Nshi shato y’ekeketshelo ka lo nyuma
1. Kakɔna kalongamɛso nongola lo Losanganya la distrikɛ l’ɔnɔnyi ɔnɛ?
1 Lo andja ɔnɛ waki Satana wadiɛnɛ anto lo nyuma, Jehowa ekɔ lo ntetemala nkeketsha ekambi ande. (Is. 58:11) Yɛdikɔ mɔtshi yakamba la Jehowa dia tokeketsha ele nsanganya ya distrikɛ yasalema ɔnɔnyi tshɛ. Oko wayasukana Losanganya la distrikɛ l’ɔnɔnyi ɔnɛ, ngande wakokaso ndjâlɔngɔsɔla dia ndjolongola ekeketshelo ka lo nyuma ndo kisha anto akina?—Tuk. 21:5.
2. Lo awui akɔna wahombaso nshidiya ndjâlɔngɔsɔla?
2 Naka tatayalɔngɔsɔla dia losanganya la woke lɔsɔ, kete tɔlɔngɔsɔlɛ dikongelo diaso hita ndo di’olimu wa l’emunyi wakambaso dia sho monga lo nshi yakɔ shato ya Losanganya la distrikɛ. Onde wɛ ambokamba akumi dia mbeya minitɛ ngana yayoyosalaka lushi tshɛ oma lo dihole diodjashiyɛ otsha lo dihole diayosalema losanganya dia wɛ komaka la wonya ndo ntana dihole dia dimɛna dia mbidjasɛ la ntondo ka losanganya ntatɛ? Tatokombolake pandja kânga yangangɔ ɔtɔi yendana la dambo dia lo nyuma diambotɔlɔngɔsɔlɛ Jehowa sɔ. (Is. 65:13, 14) Onde wɛ amboshila ndjâlɔngɔsɔla lo kɛnɛ kendana la dihole diayoyotodjasɛ ndo dia falanga ya futaka mutuka?
3. Alako akɔna watokimanyiya sho l’ase nkumbo kaso dia nkondja wahɔ efula oma lo Losanganya la distrikɛ?
3 Kakɔna kayotokimanyiya diaha yimba yaso mbekekɔ l’awui akina etena keso lo losanganya? Naka kokaka, tomuyake dimɛna otsho tshɛ lo nshi ya losanganya. Etena keso lo losanganya, tendake ɔtɛkɛtshi. Toyangake avɛsa lo Bible kaso. Tɔsake nɔtɛ ya tomondo. Ekɔ dimɛna di’ase nkumbo mbidjasɛka dihole ɔtɔi di’ambutshi mbeya nkimanyiya anawɔ dia mbidja yimba dimɛna lo losanganya. (Tuk. 29:15) Ondo sho kokaka kɛtshanyaka la dikɔlɔ tshɛ lo nkumbo, awui w’ohomba wakatami lo losanganya. Dia nkumbo kaso ntetemala keketshama lo nyuma kânga l’ɔkɔngɔ wa losanganya laso la woke, ekɔ ohomba mbɔsaka yema y’etena lo wonya wa Ɔtɛmwɛlɔ wa lo nkumbo wa la dikɔlɔ dia nsɛdingola awui amɔtshi wa shikaa wahomba ase nkumbo kaso nkamba la wɔ.
4. Ngande wakokaso nkimanyiya anto akina wa l’etshumanelo kaso dia vɔ nongola ekeketshelo ka lo nyuma?
4 Tokimanyiya anto akina dia vɔ nkondja ekeketshelo: Sho kombolaka di’anto akina nkondja ekeketshelo vɔ lawɔ. Onde tekɔ l’apandjudi amɔtshi waya esombe kana anto akina wa l’etshumanelo wele l’ohomba w’ekimanyielo dia vɔ mbɔtɔ lo Losanganya la distrikɛ? Onde tekɔ l’akoka wa mbâkimanyiya? (1 Joa. 3:17, 18) Dikumanyi, djekoleko emendji w’elui w’esambishelo pombaka ndjashikikɛ di’apandjudi asɔ wambokondja ekimanyielo kahombama.
5. Ngande wayotokahanya akatshi wa leeta lo dihole diasalema losanganya laso la woke? (Enda ndo kiombo yele la diko ndjo.)
