Taalongole dimɛna
1. Naa diaaso di’ohomba efula diayonga la so dia nsambisha, ndo ngande?
1 Ndoko diaaso dioleki dimɛna le so dia nsambisha ko ndeka nshi ya Eohwelo. Ɛnyɛlɔ: Ɔnɔnyi ɔnɛ tekɔ lo nongamɛ di’anto ndekana nunu dikumi wayɔtɔ lo Eohwelo ka nyɔi ka Yeso ndo wayoshihodia tolembetelo tohende ta weke tɛnya ngandji kakatoke Jehowa lo woho wakandakimɔ olambo w’etshungwelo. (Jni. 3:16; 15:13) Vɔ wayoshihodia nto di’ɛtshɔkɔ wa mamba wekɔ lo mbakongɛ diɛsɛ la woshasha wakatosha Jehowa ɔsɔ. (Is. 65:21-23) Koko, tolembete dia aha ɔtɛkɛtshi ndamɛ oto mbayosambisha anto lo diaaso sɔ. Sho tshɛ tayonga la diaaso dia nsambisha, lo nongola la wangasanu tshɛ angɛndangɛnda wayoya.—Rɔmɔ 15:7.
2. Ngande wakokaso nongola angɛndangɛnda la wangasanu tshɛ?
2 Lo dihole dia sho nkoma tsho ko mbidjasɛ lo dihole diaso ko kongɛka wonya wayotatɛ losanganya, shi ayonga dimɛna sho ndjaeyanya le wanɛ wayodjasɛ suke la so? Mbeyaka monga ko angɛndangɛnda wekɔ la yema ya wɔma kana sɔnyi ndo haweye kɛnɛ mɛtɛ kayanga salema. Diakɔ diele mbalongola la wangasanu ndo l’ɔngɛnɔngɛnɔ tshɛ kokaka mbakimanyiya dia vɔ ndjaoka dimɛna. Dia sho mbeya kana onto ɔmɔtshi akaye lo losanganya l’ɔtɛ wakandalongola dikatshi dia leeta, sho kokaka mbombola kana ɔsɔ mbele mbala kande ka ntondo ka nde mbɔtɔ lo nsanganya yaso, kana nde mbeyaka onto ɔmɔtshi la l’etshumanelo kaso. Ondo sho kokaka mbɔlɔmba dia nde ndjodjasɛ suke la so l’oyango wa taayelaka la nde wadielo wa Bible ndo wembelo w’esambo lo dibuku diaso. Naka lo Mbalasa ka Diolelo mbeso, kete sho mbeyaka ntshimba la nde yema dia mbɛnyatɔ naka kokaka. L’ɔkɔngɔ wa sawo dia Eohwelo, tosale la wolo dia ntshɔ dia tookadimola lo ambola ande. Naka etshumanelo kaso pombaka ntomba esadi dia tshikɛ etshumanelo kekina dihole, kete sho koka mbotɛ ɔnɛ: “Haleye kana wɛ ekɔ la dui dimɔtshi dia mbuta l’ɔkɔngɔ wa wɛ mpokamɛ sawo di’ɛlɔ. Onde dimi kokaka ndja la ngelo dia sho ndjosawola yema lo dikambo sɔ?” Oma laasɔ, ko sho mbɔsa tɛdikɔ tahombama dia ndjotshɔ towenda. Lo yoho ya laande, dikumanyi pombaka mbeya apandjudi wahayosambisha wayoya lo Eohwelo l’oyango wa mbakeketsha.
3. Lande na kele ekɔ ohomba dia sho nsala la wolo dia nongola wanɛ wayoya lo Eohwelo la wangasanu tshɛ?
3 Le anto efula wayoya lo losanganya lɔsɔ, ɔsɔ mbayonga mbala kawɔ ka ntondo ka vɔ mɛna ɔngɛnɔngɛnɔ, wɔladi ndo kaamɛ kele l’Ɛmɛnyi wa Jehowa lo paradiso kawɔ ka lo nyuma. (Osam. 29:11; Is. 11:6-9; 65:13, 14) Kakɔna kayotshikala lo timba t’angɛndangɛnda wayoya lo Eohwelo? Kɛsɔ ayolemanɛ efula la yoho yayotaalongola dimɛna.