganya la Eohwelo ka nyɔi ka Yeso oya lo dako sɔ ndo tɔshi tɛdikɔ dia vɔ ndjâla lawɔ. Tambolongamɛ dia anto tshɛ wayɔtɔ lo sanganya shɔ ya lânde wayonga l’ɔngɛnɔngɛnɔ ndo wayɛna lomba la wangasanu la diwotɔ diele l’atei w’anto wa Jehowa.—Osam. 133:1.