5 Oko wakatadisale ɛnɔnyi wetshi, mingu shato la ntondo ka Losanganya laso la distrikɛ ntatɛ, tayokahanya akatshi wa leeta dia mbelɛ anto akina oya lo losanganya la woke lɔsɔ. Tshumanelo pombaka ndjadjɛ oyango wa nkahanya akatshi awɔ wa leeta ndo nkidjakindja ɛtshi ka woke ka mbilo kawɔ naka kokaka. Ase nkumbo kayɛ pombaka ndja l’akatshi wa leeta wakiwɔ kokahanya oya lo dihole diayosalema Losanganya la distrikɛ dia ndjowasha anto etena kasambishawɔ lo tshakitudi. Tayonyewoya awui akina wendana la dikambo sɔ lo ekongelo ka Lushi la tanu. Naka ase nkumbo kayɛ wekɔ l’akatshi akina wa leeta wɛnawɔ dia hawotokoka mbisha anto lo dihole dia losanganya la woke lɔsɔ, kete etena kayowɔtɔ lo dihole dia losanganya, washa ɔnangɛso ɔmɔtshi lasha anto ahole akatshi akɔ wa leeta. Lam’alangɛ, lama dikatshi dimɔtshi dia leeta nɛ dia wɛ ayoyonga la diɔ ohomba etena kayoshama sawo dia komelo dia Lushi la lomingu.
6. Toho takɔna takokaso mɛnya loshilambo laso lo losanganya laso la woke?
6 Loshilambo nkeketshaka anto akina: Nshi nyɛ yele anto efula ‘ndjalangaka’ ndo hawɔlɛnya nsaki y’anto akina, ekɔ mɛtɛ dui di’ekeketshelo dia monga kâmɛ l’asekaso Akristo wasala la wolo dia monga la dionga dia loshilambo. (2 Tim. 3:2) Sho mɛnyaka dia tekɔ la loshilambo lo mbewɔ dia mbɔtɔ lo dihole dia losanganya pobobo ndo l’ofukutanu etena kadiholawɔ nkuke ya dihole sɔ l’eshidi 8:00 wa pindju. Sho pombaka mambɛ ahole paka dikambo dia ase nkumbo kaso, wanɛ wakaye la so mutuka ɔtɔi, kana wanɛ weka la so Bible nshi nyɛ. Sho ndjelaka kɛnɛ katotɛ ɔnɔmbɔdi wa losanganya etena katɔlɔmbande dia ntshɔ l’ahole aso dia mpokamɛ mishiki wakadjama l’eshinga. Tayɛnya nto dia tekɔ la loshilambo lo nsala la wolo diaha telefɔnɛ yaso fukutanya anto akina wonya wa losanganya. Sho mɛnyaka nto loshilambo laso lo mbewɔ dia mbidja londjo, fundanɛ mesajɛ, ndɛ kana mbetetaka tshanana wonya wa losanganya.
7. Ngande wakokaso keketshana l’anangɛso ndo l’akadiyɛso etena keso kaamɛ?
7 Lɔngɛnyi lakeketsha: Nsanganya ya weke toshaka waaso wa monga kâmɛ l’anangɛso ndo l’akadiyɛso w’Akristo. (Osam. 133:1-3) Lande na kahatɔshi yɛdikɔ ya ‘ndjaeyanya l’anto akina,’ mbuta ate anangɛso l’akadiyɛso wakaye oma lo tshumanelo dikina? (2 Kor. 6:13) Sho kokaka ndjadjɛ oyango wa mbeya kânga onto ɔtɔi kana nkumbo kɛmɔtshi lushi tshɛ. Diomuyelo dia la midi toshaka diaaso dia nsala dikambo sɔ. Sho kokaka ndja la yangɔ mɔtshi y’osadi ya ndjɔlɛ la midi dia monga kâmɛ l’anto akina wonya wa diomuyelo lo dihole dia mbaatshika ko ntshɔ tosomba kana tɔlɛ lo waa rɛstora wele lasuke. Dui sɔ mbeyaka tosha diaaso dia mbɔtɔ lɔngɛnyi l’anto w’eyoyo, lɔngɛnyi lakoka ntshikala pondjo.
8. Lande na kahombaso ndjakimɔ la lolango dia nkamba lo dihole diasalema losanganya, ndo ngande wakokaso nsala dui sɔ?
8 Ekɔ mɛtɛ dui diakeketsha dia nkamba kâmɛ l’atɛmɔdi w’asekaso olimu w’ekila! Onde sho kokaka ndjâkimɔ la lolango dia nkimanyiya departɛma dimɔtshi kana nkimanyiya etshumanelo kaso naka tɔ mbele la diɛsɛ dia mɔmba dihole dia losanganya? (Osam. 110:3) Naka wɛ atakondja olimu, kete lam’alangɛ, wɛ kokaka ntshɔ lo Departɛma di’anto wayakimɔ la lolango. Tatohɛke dia olui mbolɛ dihonga.
9. Lande na kahombaso ndeka mbidja yimba lo lɔkɛwɔ ndo lo ɛnamelo kaso lo nshi yasalema losanganya laso la woke?
9 Lɔkɛwɔ laso keketshaka anto watenda: Tekɔ ase losanganya lo nshi yakɔ shato tshɛ yayoviya Losanganya la distrikɛ lɔnɛ, koko aha paka l’etena keeta losanganya. Wanɛ watenda etena keso lo dihole dia losanganya pombaka mɛna dia diɔtɔnganelo diakeketsha diekɔ lam’asaso l’anto wele kema Ɛmɛnyi wa Jehowa. (1 Pet. 2:12) Ɔlɔtɔ ndo ɔlɔngɔswɛlɔ aso wa divo lo dihole dihangiso ndo lo waa rɛstora pombaka mbisha Jehowa kɛnɛmɔ. (1 Tim. 2:9, 10) Naka sho ndɔta tshapa yaso, kete wanɛ watenda wayeya dia tekɔ Ɛmɛnyi wa Jehowa. Dui sɔ mbeyaka tosha diaaso dia mbaewoya awui amɔtshi wendana la losanganya laso ndo mbâsambisha.
10. Naa awui amɔtshi wɛnya dia lɔkɛwɔ laso l’Okristo lekɔ tshondo y’esambishelo?
10 Shɛngiya yakɔna yele la lɔkɛwɔ laso l’ɔlɔlɔ le anto akina lo nshi yeso lo losanganya laso la woke? Lo ndjela jurnalɛ mɔtshi, jɛra ya dihole dimɔtshi diakatahange akate ate: “Anto anɛ wekɔ la loshilambo la mamba. Ɔnɔnyi tshɛ sho nomɔlomɔka dia monga kâmɛ la wɔ.” Ɔnɔnyi wetshi, onto ɔmɔtshi lele kema Ɔmɛnyi wa Jehowa akashisha tshapatapa yadjande falanga l’ɔtɛlɛ wakahange anto wakaye lo Losanganya la distrikɛ. Etena kakawakaloyɛ jɛra ya l’ɔtɛlɛ tshapatapa shɔ la yangangɔ tshɛ yaki lɔkɔ, jɛra akatɛ kanga tshapatapa yakɔ ate: “Wɛ ekɔ la shansɛ nɛ dia Ɛmɛnyi wa Jehowa mbasala losanganya lawɔ suke la lanɛ ndo woho wele vɔ mboludi l’ɔtɛlɛ ɔnɛ. Otondonga anto akina, tshike totoyɛna tshapatapa yayɛ nyɛ nto.”
11. Oko wayasukana Losanganya la distrikɛ, oyango akɔna wahombaso ndjadjɛ ndo lande na?
11 Nsanganya ya distrikɛ y’ɔnɔnyi ɔnɛ yaya k’emembe. Welo wekɔ lo mbidjama di’ekongelo kɛsɔ monga kiɔkɔ y’ekeketshelo le so. Ɔnkɔnɛ, toyadje oyango wa monga nshi yakɔ shato ndo toyalɔngɔsɔlɛ dikambo dia kɛnɛ kambotɔlɔngɔsɔlɛ Jehowa la okongamelo ande. Toyashikikɛ dia nkeketsha anto akina oma lo dionga diaso dia loshilambo, lɔngɛnyi laso, ndo oma lo lɔkɛwɔ laso l’ɔlɔlɔ. Lo nsala ngasɔ, sho la anto akina tayoyaoka oko wakayaoke onto ɔmɔtshi lakɔtɔ lo Losanganya la distrikɛ l’ɔnɔnyi wetshi lakafunde ate: “Losanganya lɔsɔ laki dimɛna woho w’anyanya!”
[Efundelo wa l’etei w’odingɔ wa lo lɛkɛ 4]
Oko wakatadisale ɛnɔnyi wetshi, mingu shato la ntondo ka Losanganya laso la distrikɛ ntatɛ, tayokahanya akatshi wa leeta dia mbelɛ anto akina oya lo losanganya la woke lɔsɔ
[Efundelo wa l’etei w’odingɔ wa lo lɛkɛ 6]
Ɔlɔtɔ ndo ɔlɔngɔswɛlɔ aso wa divo lo dihole dihangiso ndo lo waa rɛstora pombaka mbisha Jehowa kɛnɛmɔ
[Efundelo wa l’etei w’odingɔ wa lo lɛkɛ 7]
Toyashikikɛ dia nkeketsha anto akina oma lo dionga diaso dia loshilambo, lɔngɛnyi laso, ndo oma lo lɔkɛwɔ laso l’ɔlɔlɔ
[Kiombo ya lo lɛkɛ 4-7]
Waohwelo wendana la Losanganya la distrikɛ la lo 2011
◼ Ekongelo ka wenya: Nshi yakɔ shato, losanganya layomɛka lo eshidi 8:20 wa pindju. Koko lo kɛnɛ kendana la nsanganya yayosalema lo esomba wa weke ɛnɛ: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lumbumbashi, Matadi, Mbandaka, Mbuji Mayi, Mwene Ditu, Pointe Noire ndo la Tshikapa, ekongelo kayotatɛka lushi tshɛ l’eshidi 9:20 wa pindju. Nkuke yayodihɔmaka lo eshidi 7:00 kana l’eshidi 8:00 wa pindju lo ndjela dihole la dihole. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo ntatɛ lo yoho ya dimɛna yasha Jehowa lotombo.
◼ Ahole wa mbidjasɛ: Paka wanɛ woye la so mbala ɔtɔi kana wele la so lo luudu lâmɛ, kana ambeki aso wa Bible mbahombaso namɛ ahole wa mbidjasɛ.—1 Kor. 13:5.
◼ Olelo wa la midi: Sho nɔmbaka anto tshɛ dia ndjaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. Mbewɔ dia somba diangɔ dia ndɛ le anto asɔ ayokimanyiya dia pudipudi monga lo dihole dia losanganya. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Joa. 2:13-17.)
◼ Weshasha: Sho kokaka mɛnya lowando laso lo tɛdikɔ tendana la Losanganya la distrikɛ lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo. Onto tshɛ lakimɔ shɛkɛ pombaka ndjikimɔ lo lokombo la Association “Les Témoins de Jéhovah.”
◼ Aksida ndo awui wa wanyandja: Akɛnama di’anto ndjaka kânga lo awui wa totshitshɛ le wanɛ wakamba lo Departɛma diendana la esakelo ka wanyandja. Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja. Lâsɔ anto asɔ wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Wondelo wa foto: Lam’alangayɛ, naka wate munde foto wonya wa losanganya, kete tokambake la angadimu. Lam’alanganyu, tanyelɛke anto wanda waa foto lo dihole dia losanganya. Naka nyambowaɛna lo dihole dia losanganya, kete tanyâlɔmbake dia vɔ nyonda foto.—Joa. 2:13-17.
◼ Telefɔnɛ: Sho pombaka nsala woho waha yɔ mbekelo timba timba t’anto akina.
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka tɔɔ la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la ntshimbatshimba. 3) La ntondo ka wɛ katɛ, tambodi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ nkamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo ekanelo k’ɔlɔlɔ. 5) Pudipudi kakatana la omamemelo le Nzambi. Kotshikake pango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla olowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole ɔtɔi.—Ngal. 5:22, 23.
◼ Olimu wa wanɛ wayakimɔ la lolango: Ɔngɛnɔngɛnɔ wakondjaso lo mbɔtɔ lo Losanganya la distrikɛ wayoleka mfula naka sho ndjakimɔ la lolango dia mbisha ekimanyielo kaso l’elimu ɛmɔtshi w’ohomba. (Etsha 20:35) Onto tshɛ lalanga nsala dikambo sɔ kokaka nkimɔ lokombo lande lo Departɛma di’anto wayakimɔ la lolango. Ana wele l’ɛse k’ɛnɔnyi 16 kokaka mbisha ekimanyielo ka dimɛna efula lo nkamba l’ɛlɔmbwɛlɔ k’ombutshi awɔ ɔmɔtshi, olami ɔmɔtshi wa dihole sɔ kana l’ɛlɔmbwɛlɔ k’opalanga okina wambetawɔma ome le ombutshi kana olami ɔsɔ.
[Kiombo ya lo lɛkɛ 5]
Ngande wayotosha anto akatshi wa leeta?
Dia nkindjakindja ɛtshi kaso ka nkɛtɛ, sho la dia tɛkɛtaka lo tshena pe. Sho kokaka mbutɛ onto ɔnɛ: “Akemwe. L’andja w’otondo, tekɔ lo nsala la wolo dia mbisha anto dikatshi dia leeta nɛ. Dikatshi diayɛ diɔ nɛ. Wɛ ayotana awui akina lɔkɔ.” Lɛkɛ la ntondo la dikatshi dia leeta nɛ koka nkotola yambalo y’onto, lâsɔ tshuma onto dikatshi sɔ lo yoho yakokande mɛna lɛkɛ la ntondo. Onga la waasaso. Etena kakahanyaso akatshi anɛ lo wɛkɛndɛ, sho kokaka mbisha anto ndo periodikɛ naka kokaka.